Diahuebs anochi e ‘Debate Politico Constructivo Millennial Edition’ organisa door di grupo di hoben bou nomber di ‘Encuentro Politico Constructivo’, a capta atencion di hopi hende den comunidad. Hopi ta comenta cu esaki tabata bon organisa y asina toch algun hende a haya falta di contestanan concreto for di algun lider politico.
“E ta yena nos cu emocion y ta un honor pa tin tur e lidernan presente. Nos a traha 16 siman pa realisa esaki y mi no por keda sin bisa danki na tur esunnan cu a yuda haci esaki posibel. Danki tambe na e focus group cu sigur nos no por a logra esaki sin nan,” un di e hoben organisadonan QueenAnne Bergen ta comenta na final di e anochi. Segun nos a compronde for di varios hende cu a acudi e debate di ayera, esaki tabata uno basta diferente anto interesante. Manera cu e debate a cuminsa el a mustra manera un forma di bataya caminda algun di e lidernan mesora tabata dirigi palabra na otro na cualkier oportunidad cu nan haya. Lider di partido Red Ricardo Croes, desde inicio te na final a trece poco humor den e debate cu su reaccionnan y expresionnan. Esaki a resalta den por ehempel ora cu lider di fraccion Mep Evelyn Wever – Croes a remarca di ta di acuerdo cu Ricardo riba su ponencianan den e pregunta di alivia sentimento di insiguridad den comunidad, y na varios otro momentonan durante e anochi. Riba rednan social hopi a comenta cu sra. Wever – Croes a domina e prome tanda di e debate anto a haya hopi bon reaccion for di publico, te ora cu a yega na e pregunta di ‘si of no’ riba matrimonio di personanan di mesun sexo. 
Publico
E sala tabata relativamente yen y por a mira hopi cara hoben cu a bin acudi e debate aki. Riba rednan social tambe nos redaccion a tuma nota cu tabata tin basta hende cu a sigui e debate aki, reaccionando riba diferente partinan di e anochi cu a resalta pa nan. Varios biaha nos redaccion por a tuma nota cu e publico tabata hari por ehempel cada biaha cu lider di partido PPA Benny Nisbet tabata menciona su ‘Master Plan’, y algun biaha ora cu Christina Lampe di partido Curpa tabata trece su puntonan pa dilanti. Algun biaha e moderadornan a haya nan mes ta bisa e publico pa no reacciona durante cu e lidernan ta contestando nan pregunta.
Programa diverso
E programa di e debate tabata basta diverso. A duna cada partido 2 minuut di tempo pa contesta pregunta y despues 30 seconde pa debati/duna un reaccion of comentario. Den e segundo tanda por ehempel nan a introduci un estilo yama ‘3-3-3’ caminda a trece tres partido pa dilanti y duna nan tres pregunta pa contesta, mientras e resto tabata sinta patras y cada un a haya 30 seconde pa responde cu un reaccion. Despues di esaki a bini un otro parti basta interesante unda cu a haci cinco pregunta cu solamente e opcion di contesta si of no. Hopi remarcabel y basta comenta riba medionan social, tabata e parti cu cada lider a haya e oportunidad di bisa algo positivo di e lider sinta na su banda robes. Na final di anochi, tur partido a haya e oportunidad tambe pa duna nan ultimo palabranan pa cera e anochi.
AVP no tabata presente
Manera cu ya tabata conoci pa basta persona, partido AVP a duna di conoce cu nan no lo participa na e debate. Esaki ta bin despues cu segun nan, e grupo organisado no kier a acepta nan candidato Gerlien Croes. E grupo organisado a bisa di a keda desapunta den e partido su manera di actua ya cu tur ‘reglanan di wega’ tabata stipula for di un comienso. Tambe AVP a confirma desde algun tempo atras cu nan no lo tey pero 1 siman prome cu e debate a haci peticion pa cambia nan candidato. E decision aki no a cay den mucho bon tera cerca hopi hende paso nan ta di pensamento cu tur lider mester tabata presente. Pero di otro banda tambe tin e grupo cu ta argumenta riba e hecho cu e debate a wordo haci pa millennials y cu mester a manda un candidato cu ta representa e grupo milenial.
