(AP) – Un di e cosnan cu a resalta di e data lihe y detaya cu Tesla a colecta di e chauffeur di un di e Cybertrucknan cu a explota na Las Vegas anteriormente e siman aki ta cu bo auto ta vigila’bo.
Expertonan di privacidad di data ta bisa cu e data colecta pa Elon Musk su compania tabata impresionante, sinembargo tambe ta pone atencion riba un pregunta dificil mientras vehiculonan ta bira cada biaha menos manera auto y mas manera computer riba taira.
“Posiblemente bo kier pa autoridadnan tin e data pa por yega na criminalnan, pero ken cu ta por tin acceso na esaki?” Jodi Daniels, CEO di e firma di consulta di privacidad Red Clover Advisors a puntra. “Unda bo ta pone e limite?”
Varios di e vehiculonan recien sa unda bo a bay y unda bo ta bayendo, pero tambe tin acceso na bo contactonan, bo record di yamadanan, bo mensahenan di texto y otro informacion sensitivo danki na conexion cu bo celular. E data colecta pa Elon Musk su vehiculo electrico despues cu e Cybertruck yen di klapchi a explota dilanti Trump International Hotel diaranson a comproba di ta valioso den yuda reconstrui e chauffeur su movecionnan.
Dentro di oranan despues di e explosion durante Aña Nobo, unda e chauffeur a kima asina hopi cu no por a reconoce esaki – y a laga 7 persona herida – Tesla tabata por a yega na Matthew Livelsberger su movecionnan den gran detaye for di Denver te Las Vegas y tambe a confirma cu e problema tabata e klapchi den e truck, no e truck mes. Tesla a usa data cu a colecta di stacionnan di charge y software di e vehiculo.
“Mi tin cu duna danki na Elon Musk, specificamente,” Las Vegas Metropolitan Police Department Sheriff Kevin McMahill a bisa reporteronan. “El a duna nos hopi informacion adicional.”
Algun experto di privacidad tabata menos emociona cu esaki.
“E ta revela e tipo di vigilancia cu ta andando,” David Choffnes, director ehecutivo di Cybersecurity and Privacy Institute na Northeastern University na Boston a comenta. “Ora cu algo malo pasa, e ta util, pero e ta un spada cu ta skerpi di tur dos banda. Companianan cu ta colecta e tipo di data aki por abusa di dje.”
Por ehempel, General Motors, a ricibi un demanda den su contra den augustus pa procurador general di Texas pa supuesto benta di data di 1.8 miyon chauffeur na companianan di seguro sin nan consentimento.
Vehiculonan ekipa cu camara pa permiti funcionnan di maneho automatisa a agrega un riesgo nobo di seguridad. Tesla mes a ricibi critica despues cu Reuters a reporta con empleadonan di 2019 te cu 2022 a comparti video sensitivo di e chauffernan y grabacionnan cu otro, incluyendo videonan di incidente di rabia riba caya y den un di e casonan, desnudes.
Tesla no a responde na preguntanan tocante su politica di privacidad. Riba su website, Tesla ta bisa cu e ta sigui reglanan estricto pa mantene nombernan y informacionnan priva.
“Ningun hende mas cu abo mester tin conocemento di bo actividadnan, paradero of un historial di unda bo a yega di bay,” un declaracion a splica. “Bo informacion ta manteni priva y sigur.”
Analista di auto Sam Abuelsamid na Telemetry Insight, a bisa cu e no ta kere cu Tesla ta “specialmente pio” cu otro companianan di auto den maneha data di cliente, pero toch e tin preocupacion. “Esaki ta un di e problemanan etico mas grandi cu nos tin rond di vehiculonan moderno. Nan ta conecta,” el a bisa. “Consumidor tin mester di control riba nan data.”
