Departamento di Asunto Economico, Comercio y Industria (Deaci) a publica recientemente e perspectivanan economico pa aña 2023 y 2024. Den e publicacion aki, Deaci ta remarca cu nan ta cauteloso cu e proyeccionnan aki y por lo tanto esakinan mester ser considera preliminar.

E subida fuerte di e prijsnan di energia pa motibo di e guera na Ucrania, e lucha di empresanan di energia intensivo cu aumento den e gasto di produccion y e hogarnan mirando nan ingreso cay como resultado di e inflacion halto cu tin un gran impacto riba economianan mundial incluyendo Aruba.

Den e proyeccion aki, Deaci ta indica cu compara cu 2021 e calculacion pa 2022 ta mustra un aumento di 11.4% di e Producto Interno Bruto (GDP) den termino nominal. Ora cu compara e calculacion di 2022, esaki ta nifica un cambio di e GDP nominal di 1.4% mas halto, di 10% pa 11.4%, despues di e actualisacion di data. E GDP nominal den 2022 tabata aproximadamente 97.5% compara cu esun di 2019.

Pa aña 2023 y 2024 e balor nominal ta proyecta cu e GDP ta aumenta un 10.1% y 4.6% den comparacion cu 2022 y 2023. Ta premira cu e GDP nominal pa 2023 ta bay ta na 107.3% di e nivel di 2019, mientras cu e GDP nominal den 2024 ta bay ta 112.3% di e nivel di 2019.

Esaki, Deaci ta indica, ta nifica cu e economia local a alcansa e nivel di prome cu pandemia. Compara cu e calculacion di october di 2022, aña 2023 ta mustra un aumento di 5.6% cu ta principalmente influencia pa e inversionnan total, priva y publico, consumo total, priva y publico y e crecemento turistico proyecta.

Pa aña 2024,segun e calculacion, e GDP nominal tambe ta mustra un aumento di 4.6%. E aumento aki ta impulsa pa inversion priva, consumo publico y e proyeccion di crecemento di turismo. E aumento den e consumo publico ta relaciona cu e crecemento di inflacion cu ta impacta e gastonan di bienes y servicio pa e proximo añanan.

Den e liña base e cifra di inflacion ta pronostica di ta na 4.4% den 2023 y 3.2% den 2024. E calculacion di 2023 ta basa ariba e ultimo data di CBS, e evolucion di prijs den exterior, e caida di 7.1% den e prijs di electricidad desde mei 2023, e introduccion di aumento di 1% den BBO na januari 2023 y e efecto suave di e 7% di BBO na frontera.

Segun e FMI, e inflacion pa Aruba ta proyecta na 3.8% den 2023 y 2.4% den 2024. E sector di turismo ta keda e motor principal di e crecemento continuo desde cu e pandemia di COVID-19 a yega na 2020.

Ademas, Deaci ta agrega, den comparacion cu e calculacion na october di 2022, ta spera cu e inversion total ta aumenta cu 28.8% den 2023 cu ta impulsa principalmente pa e proyectonan grandi hotelero cu ta den construccion den e proximo añanan, locual ta impacta e inversion priva.

Adicionalmente, e aumento den e presupuesto pa inversion publico den 2023 ta pa motibo di e ahuste den 2022 realisa pa e data di inversion publico, locual a resulta den un presupuesto mas abao cu loke a presupuesta inicialmente.

Pa 2024, e pronostico ta impulsa pa e rindimento di turismo proyecta y e proyectonan di contruccion cu ta den desaroyo den e sector turistico.

Ademas di tin un liña di base, Deaci ta remarca, otro dos escenario a ser agrega tambe pa aña 2024, un escenario positivo y un escenario conservador, cu ta basa ariba e industria turistico teniendo na cuenta e desaroyonan geopolitico y su efectonan spera riba e economia global y particularmente e inflacion.