Politiconan cuidadoso pa bay den detaye

E prome debate organisa pa Camara di Comercio ta pertenece na pasado caba. Ta warda nos un otro mas cerca dia di eleccion, na augustus. Esun di diahuebs anochi tabata uno cu hopi anticipacion con e formula di debate, cu no menos cu shete partido, lo bay resulta. Despues di un comienso un poco slow, cu tabata mas bien contesta pregunta y no tabata duna oportunidad pa debate, a bin mas candela den e asunto. Un biaha mas ta resulta si cu pregunta, pa bon cu nan ta introduci y argumenta, no necesariamente ta haci cu politiconan ta duna e contesta cu contenido cu ta spera di nan. Tabata parce cu tempran den e proceso electoral ningun hende lo a bay mustra tur nan cartanan, o talbes por ta cu nos como periodista cu ta tur y henter dia meti den e asuntonan aki, ta spera contesta hopi mas detaya riba varios topico.

Asina tambe tabata falta un poco e reaccion di un riba e otro, na momento cu ta trece algo dilanti cu ta dificil pa realisa. Un momento asina tabata e ponencia cu un partido lo bay aumenta e parti cu ta toca enseñansa den presupuesto te na 10% di GDP. Esey ta clean 4% riba e norma internacional cu nos nunca a alcansa. Y cu un presupuesto super comprometi pa e añanan venidero, nos a keda falta e reaccion riba esaki, ta con tabatin pensa di realisa esaki. 4% di GDP ta un bunita suma di casi 200 miyon florin, no cos cu bo ta haya benta banda di bari di sushi mainta tempran. Ademas e tempo tabata cortico pa scucha ta con algo asina mester keda realisa.

Na mas ocasion nos a ripara cu e otronan no ta reacciona skerpi ora uno ta bisa cos cu ta zona bunita, pero cu no ta toca e curason di e asunto. Riba e tema di turismo medico, lider di partido den gobierno ta anuncia cu hospital nobo ta bay sirbi como base pa inicia turismo medico. Y cu ta bay ‘exporta conocemento’ den e proceso. Ultimo biaha cu nos a check, bo mester tin facilidadnan bon, pero no necesariamente super. Super mester ta e hendenan cu bo tin pa build up un reputacion internacional pa haci hende bin cerca bo pa tratamento. Nos tin esey? No, pero den e pais unda nos ta manda mayoria di nos hendenan pa tratamento, conocemento ta abunda! Asina ta, ban importa conocemento y duna nos futuro mediconan un oportunidad pa crece bira nivel internacional den cas mes. O nos tin keto bay miedo di e lobby di medico cu no kier bay den e desaroyo aki?

Dos tema mas a keda trata sin por a scucha solucion concreto: e problema di dump y e sistema fiscal. A scucha un punto di bista fuerte di algun partido cu e dump mester bay, pero no ta tende solucion. Por ehemplo si ta tuma e decision di principio cu mester busca solucion di exportacion di desperdicio, en bista di e carencia di solucion definitivo na Aruba mes. Tocante nos sistema fiscal tampoco a bin dilanti algun posicion nobo. E lider den gobierno no a anuncia ningun cambio, loke tampoco ta sorprende nos.

Lastima cu e temanan dirigi riba comercio, manera e idea di ‘one stop shop’ no a haya e acogida necesario cerca e partidonan. KvK mes den e añanan anterior a lucha pisa pa logra mas, pero tabata un di e puntonan cu e gabinete actual absolutamente no tabatin oido pe.  Ta parce cu ora ta trata di drecha cos den gobernacion, poco partido ta bin dilanti cu proposicion concreto.

A dura hopi largo prome cu e preocupacion moral mayor di e momento, na nos opinion en todo caso, a yega riba tarima: e situacion di corupcion na nivel halto den gobernacion. Keda sin discuti esaki lo a aparece como un hipocresia colectivo. Lastima cu e aparente falta di preparacion riba e punto aki, di e organisacion, no a duna espacio pa discuti mas ampliamente riba esaki. Lo tabata interesante si nos por a scucha mas di con partidonan tin pensa di takel e problema aki, por ehemplo a traves di regla y sistema di control interno mas severo pa funcionario y mandatario. Lo tabata refrescante tambe si nos por a tende di e lider den gobierno cu e tambe ta condena corupcion, cos cu nos no a tende ainda.

Sigur a keda suficiente tema pa discuti cu no a haya espacio pa bin dilanti. ‘Unfinsihed business’ manera e continuacion di e debate den comunidad y partidonan politico encuanto e amienda den codigo civil cu a crea igual derecho pa parehanan di mesun sexo. Di un banda esnan cu ta anhela yega tambe na un reconocimento di matrimonio civil como derecho pa LGBT no lo keda para un banda, pero esnan cu a base di nan creencia no ta na fabor, ni di reconocimento di partnership ni di matrimonio, tampoco lo keda sin exigi di e partidonan un punto di bista cla. Tambe ta spera di tende na augustus mas detaye tocante e programanan di partido. Nos ta pendiente!