Awe parlamento lo continua e reunion pidi pa partido di oposicion MEP tocante e otorgamento di tereno. Un di e metanan ta pa trece mas transparencia den e proceso. Ainda por mira cu e minister encarga cu Infrastructura tin hopi poder pa dicidi ken ta haya tereno.
Desde cu Aruba por goberna pa su mes (Status Aparte, 30 aña pasa) gobernacionnan di diferente signatura politico a uza otorgamento di tereno, entre otro, como instrumento pa haya voto of pa recompensa sostenedo (priva of comercial). Esaki ta algo cu varios biaha a sali for di investigacionnan manera di Algemene Rekenkamer y tambe e instituto Hulandes WODC.
Un punto di cambio importante a sosode na 2007, ora cu e ley di ROP (Ordenanza di desaroyo teritorial) a drenta na vigor. Esaki a limita den cierto forma, e otorgamento di tereno pa actividad di construccion y comercial. Sinembargo e desaroyo na Bubali Plas ta mustra atrobe cu gobierno mes no ta tuma esaki mucho serio, violando hasta e ley.
Durante e ultimo gobernacion di MEP e president di Staten actual, Marisol Lopez Tromp tabata minister di Infrastructura. E tempo ey e tambe a ricibi hopi critica pa su decisionnan pa tereno di gobierno. Hasta a acusa di tuma placa pa asina otorga tereno pa un amigo, pero tabata falta di prueba y Sra. Lopez Tromp semper a nenga cu esaki a tuma luga.
Un cos si gobierno e tempo ey a regla, tabata e procedura transparente pa otorga tereno comercial. Tin reglanan cu rekisitonan hopi cla pa esunnan cu ta pidi tereno comercial. Por ehempel mester entrega prueba cu bo tin suficiente placa pa realmente haci algo cu e tereno y no por ehemplo pidi tereno pa despues bende pa otro (haci negoshi cu tereno).
Bou di gobernacion di e minister di Infrastructura actual, Benny Sevinger, por mira diferente caso unda minister ta haya peticionnan pa tereno di comerciantenan, y despues bou di e famoso palabranan ‘akkoord. Gaarne uw medewerking’ of ‘dezerzijds akkoord. Gaarne uw medewerking’ ta manda nan pa e departamento concerni DIP. Esaki sin tene cuenta cu e procedura menciona ariba.
Segun e minister, e palabranan aki no ta nifica cu e comerciantenan (manera e famoso comerciante Venezolano Roberto Rincon cu awor ta den prizon pa corupcion) realmente ta haya e terenonan pidi. Cu esaki ainda ta den man di e diferente departamentonan manera DIP y tambe DOW pa finalmente dicidi si e peticion lo wordo aproba.
Pero departamento di DIP mes a informa Bon Dia Aruba cu nan ta evalua tur peticion, despues nan ta manda nan pa minister cu nan conseho. Y finalmente e decisionnan ta keda den man di minister pa aproba of no.
Den e prome tanda di e reunion cu ta continua awe den parlamento, MEP a entrega un mocion unda ta pidi un investigacion profundo den otorgamento di tereno bou maneho di minister Sevinger.
