Den un comunicado di prensa, Departamento di Salud Publico a informa comunidad cu for di cuminsamento di juli 2021 cu e variante Delta a haci su entrada na Aruba, e variante aki a cuminsa plama hopi lihe loke a causa un preocupacion ora el a plama causando un brote grandi di casonan di COVID-19.

E variante Delta a wordo categorisa como un variante mas contagioso compara cu otro variantenan y esaki nos por a experencia tambe na Aruba ora di haci comparacion cu e brotenan anterior di COVID-19.

Nan a duna di conoce cu te cu dia 12 di september 2021, na Aruba tin un total di 70.105 (75%) asegurado di AZV riba 12 aña cu si a vacuna y 23.668 (25%) asegurado di AZV cu no a vacuna.

Igualmente Departamento di Salud Publico ta destaca cu e informacion aki ta hopi importante pa analisa, nan a trece dilanti cu di e 70.105 (75%) cu si a vacuna, 8 persona a fayece relaciona cu COVID; y di 23.668 (25%) cu no a vacuna, 39 persona a fayece for di cuminsamento di juli te cu dia 12 di september.

Nan ta recapitula tur data for di 1 juli 2021 te cu 12 di september 2021, na unda cu nan por conclui cu pa cada 10.000 ciudadano cu no a vacuna, 16 a fayece relaciona cu COVID-19; y pa cada 10.000 ciudadano cu si a vacuna, 1 persona a fayece relaciona cu COVID.

Nan ta expresa cu e analisis aki ta basa riba cifranan di asegurado di AZV, e rason pakico nan ta usa e cifranan di AZV pa e analisis aki ta pa motibo cu e cifranan registra ta logra un analisis cu un resultado real y confiabel. E cifranan aki no ta inclui hende indocumenta of studiante di afo cu a vacuna of cu por vacuna ya cu aki no tin exactitud y e medicion lo bira un calculacion proyecta.

Pa medio di analisis continuo, Departamento di Salud Publico ta sigui evalua y dirigi su maneho di vacunacion cu ta demostrando di ta hopi efectivo den scapa bida di e ciudadanonan.

Di otro banda, hopi cos ta wordo bisa tocante vacunacion pa muchanan na unda cu dialuna ultimo companianan Pfizer y BioNTech a revela cu su vacuna pa covid-19 a resulta sigur y a genera un contesta di anticuerpo “fuerte” den muchanan di 5 te cu 11 aña, segun datonan di un ensayo di fase 2/3.

Despues di e anuncio aki, algun mayornan a cuminsa warda e dia cu nan yiu por wordo inscribi pa por haya e vacuna contra covid-19, pero tin varios paso cu mester haci prome: e prome ta cu Pfizer tin cu solicita autorisacion di uso di emergencia na FDA (Food and Drug Administration di Merca) pa e grupo di edad aki (muchanan di 5 pa 11 aña).

“E compania tin cu presenta un solicitud di modificacion di su autorisacion di uso di emergencia pa inclui e poblacion adicional” un vocero di FDA a bisa na CNN.

E ensayo 2/3 di Pfizer y BioNTech a inclui 2.268 mucha entre 5 y 11 aña y a consisti den un regimen di dos dosis di e vacuna cu 21 dia di diferencia entre cada un di nan. Den ensayo aki a wordo utilisa un dosis di 10 microgram di e vacuna, un tiki menos cu e dosis di 30 microgram cu ta wordo usa actualmente pa personanan di mas di 12 aña. Dialuna Pfizer a sigura cu lo presenta su solicitud na FDA den proximo dianan.

Di dos paso ta cu FDA mester modifica e autorisacion di uso di emergencia di vacuna pa inclui esunnan mas hoben, na luna di augustus ultimo FDA a duna e aprobacion completo pa e vacuna contra covid-19 pa hobennan di 16 aña bay ariba.

Un bes cu FDA lo tuma su decision riba e autorisacion di e vacuna pa e grupo di muchanan di 5 pa 11 aña, Central for Disease Control and Prevention (CDC) di Merca lo reuni pa debati recomendacionnan clinico nobo riba e vacuna.

Mientras tanto, Pfizer ta enfoca pa sigui suministra e vacuna pa esunnan cu na e momentonan aki ta eligibel pa haya e hangua, “Pfizer y BioNTech ta sigui suministra e vacuna, den virtud di loke gobierno di Merca a acorda, cu lo sigui te april di aña 2022. Despues di introduci di e di dos dosis di refuerso na Merca y cu aprobacion di edadnan nobo, e acuerdonan di suministro cu ta existi caba di Pfizer y BioNTech tin cu gobiernonan di henter mundo y cu organisacionnan internacional di salud no lo wordo afecta”, un declaracion di nan a sigura.

“E companianan lo sigui cumpli su promesa di suministra 2.000 miyon dosis na paisnan di poco y mediano recurso na 2021 y na 2022, 1.000 miyon dosis pa aña”, nan a agrega.

Despues cu CDC y FDA lo duna su permiso, lo por cuminsa cu e distribucion di e vacuna pa muchanan mas chikito, aunke hopi adulto a vacuna na diferente punto di vacunacion masivo for di comienso, ora a vacuna esunnan di 12 pa 15 aña tabata diferente, pa esaki e atencion a centralisa den boticanan y dokternan di cas, ta probabel cu esey tambe lo sucede cu e muchanan mas chikito.

Ora a autorisa e vacuna pa muchanan entre 12 pa 15 aña na mey, funcionarionan di salud di estado na Merca a menciona cu esey tabata “miho di loke nan a spera” y a wordo reserva afspraak hopi lihe. Sinembargo, e vacuna entre adolescente no tabatin e mesun ritmo, y e casonan entre muchanan a aumenta den ultimo simannan.

Di mesun manera, tampoco nan ta espera cu esaki lo ta e ultimo grupo cu lo ta bay pasa pa un proceso di autorisacion, ainda nan ta buscando resultado pa babynan, dialuna ultimo Pfizer a señala cu nan ta warda datonan riba babynan te hasta 6 luna.

Vacunanan Moderna y Johnson & Johnson ta esunnan autorisa pa personanan mayor di 18 aña, pero awor tambe ta studiando den edadnan mas trempan.