Presidente di Oxford Union a renuncia tocante un altercado involucrando un studiante ciego, kende ‘violentamente’ a ser retira for di un debate di sociedad.
Un guardia di siguridad a ‘aborda’ Ebenezer Azamati ora el a purba bolbe na un asiento cu el a reserva anteriormente pa e discusion dia 17 di october ultimo. Azamati, kende tin discapacidad visual, a ser ‘forsosa y violentamente preveni di drenta e union pa bolbe su asiento’ pa e debate, segun Africa Society di e universidad.
Segun e organisadonan di e debate, a nenga Azamati pa drenta pasobra e debate a cuminsa caba, y tambe pasobra e espacio tabata yen, maske Azamati a reserva un stul anteriormente. Despues el a keda acusa di conducta violento, pero diasabra durante apelacion el a keda declara inocente.
Presidente di e sociedad, Brendan McGrath a pidi disculpa pa su ‘erornan’ y a renuncia. Studiante di posgrado, Azamati, kende ta di Ghana, a bisa cu su trato a pon’e sinti ‘no bonbini den e union, Oxford, ni e pais’.
Despues cu exitosamente a apela e cargonan contra Azamati, McGrath a pidi disculpa na Africa Society ‘pa e angustia y cualkier daño reputacional’ na e studiante. Helen Mountfield QC, representando Azamati, a bisa cu tabatin palabracionnan andando cu e union tocante ki pasonan lo mester tuma pa trata cu e ‘fayonan’ exponi den e caso.
Den un carta na e standing committee, cual a post riba e pagina di Facebook di Oxford Union, McGrath a bisa: “Pa tur mi deficiencia y tur mi erornan, mi ta disculpa profusamente y sin reserva.”
El a bisa cu maneha e respuesta na e retiro di Azamati for di e debate tabata ‘lo mas dificil cu a mi a yega di keda encarga cune’.
Oxford Union, cual ta independiente di e universidad, tin un tradicion di organisa debate bayendo bek na aña 1823. Ta un di e sociedadnan mas prestigioso den mundo, y ta un camara di debate cu internacionalmente ta similar na House of Commons. E union ta invita lidernan mundial, politico, celebridadnan y speaker controversial pa duna discurso, cual mayoria ta studiante actual of anterior di Oxford.
