Shamira Raphaela (32), director di short film “Deal With It” ta conta di e documentario cual e, su tata y su ruman ta forma parti di dje.
ORANJESTAD – Shamira Raphaela (32), director di short film “Deal With It” ta conta di e documentario cual e, su tata y su ruman ta forma parti di dje. Shamira ta un persona sumamente talentoso cu a biaha rond mundo como director. Den e short film aki por mira parti di su bida y locual cu e ta pasa aden cu un tata y ruman cu pa hopi aña ta den mundo di adiccion y criminalidad.
Bon Dia Aruba a sinta cu Shamira y e ta splica: “Mi a bay Colegio anto semper mi a tene mi mes ocupa cu teatro, pues ora cu mi a bay Hulanda pa studia mi a dicidi pa haci Kunstacademie. Mi a haci audiovisual art eynan anto mi a gradua cu e documental “Cu Salo Den Mi Wowo” cu a hunga aki na Aruba tambe den Cas di Cultura, esaki ta 7 aña pasa. Semper mi tabata sa cu mi kier traha un pelicula di mi famia pasobra mi tabata sa cu mi ta den un situacion extraordinario, pero prome cu mi por a trahe mi tabata sa cu mi mester ta bon para riba mi pianan. Y como director mi kier tabata suficiente desaroya pa mi por a traha e pelicula mas miho cu mi por.” Segun Shamira ta splica esaki ta e motibo cu el a dura tanto aña pa traha e pelicula. Aworaki e ta traha mas tanto na Aruba como tv director y biaha den exterior pa dirigi diferente programa, uno cu a bira hopi famoso na Merca ta Survivor cual ta haya 1.5 miyon “rating” tur siman. “Mi a traha na Africa y rond ful mundo, mi ta hopi contento.”
“Mas facil tras di camara”
Banda di sumamente contento cu tur locual e ta haciendo den su trabou el a bisa cu a yega e momento cu e mester bin cu su mesun storia. Segun Shamira esaki ta mas “eng” pasobra e ta mas facil pa ta tras di e camara y ta filma otro hende. Den e caso aki Shamira mes ta den e pelicula. El a bisa cu e experiencia ta “scary” y cu bo ta sinti hopi vulnerabel mirando cu na mes momento ta trata u storia personal hunto cu su tata, ruman y subrino. “Mi famia ta orguyoso, tur hende ta puntra mi, con bin nan kier a forma parti di e pelicula como cu mi ta mustra droga den e pelicula. Ami ta bisa cu esaki ta e realidad y esaki ta nan realidad. Mi tata a bisa cu e no por a duna mi mucho cos den bida, pues esaki ta mi regalo pa bo. E ta compronde cu pa ami e ta importante pa mi traha e pelicula, pues e semper a para cla pa esaki. El a disfruta henter e proceso.”
Bida real di personanan no visibel den sociedad
Segun e Shamira ta sigui splica, e pelicula a wordo pasa na Hulanda unda cu el a haya hopi bon “rating”. El a sigui bisa cu hende manera su tata y ruman ta hende cu no ta visibel den sociedad, hende ta wak nan manera choller of criminal, sinembargo nan ta hende su tata y ruman tambe. Locual cu Shamira ta haci cu e pelicula aki ta duna tur persona cu ta pafo di e situacion un bista den e bida real di e personanan aki, cual ta realidad di hopi rond. Hopi hende conoce un persona den situacion similar tambe y esaki ta haci’e hopi relatabel tambe.
Reto y dificultad den famia
E pelicula ta bay over pues di “distructieve familie patronen”, patronchi familiar destructivo cual lo por wordo mira den e pelicula. E pelicula ta duna speransa tambe na tur cu ta den situacion similar, cu tin un otro caminda cu por scoge cu no ta e rumbo di criminalidad a pesar di a lanta den e situacion ey. “Cos no ta blanco of preto, of bon cu malo, tin un espacio shinishi y hende ta hopi lihe pa husga bida di otro si nan no a pasa aden.”
Premionan
Cu e pelicula aki Shamira a gana “Best Feature Documentary na Belize Internacional Film Festival, Best Feature Documentary na Los Angeles den e Urban Festival. Aworaki e pelicula ta nomina na Hulanda y dentro di algun dia Shamira ta bay New Orleans unda cu e ta nomina pa Best Feature Documentary tambe, scogi como un di e 7 peliculanan for di 3400 pelicula cu nan a ricibi. Pa locual ta idioma e pelicula ta papiamento cu sub titulo, cual ta haci cu el a hunga na Havana, na Hollywood entre otro. Esaki ta mustra artistanan cu bo por bay camindanan cu bo producto na papiamento y cu e ta wordo reconoci y gusta full rond di mundo, el a termina bisando.
