”Mi no ta kere e decision aki ta bay afecta e partidonan asina hopi. E comunidad LGBT ta den tur partido. Tin cu ta vota pa tur partido semper caba y no lo stop, un persona cu tin admiracion pa Evelyn Wever Croes of Xiomara Ruiz Maduro no lo bay keda sin vota pa nan decision den parlamento.”
Esaki ta e comentario di parlamentario Desiree de Sousa Croes (AVP) ora Bon Dia Aruba a puntra kico e ta pensa di e votacion diahuebs riba e amienda 7 tocante partner registra. Y specialmente cu esaki ta haci cu pareha di mesun sexo por registra tambe y haya mesun derechonan.
Sra. De Sousa Croes ta kere si cu e personanan cu a pone un punto di bista fuerte contra igualdad no lo haya mucho simpatia di e comunidad LGBT cual e ta haya logico. Mescos cu e mes no tin mucho simpatia cu e comunidad Cristian tampoco. ”Den cierto posicion cu bo tuma den bida of politica semper tin consecuencia positivo y negativo. Si esaki lo nifica cu mi lo perde persona cu tabata cristian y a vota pa mi asina e mester bay, por cierto un di personan cu a bay protesta tabata un di mi votadonan. Mi ta sigur mi no lo por conta cu su voto mas pero esey lo mi mester biba cun’e.
Mas importante ta pa a tuma un punto di bisa anto esey mi a haci. Anto e posicion cu mi a tuma ta bisa cu tur hende ta igual y a nace igual anto tin e derecho igual cual nos mester regla. Esey ta kico nos a haci awor.”
Parlamentario Melvin Tromp (AVP):
“Riba varios tema e gobierno a aki a bay over den un dialogo caminda a duna participacion na diferente organisacionnan. Mi ta kere cu por ehempel clero di Aruba mester a wordo invita pa por haya nan sentimento na kico ta nan pensamento al respeto di esey. Nos comunidad tin un porcentahe halto pa locual ta Catolico, Cristian y testigo di Jehova. Mirando con pueblo a reacciona riba henter e desaroyo aki, mi ta kere cu mester a duna participacion pa pueblo vocifera nan opinion y no pasa esaki via un amienda”, sr. Tromp ta bisa.
Esaki segun e parlamentario aki ta un discusion seguramente andando por lo menos 4 aña caba y 2 ultimo aña a bira mas fuerte. Un referendum tabata e alternativa pa pueblo den su totalidad haya un oportunidad pa vocifera si nan kier e amienda aki of no segun sr Tromp. “E ora no lo tin excuus pasobra pueblo a haya oportunidad pa vocifera anto parlamentarionan ta representantenan di pueblo. Papiando pa mi mes, mi a mira e aspecto aki un tiki mas leu pasobra a papia riba un sentencia den Union Europeo mientras cu Aruba no ta miembro di Union Europeo. Nos ta cay bao di LGO (Landen & Gebieden Overzee) y no Union Europeo, eynan e diferencia ta.”
Bon Dia Aruba kier splica si cu ciudadanonan di Aruba por acudi na Corte Europeo pa cu e tratado Europeo cu ta regla e derechonan humano.
Tabata tin basta bruhacion sr. Tromp ta continua, por ehempel riba e discusion di no por a bay over na registra bienes na notario cual tampoco tabata cuadra. ”Nos a haya un notificacion cu si bay di acuerdo cu e tratado bo por registra bo bienes na un kantoor di un notario. E diferencia di opinion aki a conduci cu ami no por a duna sosten na e amienda aki pasobra mi ta convenci cu pueblo mester a tin e ultimo palabra den esaki.”
Keda sin vota
”Mi ta contra cu un tema asina ta wordo imponi riba e comunidad sin cu ta brinda informacion riba kico e ta y kico lo ta su consecuencianan”, parlamentario Xiomara Ruiz Maduro di MEP ta conta Bon Dia.
Sra. Maduro hunto cu Guilfred Besaril, Ady Thijsen y Dangui Oduber a bandona e sala pa no vota riba e amienda.
”Ora ta trata un tema asina, mester tin espacio pa un debate sano y esey no tabata tin. Mester a trat’e den un ley separa na unda cu ta bin cu su conseho di Raad van Advies y su splicacion completo anto no via un amienda”, sra. Maduro ta bisa.
E punto bon segun e partido di oposicion ta cu a laga matrimonio un instituto pa hende homber y hende muher. Pero di otro banda no a laga hende desampara y ta regla pa nan tambe e consecuencia legal awor pa cumpli cu e derecho humano di ‘family life’ conforme locual Corte Europeo a dicta. “Hopi hende ta kere cu ta pa e amienda di Desiree nos a vota y esaki no ta asina. E votacion parti no ta usual, pero ora ta algo fundamental e ta un opcion pa vota diferente of abstene. Esaki ta locual a pasa tambe ayera den AVP y den MEP.”
Mirando un hecho cu Aruba su comunidad ta religioso, hopi no ta di acuerdo pa duna derecho na esnan homosexual. P’esey nan ta vocifera rabia asina segun e oposicion geel pero nan tambe ta ser humano y mester tene debido cuenta cu esey.
