Despues di trata di yega na un areglo pa expresionnan considera como difamatorio, conocido artista Claudius Philips a dicidi di haci su nomber limpi via di corte cu un caso sumario pa pidi rectificacion di Sr. Daury Rodriguez, cu ta acusa Sr. Philips via medionan social [post di Facebook] pa ta un pedofiel. Hues lo dicidi riba 10 augustus 2022 riba sentencia di e caso.

“13 aña pasa mi a haci un fout, mi a haya mi taakstraf y mi a haci e, anto mi a purba sigui cu mi bida. Mi ta kere mi tin derecho di dje,” cantante Claudius Philips a expresa. Corte di Husticia a trata caso sumario di Claudius Philips contra Daury Rodriguez relaciona cu e acusacion di Sr. Rodriguez via un post di Facebook unda ta acusa Sr. Phillips di ta un pedofiel.

Abogado na defensa di Sr. Philips ta haya cu acusacionnan di Sr. Rodriguez ta sin base, ta pidi pa rectifica pasobra no tin ningun prueba cu Sr. Philips a abusa di mucha y cu no tin palabracion cu e ta un pedofiel. Practicamente Sr. Rodriguez mester bisa pakico e ta haya cu Sr. Philips ta un pedofiel. “Si abo ta acusa un hende sin prueba, bo tin cu rectifica. Nos ta haya cu el a bin cu cierto “prueba” cu un video di un hende cu supuestamente a haci un denuncia contra Sr. Philips pero Sr. Philips no sa nada di e denuncia aki, ningun nomber a wordo duna, e ta un video cu ken cu ta por a traha anto tilda hende di algo cu no tin ningun otro prueba substancial di dje pa mustra cu Sr. Philips a abusa di mucha,” segun abogado Mohamed a declara pafo di corte. “Mi no sa ken e persona aki ta den e video, mi no por wak e,” segun Sr. Philips. Sr. Philips ta para fuerte di no a mishi cu ningun mucha y p’esey a entama e caso sumario aki contra Sr. Rodriguez.”

‘No tin nada pa rectifica’
Na su turno, Sr. Rodriguez ta bisa cu mester para keto un rato riba e cantidad di caso di abuso y denuncianan haci contra Sr. Philips, cu si mester papia di caso, no ta trata di un cos so. Ademas di esaki, Sr. Rodriguez ta agrega cu “tin hopi cos pasando pa hopi tempo caba riba nos , pero e miedo di e victimanan pa sali bin dilanti ta locual tin henter e cos aki cera, cu ningun hende tin gana di bin dilanti.” Sr. Rodriguez ta haya cu no tin nada pa rectifica pasobra den e vonnis di un caso anterior di Sr. Philips ta para cu ta condena di tin ‘kinderporno’ den su posesion. “E cosnan aki ta haci bo un pedofiel. Bo kier tapa solo cu un dede pa proteha bo imagen cu bo ta un guy den farandula y respeta supuestamente. Pero e ta lubida cu ora e wak un victima, wak kico ta pasando, e ta haya mas gana y forsa pa bin dilanti, y esey ta loke ta pasando aworaki.”

Sr. Rodriguez ta bisa cu hopi victima tin miedo y loke e ta haciendo ta netamente pa para pa e victimanan aki cu a keda añas den silencio y no por bin dilanti pasobra e intimidacion ta grandi, y toch no lo kere nan pasobra tin hopi mas hende ta para tras di Sr. Philips, pasobra e ta un artista popular etc.

 

E grupo ‘Ta Basta’ tambe tin su opinion tocante e caso aki, cu sigur ta hala nan atencion como esnan cu ta para pa derechonan di victimanan cu a sufri di abuso sexual. Algun dia atras, Ta Basta a publica riba nan Facebook un post unda ta puntra comunidad den general ‘si un persona tin pornografia di menor di edad den su poder, esaki ta considera di ta un pedofiel si of no?’ Por a tuma nota di varios reaccion di comunidad riba e publicacion aki unda ta lantando un dialogo den pueblo tocante e tematica aki.

Den e 2 aña cu Ta Basta a bin ta bringa e fenomeno aki, nan ta bisa di ta ripara of haya e impresion cu na Aruba ta depende di ‘ken bo ta’ y ‘ken bo conoce’ pa husticia actua debidamente. Den un siguiente publicacion, Bon Dia lo trata e reaccion di e grupo aki riba e caso sumario cu hues lo declara su sentencia 10 di Augustus proximo manera menciona.