Ayera ariba Facebook, un publicacion a capta atencion di varios usuario. Ta trata di un publicacion di un mucha homber cu ta sufri di problema di salud, buraco na su curason, pero lastimamente te aworaki e no a ricibi e ayudo cu e mester. Den un entrevista cu Bon Dia Aruba, Dayana Jacobs, mama di Lian, ta conta kico ta e situacion lamentable cu nan ta pasando aden aworaki.

Jacobs a splica cu Lian a nace cu un problema di curason, pues tin un buraco na su curason y desde cu nan a haya sa cu e tin e buraco na su curason, semper nan tabata bay cune pediatra y tabata pidi ayudo. Pero lamentablemente semper dokter tabata bisa cu ora Lian bira grandi e ta bay resolve riba su mes pasobra e ta ‘groei e uit’.

Pero e situacion a cuminsa empeora e aña aki. Jacobs a sigui splica cu na comienso di januari e aña aki Lian a haya su prome convulsion. Ora cu esaki a sucede mas cu claro a hiba e mucha hospital, pero na hospital dokternan a bisa cu nada ta pasando y a manda Lian cas.

E siguiente dia mainta el a bolbe haya otro convulsion pero e biaha aki el a hay’e na scol. A busc’e na scol, a hibe hospital atrobe y e biaha aki si nan a lag’e keda un dia na hospital, pero toch dokternan tabata bisa cu nan no sa door di kico e convulsion ta bin ni kico ta ocasiona e convulsionnan cu Lian ta haya.

Jacobs a sigui splica cu el a pidi e dokternan pa lag’e un dia mas pasobra e no a haya e convulsion na hospital y dokternan tabata kier pa e haya e convulsion na momento cu e ta den hospital. Nan a tuma e decision di mand’e cas back.

Algun dia a pasa cu tur cos tabata normal, pero despues di un siman, cual tabata siman pasa, Lian a bolbe haya un convulsion.

“Mi a bisa no, ta suficiente. Mi a bay dokter di cas y mi a bisa nan kico ta bay pasa, boso ta bay yuda mi si of no. E ora e dokter di cas a duna un cita, nan a manda tur info di Lian pa pediatra etc. Ayera Lian a bolbe a haya un convulsion na scol y a hib’e hospital y aworaki na hospital nan a bisa cu si nan ta bay yudele, pero mi no ta bezig ta wak cu nan ta bezig ta move. Nan a bin coy su sanger si, pero ki ora nan ta bay haci test,” Jacobs a expresa.

El a conta cu Lian ta naci na 2018 y ora cu nan a haya sa cu e tin buraco na su curason tabata 2019. Despues a bin Covid, y door di esey nan a keda hala e test, hala su cita. Segun dokternan a informa e mama, Lian mester a wak un cardiologo cu ta bin un biaha pa luna for di Corsou, pero nunca niun dokter di curason a check Lian.

Jacobs ta splica cu e pediatra cada rato cu Lian bay e ta bisa cu e ta bon, cu e ta no ta sinti nada, despues nan a bisa cu si nan ta scucha e soplo na su curason, pero apenas te aworaki cu el a cuminsa haya e convulsionnan, cu e mama a bay dokter di cas reclama, nan a cuminsa haci algo.

“Claro como mama mi ta bay drenta den panico, mi ta bay bira loco, mi ta bay flip y e ora aworaki, di siman pasa pa awe nan a yama mi y nan a duna mi un cita mañan, pero ya e convulsion a pasa awe y nos a bin hospital y actualmente nos ta den hospital,” Jacobs a indica.

Jacobs a splica cu desde cu Lian ta chikito el a pidi dokter pa mande Colombia, pero el a wordo informa cu no ta djis asina zo maar nan ta mand’e Colombia. Na momento cu Lian a haya e convulsion di dos biaha, Jacobs a bisa dokter cu su yiu ta birando cada biaha mas erg y si ta posibel pa mand’e Colombia. Pero dokter di cas a bisa cu no ta e ta dicidi, ta pediatra ta dicidi esey y te ainda nan no a tuma e decision pa mand’e Colombia.

“Hustamente ayera mi a bay wak pasashi cu tur esey pa Colombia pa mi manda Lian di mi mesun un forsa, pero e no ta husto, pakico nos tin AZV e ora? E no ta make sense,” el a expresa.

Jacobs no a bay AZV ainda, pero aworaki, mirando e situacion, el a bisa cu e ta caba di handle cu tur cos na hospital pa e bay personalmente na AZV pa wak pakico ainda no por manda su yiu Colombia.

“Mi no por sigui asina cu mi yiu ta keda bira malo y mi no ta haya ayudo. For di 2019 cu bo sa cu e tin un buraco na su curason, pa 2024, ta cinco aña caba, kico boso ta warda pa mand’e Colombia?,” el a cuestiona.

Jacobs ta un mama soltera y pa e manda su yiu Colombia y cubri tur gasto ta bay ta duro pe. Ya caba el a cuminsa haya ayudo for di su famia y amistadnan cu a cuminsa comparti su storia ariba Facebook pa asina purba yuda lo mas cu por pa logra e meta di manda Lian Colombia pa mehora su salud.

“Tur cu por ofrece ayudo cu ta bin di nan curason, tur cos cu ta bin di curason ta mas cu bon bini. Mi amiga a pone riba Facebook number di cuenta di banco, informacion pa esnan cu lo kier yuda Lian yega Colombia. Si kier duna mi algo personal tambe ta posibel. Tur cos ta welcome,” el a expresa.

Por ultimo, Jacobs ta remarca cu e ta pasando den e situacion, pero e sa cu e no ta e unico cu ta pasando den algo asina. “AZV tin cu cuminsa drecha nan manera pasobra imagina bo no ta cu mi so e ta pasa, e ta pasa cu hopi hende mas. E no ta leuk cu nos tin AZV pero ta tanto bal pasobra nan no ta bezig ta yuda cu letterlijk nada. Ami ta bisa flat, nan ta laga di desea,” el a finalisa.