Diamars ultimo a tuma lugar e Debate Nacional organisa pa e plataforma ‘Vota Pa Ken’, unda representantenan di e 11 partido cu ta postula pa eleccion a participa. E formato di e debate tabata un propuesta interesante, incluyendo un Comodin, Lightning Questions, y mas.

Un di e temanan cu mas tin atencion durante campaña ta e tema di inmigracion. Durante e ronda di ‘Lighting Questions’, unda e participantenan mester a duna un contesta sin por elabora, a puntra e partidonan si ta sostene un maneho di integracion unda ta regularisa of legalisa e status di indocumentadonan na Aruba, of si lo prefera mantene e maneho cu tin actualmente. Tur partido a scoge pa legalisa, cu excepcion di Lucha pa Reforma di Ryçond do Nascimento, kende a scoge pa keda cu e maneho actual.

Desperdicio

Otro pregunta interesante tabata tocante dump na Parkietenbos, cu a cera pa entre otro, capacidad, salud di e habitantenan di e bario, y consideracion pa medio ambiente. Sinembargo, desde ceramento di e dump, a cuminsa deposita mayoria di desperdicio na Ser’i Teishi y por nota cu awor cu habitantenan den e vecindario tin problema cu e gas y holor di sushi cu ta sali for di e area. Den e rapport ‘Aanpak Afvalbeheer 2022-2025’ a premira tambe cu e ceramento di dump lo causa dumpnan ilegal rond di e isla, algo cu tambe a bira un realidad. A puntra MAS, Raiz y PPA si lo mantene Parkietenbos cera, y ki solucion tin pa maneho di desperdicio den proximo cuatro aña.

Partido MAS di Marisol Tromp a bisa cu “en berdad door di cera e dump a ocasiona cu a habri como 200 dump mas rond di e isla.” El a reconoce cu e ta supone cu esaki “ta pasobra hende no a educa, no a bin cu un sistema caminda cu ta distribui e desperdicio for di cas caba, siña e hendenan con parti esaki, con pa haci cu e ta yega su destino, sin cu ta trece e problemanan cu tin actualmente.” Tromp a bisa cu partido MAS no por habri dump na Parkietenbos di nobo pasobra tabatin diferente caso den corte tocante esaki caba. Ademas di esey, “ta bay pa e calidad di bida di e hendenan di e bario, nan salud ta primordial y nos ta kere p’esey no por habrie back.”

 

Pero segun ley di Ruimtelijke Ordening, e area ta destina pa tipo di actividadnan asina, pues partido MAS ta kere cu mester sinta back na mesa pa mira e proximo stap, “pasobra tin hopi hende ta bin cu idea y solucionnan p’e.” Sinembargo, mester tene cuenta cu “Aruba no ta produci dje tanto desperdicio pa cierto solucion cu kier bin cune.”

Di su banda, Ursell Arends di partido Raiz a bisa: “Nos a priminti, nos a cumpli. Nos a paga e candela, nos a cera dump.” Tocante dump ilegal, Arends a bisa cu “nan mesun gabinete na 2012 a crea un rapport caminda a señala cu tin 62 afgravingen rond di e isla, di cual 31 di nan ta wordo usa como dump ilegal. Na 2023 e mesun rapport aki a wordo revisa caminda tin 43 afgrvignen y seis di nan ta wordo usa como dump ilegal,” enfatisando cu esaki no a bin pa motibo cu a cera e dump na Parkietenbos.

El a bisa cu como minister a atende cu dump ilegal. “Nos sa cual ta e companianan cu ta yena e buraconan aki, pero desde 2012 pa 2023 19 buraco a wordo yena y niun hende a bisa nada.”

Tocante cuanto desperdicio Aruba ta produci, Arends a nota cu e cantidad cu tabata yega Parkietenbos no ta e cantidad total produci pa Aruba. “E solucion tabata Baki den Bario. Den proximo Gabinete nos lo bin cu un parke circular caminda lo separa sushi for di yegada caba y reusa esaki.”

Otmar Oduber di PPA a reacciona bisando cu eigenlijk dump na Parkietenbos “no ta cera.”

“Tur dia tin truck ta hiba sushi na dump, tur dia tur sushi ta wordo tira rond di Aruba pasobra a bira demasiado caro pa esnan cu haci limpiesa na Aruba por hiba nan sushi. Y di tres, nos sa cu e solucion ta conoci for di 20 aña pasa, e no a cambia.”

Oduber a referi cu mester bin cu un ‘Waste and Energy Plant” y percura pa un “sanitary landfill”, esta un dump sanitario. Oduber a bisa cu mester “pasa un ley cu ta para for di cinco aña den Parlamento simplemente pasobra politica tabata mas importante cu salud di hende y cu beneficio di medio ambiente.” E ta considera cu si aproba e ley en cuestion, lo soluciona e problema na un “80%”.

Tromp a contesta cu simplemente pasa e ley no lo soluciona tur cos. “Si tabata asina, e ora djis pasando e ley ta trata un parti di e problema.” El a bisa cu tin mas lugar cu tin afgravingen “pasobra hopi di e terenonan aki ta eigendom” y cu e doñonan ta permiti pa usa e tereno como dump ilegal. El a insisti cu pa bin cu un solucion, lo mester bin back na mesa.

Referendum

Tambe e tema di Referendum a haya atencion, y e biaha aki a dirigi e pregunta na partido Curpa, Accion21 y LPR.

Pa Curpa, Ras a bisa cu nan ta di acuerdo cu un referendum pasobra “tin topiconan cu mester ta den man di pueblo y no cu ministernan ta dicidi cu nan ta tuma accion anto pueblo no tin participacion.” Pueblo mester tin escogencia riba topiconan importante, el a bisa, mencionando cu no por “pasa leynan cu ta contra moralidad.”

Pa Accion21, Miguel Mansur a bisa cu ta sostene e referendum, cu ta duna pueblo e chens pa opina. Pero nan “no ta sostene ningun movecion cu ta bay kita ciudadano nan derecho.” El a bisa cu tin un compas moral como pais, cual ta Constitucion, y partidonan ‘kier kita espacio pa nos tur existi.’ Mansur a bisa cu nunca kier pone minoria den peliger. El a conclui bisando cu “derechonan constitucional no ta negociable. Punt.”

Di LPR, Ryçond do Nascimento a bisa cu si ta biba den un democracia, “e ora pueblo ta esun cu mester por dicidi.”

“No por ta asina cu un hues ta bay impone algo manera un cambio di ley, hasta si e ta pa algo manera matrimonio.” E ta pensa cu esakinan ta “decisionnan fundamental”, y cu ley, derecho, pueblo ta dicidi y forma esaki den un democracia. “Ora hende ta bisa cu ‘anos ta para pa derecho humano’, corda bon cu e fundeshi y locual nos tin como derecho humano awe, ta hustamente nos herencia Hudeo-Cristian. Ta hustamente e pensamento cu Dios a crea cada ser humano na su imagen y semehansa ta hustamente e idea cu anos tin chispa divino den nos, ta cu awe nos tin un sociedad cu derechonan humano.” Pesey democracia y referendum ta necesario.

Den e tema aki, partido Red a usa su Comodin, cu ta permiti nan contesta un pregunta cu no tabata dirigi na nan, den 15 seconde. Ricardo Croes a bisa cu ta imposible pa papia di democracia si no ta involucra e pueblo den e decisionnan.

Igualmente, Mansur a usa e opcion di ‘Bula Aden’, cu a dun’e 45 seconde pa duna un reaccion final.

Mansur a bisa cu el a entrega un mocion – sugeriendo cu ta pa matrimonio di mesun sexo – den Parlamento, pero cu partido MEP y AVP “a blokea Parlamento di tuma un decision, eventualmente a hiba na caida di gobierno, pasobra nan no ta kere cu tur ciudadano tin derecho igual.” El a enfatisa cu Constitucion t’ey pa protege tur minoria, sea di orientacion sexual of religioso. “Nos no kier bay back na un tempo cu mayoria por exclui cualkier minoria di nan derecho.”

Na final, comunidad a haya e formato di e debate uno interesante cu a duna espacio pa mas discusion entre e partidonan.