E expectativa cu a wordo crea, caminda ayera decision final lo mester a cay den conseho di minister di Reino riba e leynan di Reino (Rijkswet) -cu ta contene e condicionnan di Hulanda pa duna ayudo financiero na Aruba- no a resulta di ta asina.
E tema di Aruba no a wordo inclui den agenda di e reunion di ayera na Den Haag. Mientras si e agenda tabata dirigi riba Corsou y St. Maarten. Pero den e reunion aki, Minister Plenipotenciario, Sr. Guillfred Besaril, a trece dilanti e alcance di e negociacion entre ambos partido, y tambe e sentimento cu ta biba na Aruba.
Ayera mainta, Minister Presidente, Evelyn Wever-Croes, a bisa cu den e tipo di negociacion aki no deadline. Pero tampoco esaki kiermen cu e ta un negociacion pa un tempo ilimita. Gobierno di Aruba ta sigui negosha cu su similar di Hulanda, y e deadline aki ta depende di nos rosea financiero. bisa cu den e proceso di negociacion cu Aruba ta hibando actualmente cu Hulanda, no por wordo papia di un deadline.
E mandatario a laga sa cu e rosea financiero cu ainda nos pais tin, por yega te september, pero no full e luna ey. Talbes pa paga debe di gobierno, FASE y salario di empleadonan publico, pero e no ta suficiente pa atende cu subsidio di salario di september cu ta alrededor di 36 miyon florin. Premier Wever-Croes no ta haya esaki un opcion, ya cu dificilmente otro luna, nos economia por ta uno fuerte pa atende cu e pago aki. E ta casi sigur cu gobierno lo bay tin mester di paga subsidio di salario na september.
P’esey e ta haya prudente cu prome cu pais Aruba keda “lomba contra muraya sin rosea,” e negociacion mester bin cla. E no a tribi di bisa un fecha exacto, pero eventualmente e por ta dos siman mas. Gobierno mester tin placa pa cumpli cu e hendenan cu ta traha den e sector priva cu ta esun cu mas a wordo afecta pa e coronavirus crisis aki.
E ta premira cu mirando cu e espacio cada dia ta birando menos, y ainda no a bin cambio esencial den e condicionnan cu Hulanda a bin cune, e negociacionnan lo bira mas intenso den e dianan venidero. Ya cu gobierno mester keda cla cu e negociacion, prome cu e momento yega cu gobierno mester paga e subsidio di salario di september. “E ta duna nos un par di siman…,” segun e prome mandatario.
Negociacion
E hecho cu nan ta negoshando despues cu el a bay Hulanda, e ta haya esaki un plus. Pasobra Hulanda ora cu a bin cu e landspakket su posicion pa facilita e di tres tranche di 204 miyon di ayudo financiero pa Aruba, no tabata duna espacio pa negociacion.
E mandatario a duna un splicacion riba e forma cu nan ta negoshando. El a bisa cu gobierno ta negoshando a base di e puntonan cu pais Aruba ta mira den e condicionnan cu huridicamente y financieramente, ta posibel pa negosha. Pasobra tin di nan cu no ta negoshabel. Di tur punto cu ta wordo trata den e negociacion tin algun clave y esencial den e documento, cu no ta negoshabel y cu no por wordo acepta. Nan ta condicionnan cu ta mina autonomia di gobierno di Aruba y tambe di Parlamento, segun e prome mandatario.
Pero tambe nan ta negoshando riba e feedback cu nan ta bin hayando den nan consultanan cu Parlamento, gremio comercial, sindicato y partidonan politico. Durante e negociacion nan a logra cierto cambionan te cu aworaki caba. Varios punto pendiente Hulanda tin cu consulta cu Aruba prome cu tuma decision. Esta prome cu nos ta bay di acuerdo cu henter e pakete aki.
Pa loke tabata e reunion cu Parlamento diahuebs ultimo, premier Wever-Croes a bisa cu el a pidi tur fraccion y miembro independiente pa cada un di nan bisa kico nan ta pensa di e condicionnan di Hulanda cu tin ariba mesa actualmente.
Segun e mandatario, Parlamento a rechasa loke tin riba mesa, mescos cu gobierno, cu excepcion di parlamentario Lejuez cu no tabata den e reunion. Ademas Parlamento a pidi gobierno pa sigui negosha.
E mandatario a pidi cada un di e representacion den nos organo legislativo, cu na momento cu nan no ta di acuerdo cu loke gobierno a logra negosha cu Hulanda, pa nan bin cu alternativa. No ta cuestion cu nan no ta di acuerdo gewoon –segun minister presidente- sino kico ta nan alternativanan pa yega na e placa cu pais Aruba tin mester pa atende cu e necesidadnan financiero. Mientras cu e negociacion ta continua cu Hulanda, gobierno lo sigui den dialogo cu Parlamento.
