Diabierna mainta durante conferencia di prensa Departamento di Asunto Social (DAS) a anuncia oficialmente digitalisacion di nan servicio di bijstand. Sra. Jesseline Kelly, PR di DAS a elabora ariba kico e cambio nobo aki kiermen pa e clientenan di DAS y con e proceso pa aplica pa bijstand di awo pa dilanti tin cu bay.

Sra. Kelly a splica cu despues di un aña y mey di a cuminsa cu e proyecto aki cu el bisa COVID a pusha nan mas y mas den e direccion digital, nan a tuma e decision di cuminsa digital cu nan servicionan pa facilita y brinda un miho servicio na e comunidad di Aruba

“Como Sociale Zaken nos ta hopi orguyoso di anuncia cu nos ta bay aworaki digital cu nos clientenan y bijstand”, Kelly a expresa.

Nan ta cuminsa cu e servicio mas grandi di e departamento cu ta e servicio di bijstand, pero Kelly a remarca cu e meta ta pa den futuro nan por sigui digitalisa tur nan otro servicionan tambe cu nan ta brinda y asina tur hende via nan website por aplica pa un ayudo pa un of mas di nan servicionan.

El a conta cu na 2020 caba DAS kier a lansa su website nobo, pero lamentablemente pa motibo di ovid esey a wordo poni un banda. Despues bijstand a bin riba agenda y e website a wordo pusha un banda. “Awe mainta e ta eigenlijk dos den uno pasobra nos ta menciona nos website caminda tur hende por haya hopi informacion di tur nos servicionan y ken departamento di asunto social ta y via e website ey e ta bay link bo pa e lokket social di bijstand”, el a agrgea.

Kelly a menciona cu pa personanan cu no tin acceso na un computer, tablet of laptop, of simplemente tin dificultad cu tecnologia, tin un kiosk disponibel na DAS Eagle y DAS San Nicolas, unda cu tin lessenaar y computer cu internet disponibel pa e cliente. Cu guia di un trahado di DAS, e cliente mes ta aplica pa bijstand. Pero el a enfatisa cu nan no kier propaganda esey, nan kier enfoca ariba e cliente mes haci su peticion independientemente for di su hogar.

El a elabora ariba e proceso di aplicacion y a splica cu e proceso en si no ta dificil, pero e formulario si ta extenso y mester yena tur informacion pa por entrega e formulario na final. El a remarca cu na momento cuminsa e aplicacion ta hopi importante pa tin cierto documentonan na man. Aunke tin posibilidad di entrega cierto documentonan personalmente, pero pa e proceso bay mas lihe Kelly ta subraya cu ta miho pa entrega e papelnan necesario di un of otro forma posibel digitalmente.

E loket digital ta ofrece diferente servicio, por aplica pa bijstand, por haci peticion pa aumento, por haci notificacion di cambio y tin diferente formularionan y cartanan disponibel pa e cliente por descarga.

“Esaki ta nobo pa e comunidad, pero e ta nobo pa nos departamento tambe. Nos ta bay drenta den un fase cu nos ta lans’e, pero den transcurso di e simannan nos dilanti por bin cambio, por bin erronan chikito, nos ta purba di haciele mas perfecto cu por pero esey nunca ta posibel. Nos ta consciente cu lo por tin algun fout cu nos lo ta drechando segun nos ta bayendo y nos ta activo cu e loket digital aki”, Kelly a agrega.

Kelly a indica cu e cambio nobo aki ta exigi responsabilidad di ambos partido, tanto e departamento como e cliente. “Mi ta pone enfasis ariba e responsabilidad di cada cliente. Nos a drenta un fase di test, nos ta bay encontra erornan, nos ta bay encontra mas pregunta y DAS ta habri pa tur esaki y pa cambionan chikito y nos ta pidi cooperación y responsabilidad di tur cliente existente y futuro”, el a agrega.

Pa locual ta trata pregunta di prensa ariba e aumento di persona cu ta den bijstand for di november pa aworaki, Kelly a indica cu nan no a ripara un aumento drastico den esaki y el a bisa cu nan a spera esey un poco.

Sra. Glenda Hernandez, directora di DAS tambe tabata presenta na e conferencia di prensa y a expresa cu e cambio aki cu ta un stap hopi importante pa e departamento mehora e servicionan cu nan ta ofrece na nan clientenan.

“Nos ta hopi contento di anuncia nos next step cu nos a logra, despues di un trabou di un aña y mey cu e grupo interno, nos kier anuncia cu nos ta bay digital, nos ta bay online cu bijstand. Pa nos e ta un milestone, despues di tanto trabou y pensa con pa yega na facilita servicionan pa nos cliente. Esaki pa nos ta un meta cu nos tabatin pa basta tempo caba”, el a indica.