Diabierna 30 di juni lo publica e database historico di Aruba: sclavitud y emancipacion, 1840-1863 hunto cu documento tocante e ultimo 25 añanan di sclavitud na Aruba.
Pa e database a uza un cantidad grandi di diferente fuente di archivo manera: e registro di Emancipacion di 1863, lista di persona sclavisa, registro di nacemento y fayecimento di persona sclavisa, peticion y acta di notaris cu informacion tocante bendemento y cumpramento, traspaso y manumision di persona sclavisa. E database lo ta disponibel riba e website di Coleccion Aruba www.coleccion.aw/busca/persona y e website di Archivo Nacional na Den Haag.
Meta di e database
E database di Aruba: sclavitud y emancipacion, 1840-1863 ta haci posibel pa sigui e personanan sclavisa na Aruba entre aña 1840 y 1863. Tambe ta posibel pa hende busca e fam cu nan antepasadonan a ricibi na final di e epoca di sclavitud, cu ayudo di e database por sigui busca bek den e pasado di sclavitud di nan famia. Archivo Nacional Aruba ta spera cu e publicacion di e database aki lo yuda riba e discusion social na Aruba tocante e propio pasado di sclavitud. E database lo ta importante tambe pa enseñansa y cultura di Aruba.
Origen di e database
E plan di e database di Aruba: sclavitud y emancipacion, 1840-1863 a surgi na november 2022 durante un deliberacion entre e archivarionan di ANA, esta Raymond Hernandez y Edric Croes hunto cu Coen van Galen di Radboud Universiteit y lider di proyecto di e database historico di Surinam y di Caribe (HDSC). Na principio HDSC a publica e registro di esclavo di Surinam y Corsou online. Un publicacion asina no lo tabata posibel na Aruba teniendo na cuenta cu no por a haya e registro di esclavo. Pa e motibo aki a dicidi di reconstrui e poblacion sclavisa pa medio di un serie di fuente di archivo. Cu por a termina esaki den 6 luna ta danki na e empleadonan di archivo sr. Johny van Eerden y sra. Rosa M. Arends, kende a transcribi algun registro di prome caba y Wouter Raaijmakers y Matthias Rosenbaum-Feldbrügge di HDSC cu a hinca e database den otro.
