Ayera, Departamento di Salubridad Publico DVG a duna un resumen di e datonan riba e desaroyonan di pandemia di coronavirus, den cual a comenta cu e datonan mas recien ta duna un indicacion di un aumento continuo di casonan nobo, cu un averahe semanal di 42 caso pa dia.

Ademas DVG a informa cu e averahe semanal di tasa di positividad ta actualmente 21 porciento pa dia. E tasa di positividad ta indica e cantidad di caso positivo entre tur test realisa den e periodo en cuestion.

Segun e resumen di DVG ayera, tabatin un total di 63 caso nobo di COVID-19 a keda registra. Di esakinan, 13 ta turista y 50 ta residente. E cifranan aki ta representa un tasa di positividad (‘positivity rate’) entre nos residentenan di 23%. Di e 13 turista, 4 a test na salida for di Aruba y 9 durante nan estadia riba Aruba.

E cantidad di casonan activo di COVID-19 pa ayera tabata 349. Lamentablemente, e cantidad di fayecido relaciona cu Covid-19 a aumenta cu un persona no residente, y e total ta na 110.

Ademas, DVG a indica cu na Hospital Dr. Horacio Oduber tin 9 persona interna. Den esakinan, e ta den Unidad di Cuido Intensivo ICU – dos di nan como caso activo y un di nan como caso inactivo. Riba piso general tin seis persona interna, di cual cuatro ta caso activo y dos ta caso inactivo.

Pa loke ta e 50 casonan nobo entre residentenan di Aruba ayera, DVG a informa cu 31 di e personanan aki no ta vacuna, 5 ta vacuna cu e prome dosis di e vacuna y 13 ta vacuna cu tur dos dosis. Cu entrada di e variante Delta ta tuma nota cu e cifranan di esnan vacuna cu 1 of 2 dosis cu ta keda infecta cu Covid a aumenta poco, pero e grupo mas afecta ta esnan cu no a vacuna. E cifra di esnan no vacuna ta dobel mas halto compara cu esnan vacuna, segun DVG a indica.

Biaheronan desde merca mester haci test

Mientras tanto, durante conferencia di Prensa diahuebs atardi, Prome Minister Evelyn Wever-Croes hunto cu Ronella Croes di ATA y Sharline Koolman di DVG a duna un relato di e situacion di Covid-19 na Aruba y a anuncia e cambionan di maneho cu lo bin na vigor entrante diadomingo 1 di augustus, 2021.

E prome cambio ta trata e testmento pa biaheronan cu ta drenta nos pais desde Merca, e test di Covid ta bira obligatorio irespecto si e persona ta vacuna. Esaki considerando cu mescos cu Hulanda y Colombia entre otro paisnan, Merca ta wordo considera como un pais di ‘High

Risk”. E di dos cambio ta e seguro di Covid. Esaki ta bira pa bishitante adulto, $15 pa henter e estadia y pa muchanan ta gratis.

Prome Minister a accentua cu a pesar cu e casonan positivo ta subiendo, Gobierno di Aruba ainda lo no implementa medidanan severo pero si ta pidi tur ciudadano pa sigui cuida.

“E situacion na Hospital ta stabiel. Tin 9 hende interna di cual 2 ta den ICU dus mester tene cuenta cu esaki”, Prome Minister a duna di conoce.

Por tuma nota cu e cifranan pa cu Covid ta subiendo. E cifranan di diahuebs ta mustra cu e casonan activo a subi na 349.E suma aki a redobla den e ultimo 4 pa 5 dianan y esaki ta motibo cu Gobierno ta alerta y preocupa pa cu e situacion aki. E averahe pa dia ta riba 30 y esaki ta halto tambe siendo cu un siman pasa e tabata na 15-16. Esaki tambe a redobla.

E situacion di Aruba compara cu Corsou e siman aki a cambia. Siman pasa e tabata diferente pasobra e casonan na Aruba no tabata creciendo asina tanto y Corsou a yega na un plateau.

Aworaki na Corsou e situacion a stabilisa pero na Aruba si e cifranan ta bayendo halto.

“Esaki ta pa nos realisa cu si nos no frena e desaroyo aki, nos lo end up igual cu Corsou riba 600 caso y nos no kier esey, nos kier evita esaki.”