Cu participacion di tur 12 candidato lider di partido den proximo eleccion pa parlamento, diahuebs anochi Camara di Comercio a organisa su di dos debate. A haci varios modificacion na e set up cu a percura pa un proceso hopi mas anima, compara cu e promer edicion dos siman pasa.

Contrario na e anterior edicion e biaha aki tabatin mas debate, pero cu na varios momento no a duna e ‘chispa’ cu hopi tabata spera. E duonan cu a enfrenta otro hasta tabata di acuerdo cu otro, loke no ta stimula debate. Te na final, den e confrontacion directo entre e dos rivalnan grandi, actual Promer Ministro Evelyn Wever Croes y lider di AVP, ex-PM Mike Eman, candela a dal den e planchi. Riba e tema di corupcion, cu e caso di e parlamentario actualmente encarcela, por a anticipa esaki tambe. Un lider opositor defensivo pa su maneho di ataque riba autoridadnan hudicial y defensa firme di e acusado, y un mandatario mas tranquil cu no tabatin pakico di laga e asunto bay for di man, no a mantene tranquilidad. Sin embargo e debate a bira asina cayente y personal cu e moderador mester a interveni. Finalmente a keda e posicion di e lider di AVP cu no kier a duna un opinion cla si un mandatario o parlamentario bao investigacion lo mester entrega su puesto, mientras cu e actual promer mandatario si a mantene e posicion ey.

Segun reaccion di e publico cu a reacciona via internet pa deposita nan preferencia pa e politico cu lo a actua mihor, gran parti tabata na fabor di actual Promer Ministro (demisionario) Eveleyn Wever-Croes. Otro candidatonan cu a mustra bon forma tabata Miguel Mansur, Marisol Lopez-Tromp, y Ursell Arends, loke ta visible tambe den e encuestanan haci.

Un decepcion tabata candidato lider Mike Eman di AVP, cu tabata den mihor condicion cu uden e promer debate, pero cu asina mes no tabata convincente. Ademas, ora e anochi a culmina den e confrontacion cu Wever-Croes riba e tema di corupcion, el a recuri na ataque personal como mihor defensa, nunca un punto fuerte.

Privacidad di dato personal

E promer pregunta tabata tocante privacidad di ciudadano y e obligacion den ley electoral pa duna cada partido cu ta desea esey, un copia di e registro di votante. Banda di partido AVP, cu a entama un caso den corte contra decision di gobierno pa no duna e partidonan copia mas, pasobra e stipulacion legal ta contra Tratado di Roma di Derecho Humano, algun otro partido tambe a expresa nan deseo pa haya copia. Caso den corte siman venidero lo dicidi si en berdad partidonan lo haya e registro. E encuesta riba esaki a mustra sin embargo cu mayoria grandi 68% ta di acuerdo pa no duna e partidonan e lista mas di e votadornan registra.

Economia informal

E pregunta encuanto presencia di empresario y empleado ilegal cu ta un menaza pa negoshinan legal, a duna varios contesta cu tabata enfatisa sea introduccion di impuesto indirecto, pa pone tur hende contribui, te inventarisacion di tur hende y negoshi ilegal, pa pone nan contribui, o sali di e pais. Tambe cu mester actua contra trafico humano, cu ta presente na Aruba. Tambe a menciona, na otro momento den e debate, cu feneralmente e control gubernamental ta fayando.

Naturaleza o avance economico

Sacrifica naturaleza pa crea por ehemplo un parque solar, otro tema cu a resulta den mayoria di e partidonan bisando cu nan no ta kere cu esey ta un bon opcion. A bin dilanti e alternativa di instalacion di panel riba dak y cu no ta mira pakico mester sacrifica naturaleza. Ademas cu tin un refineria cu varios no ta mira bolbe den operacion y cu por usa e tereno pa esey.

10% di GDP maximo pa gasto di personal

Den e Landspakket tin menciona uncu reduccion di gasto di personal di gobierno te maximo 10% di GDP. Aki ta unda a haya varios contesta cu no tabata toca e curazon di e asunto, sea pa cautela o falta di conocimento. E lider di MEP tabata un poco contradictorio, pa e insidernan anto, bisando cu no ta bay kita 1.500 cupo di trabao,y mencionando entre otro overtolligheidspool, unda a haci bon trabao caba di casi termina cu e pool, pues unda ta bay corta anto.cumpli cu e norma estableci. Tambe el a menciona digitalisacion y e-government, cu tambe a lo largo ta implica menos cupo di trabao. En general lhopi falta di claridad aki.

Gastonan di AZV

Diferente partido ta d opinion cu no mester pone mas peso riba e ciudadano, pues nada di ‘eigen bijdrage’, tambe algun cu ta haya cu no mester corta gasto mes. Segun AVP, economia mester crece pa AZV bira pagable atrobe. PPA a bisa cu un eigen bijdrage por ser considera si esaki ta proporcional segun entrada, pa considera esnan cu entrada chikito. Raiz ta haya cu e situacion ta debi na mal maneho, corta vet den AZV ta posible, mester stimula bida mas saludable, y haci maneho mas efectivo y sin mas peso riba pueblo.

Flexibilisacion ley laboral

Encuanto flexibilisacion di ley laboral, tabatin varios partido contra, pero no tabatin splicacion mas detaya den esaki, por ehemplo kico ta e leynann cu por o no por cambia. Accion 21 a bin cu e propuesta di cambia e ley di cesantia, den e sentido cu ora cambia o perde trabao, e empleado ta haya loke a acumula cerca e empleador, pa su uso personal. Aki tabata haci falta un splicacion di antemano kico e flexibilisacion por encera, y por lo tanto tabata tende pro (tiki) y contra (hopi) sin splicacion mas aleu.

Landspakket (reformanan hunto cu Hulanda)

Varios partido a bisa cu e acuerdo cu Hulanda ta un hecho y cu mester tuma esey como punto di salida pa logra lo maximo pa Aruba den e ehecucion. MEP ta para pa e acuerdo firma y partidonan manera Accion 21, PPA, MAS, Raiz, POR, RED, ta mira e acuerdo como un hecho y cu mester implementa, aunke den e ehecucion ta mira oportunidad pa logra bon resultado. Accion 21 ta haya cu e medidanan tey caba pero tin partidonan cu no ta hinca nan den nan plan, Accion 21 si. AVP ta kere cu bon relacion cu Hulanda ta clave y cu por cambia cos den e acuerdo, den e colaboracion.

Raiz: Sinterklaas no ta biba na Den Haag!

Na nos opinion, e frase mas contundente di e debate tabata di Ursell Arends di Raiz. Papiando di e costonan di e reforma proyecta, el a adverti: “Sinterklaas no ta biba na Den Haag!” El a referi na e expresion di un miembro di Algemene Rekenkamer cu a bisa den un reunion di Staten algun aña pasa, papiando di e tardanza pa tuma medida pa mehora situacion financiero di gobierno: Si nos no ta hacie, nan ta bin hacie pa nos.” Y cu ta den esey nos ta actualmente y cu finalmente nos lo paga tur cos. Parti di e realidad cu no tur partido tabata comparti.

Pa resultado di e encuestanan haci durante y despues di e debate, nos ta referi na e resumen di esaki den e edicion aki, o acudi na e Facebook page di KvK