Departamento di Enseñansa conhuntamente cu Arubahuis ayera a brinda un webinar informativo na studiantenan cu ta den rumbo pa bay Hulanda unda studiantenan tambe tabatin oportunidad di haci pregunta na SVB di Hulanda y DUO directamente. Trahadonan di seccion studiefaciliteiten a menciona cu nan a ricibi mas o menos 600 peticion pa Arubalening pa studia na Hulanda e aña aki.
Durante e webinar aki, cu lo ta e prome di un serie di webinarnan cu e departamento y Arubahuis lo ofrece, a duna informacion riba e procedura cu mester sigui pa sigura cu studiantenan haya nan prestamo, pero tambe informacion riba seguro y di budgeting.
Manera ta conoci, Arubalening ta ofrece 3 tipo di lening pa studiantenan cu kier bay sigui studia na Hulanda. E prome ta consisti simplemente di e ‘startpakket’ di 15 mil florin cu ta destina pa studiantenan paga nan prome gastonan na Hulanda prime cu DUO cuminsa paga, cual ta den fin di september. E di dos ta consisti di e pagonan regular (termijn uitbetaling), cual lo yuda studiantenan paga pa bida en general y asuntonan escolar na Hulanda. E di tres ta un combinacion di ambos elemento, pues e termijn uitbetaling y e startpakket.
Durante e webinar studiantenan tabatin e posibilidad pa haci preguntanan directamente na representantenan di Arubahuis, DEA, SVB Hulanda y DUO. Asina par di studiante a logra haya poco mas claridad riba inkietudnan den nan casonan specifico encuanto nan proceso pa logra yega Hulanda y cuminsa nan estudio. Tambe a enfoca riba con ta lidia cu enseñansa den temponan di COVID-19.
Proximamente por spera webinars di tanto DEA como Arubahuis, unda lo amplia mas riba aspectonan specifico di muda pa Hulanda. Por ehempel, e varios comisionnan pa ricibi studiante (Plaatselijke Opvang Commissies) lo tene webinars riba con pa regla asuntonan practico den e ciudadnan Hulandes. Keda pendiente riba pagina di Facebook di DEA y Arubahuis of riba website ea.aw pa mas detaye.
