E debate den parlamento riba e cambio di ley pa limita e desaroyo di all-inclusive na Aruba ta mustra falta di un bon estudio riba e efectonan di e limitacion aki riba e sector di turismo y e economia di Aruba.
Esaki te awor ta e conclucion di kico tur a wordo trece dilanti den e debate. E debate mes no a yega su votamento pa motibo cu presidente di Staten a suspendi te diamars pa motibo di compromisonan di otro parlamentarionan.
Minister encarga, Otmar Oduber awe den su contestanan ta keda insisti cu tin suficiente dato caba pa sigui cu e proceso di cambio di e ley. E echo cu ta falta informacion pa tuma un decision balansa, ta algo cu cu e gremionan ya a trece dilanti e siman aki. E sector di turismo mes ta dividi. E organsacionan cu ta defende e interes di e sector, esta Ahata, ta contra e cambio di ley. Sinembargo tin gremio, manera companianan cu ta ofrece servicionan pa turista (watersport, restaurant, taxista) cu ta para banda di minister.
Un rapport di Banco Central cu a sali e siman aki, tampoco a trece e claridad spera. Den e rapport por lesa cu nan mes ta conclui cu mester mas estudio pa midi e efectonan.
Na comienso di e debate awe partido di oposicion MEP a puntra minister Oduber pa e rapport completo di PWC. Te ainda e minister no a comparti esaki cu parlamento y solamente a duna un extracto cu segun e minister ta concerni e puntonanan mas importante. Minister a confirma na parlamento cu tin un rapport pero esaki no ta oficial pues no por comparti esaki cu Staten.
Esaki ta e cambio di ley cu awor parlamento ta tratando.
