Un di e hoben organisadonan principal di e Debate Politico Constructivo cu a tuma luga diahuebs anochi ta laga sa cu esaki a bay miho cu nan a pensa.

“Como prome biaha bo ta en espera con e anochi lo bay y haci bo best pa tur cos cana mas miho posibel”, Queen Anne Bergen ta comenta na Bon Dia Aruba. E ta bisa nos cu locual mas a resalta pa nan ta e momento cu e lidernan mester a bisa algo positivo di otro y cu tur a wanta nan mes na esaki. “Mi ta kere e tabata un momento sumamente special y emocionante y por spera algo otro prome cu eleccion, trabao ta sigui. Nos ta inspira pa sigui. Nos ta sinti cu pueblo ta pidiendo pa esaki y cu nos tin hopi apoyo pa esaki. Mi ta kere e prome debate aki tabata un push pa nos no stop.”

Homohuwelijk
Interesante tabata e comentario despues riba e pregunta si nan tabata pro of contra e ‘homohuwelijk’. Bon Dia Aruba cu ta publicando for di luna pasa caba ponencianan cu partidonan por contesta cu ‘si of no’ a haci e pregunta similar caba y publica riba 13 di juni. Nos a puntra e 9 partido (e tempo ey Raiz no tabata lanta ainda) si parehanan LGBT mester haya e derecho pa casa. E partidonan AVP y ABO no kier a contesta cu ‘si of no’. Awor ABO a contesta cu ‘no’ mescos cu e otro partidonan cu nos a publica riba 13 di juni: MEP, PPA, MAS y Curpa. E partidonan RED, POR y UPP a vota si. Awor AVP, mescos cu nan a contesta den añanan di eleccion na 2009 y na 2013, no kier duna un contesta clave. Esaki pa motibo cu no tin consenso den partido riba e topico aki: un parti ta haya cu si mester duna parehanan di mesun sexo e derechonan di casa pero un otro parti no ta di acuerdo. Entre otro e lider di e partido mes, esta Mike Eman, no ta haya cu e parehanan di mesun sexo mester haya e derecho di casa na Aruba.

Temanan
Den e prome tanda a cuminsa cu e pregunta riba nos situacion economico. Basa riba datonan di CAFT, nos debe nacional ta 86% di nos GDP. A puntra e partidonan si ta considera esaki sostenibel y kico e partido lo haci pa mantene financia publico sostenibel den un periodo rasonabel di cuater aña. Despues di esaki a toca e tema di educacion. Caminda a puntra cu ki porcentahe e partido lo hisa of baha presupuesto anual di educacion y riba kico specifico lo desea di inverti. E di tres pregunta tabata dirigi riba criminalidad y kico e partido lo haci pa remedia e situacion di insiguridad cu tin actualmente den nos comunidad.

RED
Ricardo Croes manera cu nos a informa caba, a mustra di a trece poco ambiente humoristico durante e anochi. El a finalisa e anochi bisando cu di partido RED nan deseo como partido ta pa pueblo realisa cu campaña no ta djis campaña. “Campaña mester ta a base di berdad y vision. Bo voto ta un arma poderoso. E balor di bo voto mester tuma luga a base di un evaluacion entre otro di loke a tuma luga caba den gobernacion, cual ta yuda bo scrap partidonan cu tin cu bay. Anto e ora e otro parti ta pa bo realisa cu nos no por sigui asina y e cambionan bo a tende parti di dje awe nochi aki riba. Nos mester un aire nobo, fresco, berdadero y sincero.”

MEP
Evelyn Wever Croes: “Un di e partido politiconan para den escenario awe nochi ta esun cu ta bay goberna bo pais despues di 22 di september. Ami ta kere cu nos di partido MEP tin e miho ekipo pa por logra e cambionan den e pais akinan.” Sra. Croes a enfatisa cu un ekipo cu experiencia combina cu hopi cara nobo, hende muhe y homber cu no a goberna ainda pero ta determina pa trece un cambio ta locual Aruba tin mester aworaki. Sra. Croes a haya hopi bon comentario cu a circula rond medionan social cu e tabata basta calmo y colectivo durante e debate anto a mustra hopi profesionalismo den su manera di contesta.

PPA
Benny Nisbet a conclui e anochi cu e crisis financiero economico cu nos ta bibando aden ta consecuencia di hopi aña. “Di un banda di e gobernacion actual, pero tambe otro gobernacionnan. E realidad di bida ta cu si despues di 31 aña un comunidad no ta cla pa trece cambio den e signatura di gobernacion, nos ta leu for di cas. Nos conseho na tur Millennial ta, level up, switch y vota PPA.”

MAS
Holmo Henriquez a laga sa cu locual su partido ta para pe ta pa pone e poder soberano bek den man di pueblo. “No por ta asina cu via un gobernante of politico bo ta haya un oportunidad. Esey mester bira pa pasado. E parti ey nos a experiencia pa 31 aña caba. Esunnan cu ta pretende di ta e cambio awe cu ta den e parti tradicional, no ta bay trece e cambio pa bo. Abo ta bal mas, y bo ta merece mas.”

RAIZ
Ursell Arends a haci un bon impresion tambe diahuebs anochi durante e debate segun comentarionan den comunidad. For di inicio el a laga sa cu e no tabata di cay pa e mesun weganan tradicional, hibando un politica diferente y no di lastra otro. “Locual Raiz kier a trece awe dilanti ta un mensahe di union. Un Aruba cu un vision nobo. Mi ta sigur cu awe nochi akinan cu ora nos speransa nace atrobe, hunto nos lo ta sembrando un futuro.”

CURPA
Christina Lampe di partido CURPA a finalisa ta bisa cu e partido aki ta uno cristian cu ta uni pa reenforsa potencialnan di Aruba. “Y p’esey nos kier reenforsa e Millennials y henter Aruba. Tabata un honor pa mi haya e invitacion aki pa participa awe nochi cu poco experiencia prome biaha como lider di un partido politico, pero ami ta tum’e como un experiencia grandi. Un amor grandi den mi curason pa duna aporte cu partido Curpa den sociedad. Mi ta conta cu boso voto tambe dia 22 di september pa hunto nos hiba e isla aki pa un direccion nobo den husticia.”

UPP
Candelario ‘Booshi’ Wever a laga sa cu tur hende ta papia di cambio pero cambio real ta bini ora ta bini ora cambia no solamente hendenan, pero tambe e reglanan. “Un di e reglanan cu ta kita deficit democratico ta entre otro por ehempel pa cambia sistema electoral caminda e restzetel tambe ta wordo poni den e tombola. Pa asina e partidonan cu no a haya asiento, tambe participa ora cu parti e restzetels. P’esey nos ta pidi pa duna sosten na partidonan chikito si kier un cambio real.”

ABO
Elton Loe A Tjam di partido Abo a bisa cu e determinacion pa haci un cambio ta duradero. “Nos a scucha ultimo ocho aña un Aruba di cinco strea. Tur dia bo ta wordo bisa kico nan a haci pa bo manera nan ta tira bo pinda. Ta papia di calidad, pero dicon nos no ta papia di e calidad di e ser humano?” E ta bisa cu e debate aki ta mas esencial pa pueblo den su totalidad haya sa cu tin alternativa y partidonan di hende honesto. “Y no solamente di e partidonan tradicional cu tur aworaki a hasta kita democracia di hende. Tur hende ta afilia na un partido mientras cu pa 31 aña largo bo a haya e mesun wega y mentiranan. Debatenan asina ta importante pa pueblo realisa cu e poder ta keda den nan.”

POR
Otmar Oduber a finalisa bisando cu nos ta na un momento unico. E politico ta laga sa cu e grupo di Millennials ta esun cu lo fiha caracter di e eleccion venidero.
“E grupo aki ta e grupo cu lo bay influencia esunnan di generacionnan mas grandi contrario na añanan anterior unda cu grandinan tabata influencia e hobennan. E generacion aki kier participacion, positivismo, nan kier tin trabao mañan. Nan ta progresista y kier mira cu problemanan ta wordo atendi den forma pragmatico. Ta p’esey partido POR a wordo funda y t’ey awe pa sirbi e pueblo.”