Corupcion lo ta e tema grandi?

 

Awe nochi por presencia e prome di e debatenan organisa pa Camara di Comercio, cu bista riba eleccion pa Staten dia 22 di september. Un bon momento pa tira un bista atras riba eleccion y debate di cuatro aña pasa. E tempo ey KvK hunto cu ATIA a uni forsa pa presenta un debate entre e tres partidonan cu tabata representa den parlamento. E biaha aki, bao di un yobida di critica, a amplia e formato pa inclui (casi) tur partido cu a anuncia cu nan ta bay participa den eleccion. Nos ta laga e discusion ey pa enfoca riba e debate mes.

Un comparacion cu e situacion na 2013 ta duna nos por ehemplo cu e tempo ey e situacion financiero di Pais Aruba tabata sumamente serio caba, pero no algo generalmente acepta. E confrontacion cu e realidad financiero e anochi di e debate na 2013 a haci prome ministro bira masha irita, afectando su actuacion cu en general tabata bastante bon. Sin embargo su contrincantenan (MEP, PDR) no por a probecha ni convence mayoria di pueblo den eleccion. Nos por conclui cu un debate no tin tanto influencia riba electorado? En todo caso, e partido den gobierno a continua rumbo pa e victoria mas grandi di un partido politico den historia di Aruba desde 1986.

Aparentemente na e altura ainda un gran mayoria tabata contempla mas e logronan cu gobierno tabata presenta, y no tabata preocupa cu e consecuencianan financiero di tur esaki. Ademas Aruba no a realisa ainda cu e gastonan excesivo di gobierno no tabata pa inverti di berdad. Practicamente no tabatin inversion haci den presupuesto, pero scondi den e gastonan extra di e famoso proyectonan ‘PPP’.

Un aña despues di e victoria grandi nos a haya nos den e tumulto di juli 2014, cu intervencion di Hulanda den e situacion financiero pa pone orden den os cas. Di 2015 te awe nos ta bao supervision financiero, cu un monitoreo estricto di nos presupuesto. Esey no ta bay disparce tampoco den e periodo di gobernacion nobo, y ta algo cu mester haya atencion durante e debate. Specialmente e contradiccion entre plan y promesa bunita/necesario, y e realidad di  un maneho financiero estricto, cu otro aña mester desemboca den un prome surplus riba presupuesto. Esun cu mester bay goberna por haci su mes e gran fabor di no emplea 300, 400 o mas hende den nan despacho, manera a sucede den e gobernacion actual, y cu a percura pa e scandal di patronahe politico mas grandi di nos historia. Un chasco cu ainda ta costa nos mas di 30 miyon florin pa aña… Bo ta lesa bon: e circo rond di e ministronan a costa nos den ocho aña sigur 250 miyon florin. Suficiente pa paga e renobacion di hospital, sin fia placa! Interesante pa sa di tur partido kico nan tin pensa di haci al respecto.

E tarea pa e lider di e partido den gobierno lo ta pa expone e logronan cu tabatin den su bista den e dos periodonan di gobernacion. Kico asina e por trece dilanti? Sigur e manera cu a regla e problemanan grandi cu tabata existi cu e fondo di AOV y AZV, cu a resulta den un situacion financiero mas faborabel pa e fondo di pension, aunke cu a haci esey a traves di aumenta edad di pension gradualmente te 65 aña. Mester bisa si cu e cambio aki no a lanta tanto controversia den pueblo. Hopi hende tabata mira e urgencia. Si di parti di oposicion kier desafia esaki, primintiendo reduccion di edad, ta indispensabel pa nan bisa ta con ta paga esaki; no tin espacio pa haci promesa bashi.

E refineria no lo ta un parti interesante di e debate. Pa cuminsa henter parlamento menos Marisol Tromp ta kere ainda den e proyecto aki, mientras cu e noticianan di pafo di Aruba ta mustra riba un trancamento den e avancenan. Hasta gobierno ta parce di ta tene cuenta cu esey y a opta pa atrobe bay den direccion di e famoso 1000 camber di hotel na Seroe Colorado. Un gran parti di Aruba no ta kere mas den trece mas hotel, pero e gobernantenan no ta tende. Di tur manera, cualkier gobierno cu sinta despues di september, probablemente por bay kibra cabes con ta tapa e buraco cu e refineria ta laga den e proyeccion di crecemento economico, y por lo tanto den entrada pa gobierno.

Finalmente, e tema di corupcion na nivel halto por bira e tema mas resaltante, y cu su rason. Nos por papia di tur bon intencion cu tin pa drecha situacion den tur sector, pero prome cu tur cos e pueblo votado mester por confia cu ministronan no ta sinta pa enrikece nan mes. Te awor prome ministro no a pronuncia su mes riba e tema aki, pero ta bira urgente pa e hacie. Pa oposicion ta importante pa nan señala kico nan ta bay haci al respecto. Un simpel ‘nos si no ta corupto’ no ta suficiente. E debate ta e prome ocasion pa oposicion mustra cu nan por trece un alternativa viabel pa e actual gobierno. E debate no ta decisivo, pero si un ocasion cu no por perde.