Diahuebs riba pagina di Facebook oficial di Departamento di Asunto Economico (Deaci) por a tuma nota di un publicacion den cual e departamento ta pidi consumidornan pa tene bon cuenta na momento di haci nan compras, na unda nan ta haci esaki y kico nan ta cumpra, sobretodo e paki den cual e alimento ta bin.
“Departamento di Asunto Economico a bin ta constata cu den algun supermercadonan na Aruba, vooral den area di San Nicolas, ta haciendo e practica di bende por ehempel aros den paki mas chikito sin nomber y sin ningun informacion riba e paki. Esaki por ta pasando cu otro productonan tambe. Nos ta pidi tur consumidor pa no cumpra e productonan aki si nan no tin nomber of informacion riba e paki,” Deaci a remarca den nan publicacion.
Nan a indica cu e tipo di compra y benta di producto den pakinan asina por trece algun problema cune. E consumidor por ta cumprando e paki cu un peso di 1 kilo pero en realidad e ta haya menos y cu e metodo aki e consumidor no sa e si e cambio di paki a wordo haci den un forma higienico of no.
Nan a informa cu nan controladornan lo ta extra atento pa e practicanan aki pa e productonan di canasta basico y a haci yamada na e consumidornan pa por fabor ta atento y exigi e producto den su paki original.
E publicacion a ricibi reaccion di diferente ciudadano cu ta indica cu e tipo di benta den pakinan mas chikito sin ningun tipo informacion riba dje tin algun tempo caba ta tuma luga y cu no ta solamente ta pasa na supermercadonan, na boticanan tambe e ta tuma luga.
Den e comentarionan a destaca tambe cu e ta pasa cu tur tipo di producto, aros, hariña, cornflakes, baking powder, cuminda pa cacho, mangel y hopi mas. Mester enfatisa cu esaki ta trece peliger cune tambe ya cu no sa si e productonan cu ta wordo bendi di e manera aki ta venci of no.
