Segun veterinario Irene Croes, kende ta atendiendo e problematica di kill cage, e plan cu conseho di minister a aproba ta uno multidisciplinario y ta inclui e uzo di tecnologia microchip cu fundacionnan manera Stimami Sterilisami ta uzando caba pa preveni cu nan ta pone cachonan drumi innecesariamente.

Den un comunicado manda pa gobierno, Croes ta conta cu e problematica di kill cage, cual a duna Aruba hopi mal prensa den exterior, tin como raiz e doño cu ta neglisha su mascota. “Si no tawatin doño iresponsabel, no lo tawatin e necesidad pa tin e facilidad cu a haya e nomber di ‘kill cage / afmaakhok’ cu ta existi pa mas cu 40 aña caba. E t’ey pa haci e bida mas facil pa e hendenan cu kier bay laga nan mascota cu nan no ta desea mas atras pa gobierno pone nan drumi. No ta e cacho of pushi ta bay di nan propio boluntad den e luga ey. Ta e doño mes ta hiba nan y hinca nan eyden ora nan no kier e mas.”

Ademas Croes ta haya cu si no tawatin doño iresponsabel, no lo tawata necesario pa introduci e ley di cacho na Aruba cu a bay na vigor 1-1-2015 pa atende cu doñonan cu no ta tene nan cachonan den cura, cu consecuencia cu e cachonan aki por ataca hende of otro bestia, y hasta, esun nan cu no ta capa of sterilisa por reproduci, y asina añadi mas na e cantidad di cachonan cu ya ta biba riba caya y cu auto por dal of cu ta wordo hiba kill cage.

Pues asina ta yega na e plan cu a keda aproba pa conseho di minister. E plan ta uno cu ta rekeri atencion multidisciplinario for di diferente ministerio. E ta parti den accionnan cu tin di tuma luga inmediatamente y accionnan den corto y largo plaso. Lo ta e prome biaha cu gobierno hunto cu NGOs ta bay atende ampliamente cu e problematica aki. Awor cu e plan ta aproba den conseho di minister, tur stakeholders lo wordo informa di e plan, y un peticion lo wordo haci riba nan pa, si nan por identifica nan mes cu e plan, nan involucra nan mes den e plan na un manera of otro pa hunto nos yega na un solucion berdadero pa e problema.

“Awo cu e plan ta aproba trabounan ta bay cuminsa pa realisa e metanan. No por spera cu awe a anuncia cu e plan ta aproba, y ya su mañan tur cos ta cla pa e plan completo wordo ehecuta. No. Hunto cu mi colega Dellanire Maduro, nos ta trahando duru pa realisa e metanan y poco poco nos ta hayando mas hende pa yuda nos. Awo ta bay cuminsa cu locual tin di sosode inmediatamente”, Veterinario Croes a indica.

Kill cage ta haya nomber tentativo: ‘Dog act shelter’

Cambio di e kill cage den un ‘dog act shelter’ cu ainda mester haya un nomber apropia, ta un di e prome pasonan. Cu esaki ta e prome biaha cu e cachonan ta haya e derecho di keda 3-10 dia wardando nan doño bin reclama nan, manera ta prescribi den e ley cu ta na vigor pa 5 aña y mei caba: e hondenverordening/dog act/ley di cacho. E cachonan cu no wordo reclama por wordo adopta y si esey tampoco sosode, lo wordo poni drumi door di profesionalnan riba e tereno aki. Asina ta elimina e ‘kill cage’ di su funcion y su imagen cu a causa hopi publicidad negativo pa Aruba (mata sin cu e doño cu a hiba nan eyden ta worry, y sin cu e animalnan ta haya e chens manera ley ta stipula). Por lo pronto lo referi na e luga como e ‘dog act shelter’.

Database pa cacho: acceso pa gobierno y NGOs

Alabes, un database central ta bay wordo diseña, pa por fungi como un plataforma di comunicacion, pa por reuni e cachonan cu a wordo haya riba caya, cu nan doño. Y tambe pa avisa tur NGO’s di un posibel candidato pa wordo adopta si en caso nan no wordo reclama.

Asina aki ta preveni tambe cu cachonan cu a wordo sterilisa y a wordo poni (bek) riba caya via programanan manera MASH of Stimami Sterilisami, wordo poni drumi innecesariamente, si en caso e cacho wordo treci na e dog act shelter aki. Dicon? Door cu tur e cacho cu a wordo sterilisa via e programanan aki, a haya un microchip na momento di wordo opera. Tur cacho cu yega e ‘dog act shelter’ lo wordo gescan y gecheck den e database di e dog act shelter, y asina e organisacion cu a yuda sterilisa e cacho por busca e cacho y pone bek den e bario cu e ta pertenece cu un ID mas cla pa no bolbe wordo piki for di riba caya, of e organisacion cu a yuda sterilisa e cacho lo mester busca un miho doño pe.