David Kock: mester planifica ki producto agrario cu realmente Aruba por produci

Seguridad di cuminda no ta algo cu Aruba por logra a corto plaso

El a bira hopi cla na 2020 cu Aruba ta depende hopi riba importacion di cuminda y cu cualkier crisis lo por dificulta acceso na e fuentenan di cuminda. Esey ta motibo pakico ta buscando forma pa Aruba ta menos dependiente di importacion.

Pero David Kock di Cunucu Aruba Dushi Tera kier pa tur hende puntra nan mes si berdad Aruba tin e posibilidad di sobrevivi sin importacion. Kock, conoci como abogado tin 12 aña ta trahando pa lanta un empresa agrario cu por produci continuamente, algo cu ta rekeri hopi tempo y inversion. Inversion cu sin su bufete, e lo no por a paga sin mas.

Un di e retonan cu Kock ta señala ta e falta di tereno. “Si 30 porciento di nos area ta destina pa Parke Nacional Arikok, y e otronan ta pa Vivienda, mester ta realistico pa bisa kico lo por haci of no. Mi no ta experto, pero mi ta duda cu tin e espacio pa logra locual Gobierno y e ciudadano local kier.”

Vertical farming

E Minister di Sector Primario anterior Cris Romero a papia hopi di vertical farming, esta plantacion cu ta haci uzo di torennan. Pero nunca a yega na nada concreto. Pero, Aruba tin experiencia caba cu plantacion alternativo, manera Agroco of hasta na Fontein. “Ambos a desaparece. Nos no por come lechuga, tomati y promenton tur dia. Vertical farming no por produci mango, anasa of otro producto. Ta pensa hopi facil riba kico lo por.” Si tuma anasa mes, e ta tuma un aña pa cosecha. Hasta si planta pa cosecha mil aki un aña, e supermercado lo no kier mil den un solo tiro, sino un par di anasa tur dia. Si e productor di anasa no por cumpli cu e demanda ey, no tin sentido. Den otro palabra, mester sa con pa planea y tin rosea largo.

“Ta henter un planificacion di produccion. Pero kico ta sosode na Aruba, ta cu ta planta un producto, ban bisa tomati, y denter di algun luna tin un cantidad di tomati. Pero no por bende tur un solo momento. Y e pedida pa tomati ta tur dia. Pues mester di un planificacion, un proceso di produccion. E supermercado mester tin su garantia cu e tin su tomati. Compra ta garantisa e supermercado tur siman tanto caha di tomati. Si un productor local no por cumpli, dificilmente e lo haya benta pa un solo produccion grandi cada tanto tempo.

Chickenfarm

Mas y mas hende ta bayendo den produccion di webo y Kock a tuma nota di esey tambe. “Loke nos ta mira na Aruba cu ora cu ta nota cu algo ta exitoso, yen di hende kier haci mescos cu na final ta pone cu ningun ta exitoso. Mi ta kere cu pasobra hende ta kere cu ta djis e asunto di cumpra puyito, y kere cu denter di tanto tempo e tin webo pa bende. Na 2020 a mira cu prijs di webo na nivel internacional a subi, y a kere cu e ta un bon negoshi. Pero mercado a bolbe cambia pasobra prijs di webo na nivel internacional a bolbe cay.”

Den otro palabra si no planifica e industria di produccion di webo na Aruba ta crea desrupcion y hopi hende lo por perde hopi inversion. “Si awor ta trece lote di galiña cu ta cuminza pone aki cinco luna, pero aki un aña a stop di pone webo, si no tin henter un proceso na su luga, ta bay haya bo mes cu un rato tin webo pa bende, y otro rato no. Un cumprado, un supermercado no por sostene riba esey. Eseynan ta asuntonan cu ta hunga un papel. Cu nos tin un mercado, no ta e discusion. Nos tin un populacion, nos tin un populacion di turismo cu mester di consumo. Pero ta un consumo di tur dia, y no pa temporada. E ta posibel pa lanta produccion na Aruba, pero unicamente cu ‘kleine boertjes,’ cu ta nifica cu en bes di importa 100 porciento, lo mester importa 95 porciento.” David Kock ta bisa cu tur esfuerso ta conta. Si esey ta e meta ta bon. Pero pa logra siguridad di cuminda mes, e ta hopi duro. E ta rekeri pa haci inversionnan grandi pa hasta pensa pa bay den e direccion ey, ademas cu no ta duna resultado necesario ni mesora.

Ehempel di mango

Por ehempel, e clima di Aruba ta bon pa mango. Pero prome cu por haya produccion di mango, lo mester inverti den tereno, den e mata y warda tres a cuater aña por lo menos pa cuminza haya e fruta. “Bisa un empresario pa cuminza un negoshi cu kizas aki cuater aña, si e mata a keda na bida, e por cuminza bende? Bo ta compronde cu no tin hopi entusiasmo pa esey. Cuanto hende por wanta cuater aña sin entrada.”

Den otro palabra, Aruba lo por kier haya siguridad den cuminda y si realmente esey ta e meta, e ta rekeri hopi planificacion, inversion y conocemento pa cuminza pone e base pa aki un par di aña lo por mira si a logra.

“E ta importante pa traha riba conocemento, busca colaboracion den exterior pa traha riba esey. Hasta si tin e placa, sin conocemento e no ta bay. Y cuminza enfoca riba algun producto specifico,” Kock a bisa. “Si papia di agricultura, e ta hopi amplio. Determina kico por crece aki. Y pa loke ta cuminda, nos pais ta rondona pa awa y toch ta importa pisca. Lo por considera ‘fishfarming,’ pa asina por cumpli cu demanda local. Pero e ora ta enfoca riba un aspecto. Pasobra si mester papia di mango te na patia, di porco te na baca, e ta mucho amplio pa haci’e den un solo biaha. Scoge un, dos, tres producto y enfoca kico kier ta exitoso. Y despues por wak cua producto por bin acerca,” ta e conseho di e agricultor na e Gobierno nobo.