Como parti di De Palm Tours Group y companianan, nos ta enfatisa e importancia di medio ambiente y responsabilidad civico. Asina Gerente di Mercadeo di De Palm Tours a bisa Bon Dia Aruba como reaccion riba e observacionnan haci recientemente pa fotografo di naturalesa y ambientalista Michiel Oversteegen.

Basa riba e acusacionnan y potret di Oversteegen, unda ta mustra entre otro guianan di De Palm Tours ta permiti turistanan ‘free rides’ den UTV den un area importante pa migracion y neishi di parha, a manda un serie di pregunta pa e compania.

Locual a puntra ta basa riba conservacionistanan y hasta Fundacion Parke Nacional Aruba a trece dilanti. Mas ainda, tin keho diario di habitantenan y amante di naturalesa riba e molester di UTV tours y tin casonan documenta riba perdida di flora y fauna for di area di Lighthouse te Alto Vista. Tambe, propietario di Wariruri na varios ocasion a yama atencion pa e hecho cu UTV tours ta destrui e propiedad, cu ta keda den un ruta popular. Segun e propietario, el a keha varios biaha cu guianan di entre otro De Palm tours deliberadamente ta destrui e area natural, dor di bay cu e vehiculonan riba e santo blanco y haci trikinan den e santo. El a bisa Bon Dia Aruba cu a manda potret y a entrega keho na maneho di e compania. “Pa motibo di tur e actonan aki, e santo na Wariruri awor ta mas bruin cu blanco.”

Oversteegen ademas a keha cu guianan di e compania deliberadamente ta crea mas disturbio cu stof cora cu ta nota presencia di conservacionistanan manera e. Como tal, a puntra De Palm Tours kico ta nan opinion riba e acusacionnan, kico ta nan opinion riba e balor di preserva flora y fauna. Mas ainda, a puntra con turistanan lo por goza di explora Aruba si nan ta cubri pa stof y sin tin comprension pa e kehonan di destruccion di neishi. Mas ainda si destruccionnan aki lo por conduci na perdida di animal y vegetacion.

Tambe a puntra De Palm Tours kico ta haciendo pa limita e impacto di e tournan diario di UTV riba medio ambiente y si e actividad aki ta sostenibel.

Segun Gerente di Mercadeo Lisandro Zambrano: “Nos ta reconoce e preocupacionnan. Nos ta sigura cu nos ta enfatisa e importancia di responsabilidad ambiental y social. De Palm Tours ta cumpli cu tur legislacion relevante y regulacion cu Gobierno a institui.”

Ademas, Lisandro Zambrano ta mustra cu e compania ta orguyoso di nan guianan cu ta haya training continuo y ta adecuadamente educa riba e importancia di siguridad pa cliente y tambe medio ambiente. “Nos guianan ta compronde e importancia pa compromete na medio ambiente y sostenibilidad social y lo continua pa sigui e reglanan cu e compania y Gobierno a pone.”

De Palm Tours ademas, hunto cu otro organisacionnan a traha un lista di regla y regulacion pa tournan di UTV y segun Lisandro Zambrano, ta spera cu pronto lo implementa esakinan. “De Palm Tours lo sigui contribui na economia di Aruba den un forma sigur,” Sr. Zambrano a finalisa.