DAS a uni cu diferente instancia y a organisa evento ‘Topa mi na Mita’

Ayera mainta a tuma luga un evento organisa pa Departamento di Asunto Social (DAS) hunto cu Centro pa Hoben y Famia titula ‘Topa mi na Mita’. E evento aki tabata un carrousel di informacion cu a conta cu presencia di diferente instancia- y organisacionnan den e ramo social cu a brinda informacion pa comunidad di Aruba.

Tarsis Sierra, directora interino DAS, a splica cu e actividad ‘Topami na Mita’ tabata un actividad hopi importante pa DAS. Hopi biaha ciudadanonan no ta na altura di tur e instancianan cu tin, no sa kico tin eyfo, pero pa medio di e evento aki DAS kier trece tur e informacion importante aki pa dilanti.

“Nos tin diferente instancia riba tereno social na unda cu nos kier trece dilanti conscientisacion, comprendemento di kico tur departamento social ta haci, e otro departamentonan y nos tin scol tambe presente”.

Durante e actividad aki tabatin informacion tocante prevencion pa pueblo di Aruba pa nan ta na altura na unda nan por acudi, cua instancia nan por acerca pa diferente problemanan, kico nan por haci y kico tur wordo ofreci.

Algun di e instancianan cu tabata presente tabata entre otro Fundacion Respeta Mi, Telefon pa Hubentud, HIAS, Stichting Hunto, Wit Gele Kruis y Centro Famia di Criansa Arubano. Tur e instancianan cu tabata presenta a brinda informacion di tur e servicionan, ayudo y sosten cu nan ta ofrece na comunidad di Aruba.

Yvonne Bermudez, coordinadora di Centro pa Hoben y Famia, tambe a remarca cu diferente instancianan a uni pa trece un mercado di informacion di tur e diferente organisacionnan cu tin pa informa y conscientisa pueblo.

El a splica cu temporada di Pasco a yega, un temporada di celebracion pero tambe por ta un temporada di dificultad pa hopi pasobra hopi emocionnan por bin ariba, por tin problemanan financiero y pa e motibo aki nan kier informa y trece tur e instancianan hunto pa duna informacion pa comunidad ta na altura di kico tur e instancianan tin pa ofrece.

“Pa aña 2023 nos kier ta mas cerca di tur hende den e barionan. Nos lo bay ta cerca den e centronan di bario tambe trahando cu diferente organisacionnan ofreciendo diferente proyectonan pa comunidad por cera conoci cu nos tambe mas di cerca y tambe traha hunto cu nos y asisti na actividadnan ora nos ofrece esaki nan”, Bermudez a comenta.

El a agrega y a enfatisa pa pueblo no warda ora cu tin problema pa acerca un instancia, nan ta desea pa e pueblo bin na momento cu tin pregunta. “No warda e baca hoga, no warda te ora no ta mira solucion. Nos kier pa yega trempan, yega y busca informacion, kico cada instancia tin pa ofrece y na momento cu tin un problema bo sa na unda pa acudi.”

Sra. Miriam Illidge, trahado social na DAS den e area di pariba di brug, ta forma parti di guia social. El a splica cu su departamento ta duna guia a base di material pero tambe no material. Material por significa ayudo cu comestibel, vivienda, ora cu tin problema cu sea awa of coriente etc. E ayudo no material ta basa mas riba e parti emocional. El a remarca cu despues di Covid hopi problemanan extra a bin, problemanan financiero, pero no por descarta e parti emocional.

“Nos ta bin di un pueblo, un comunidad, cu hopi berguensa. Esey nos tin cu purba kibra. Den ki forma, cu alcance mas grandi posibel. Si e situacion no ta yega cerca nos, nos tin cu purba yega na e situacion. Den ki forma? Por ehempel e carrousel. No solamente e cliente tin cu yega cerca nos pero nos tin cu yega mas cerca di nan”, Illidge a comenta.

E frase ‘Topa mi na Mita’, el a splica, ta nifica cu e persona mas importante den full e proceso di guia ta e cliente y e trahado social ta forma parti di proceso. “Pa soluciona un problema e cliente mester ta dispuesto pa duna su parti pa yega na e solucion”, el a agrega.

Pero di otro banda, Illidge ta bisa, semper tin un grupo cu ta dispuesto di yega pa pidi yudansa y como guia social, los di e grupo ey, nan ta purba di acerca esunnan cu no kier yega. El a menciona cu e problema tey, e situacion t’ey, pero e mester djis wordo soluciona. Hopi biaha e persona ta keda cu e problema na cas sin sali pa pidi ayudo y despues ta sinti cu no tin solucion.

“Mira cuanto hopi instancia, cada un cu nan propio experticio, cada profesional riba nan tereno. Na momento cu DAS ta sinti cu mester traha hunto cu otro departamento nos ta cerca e otro departamento of instancia pa colabora cu e situacion”, Illidge a comenta.

Por ultimo Jesseline Kelly, vocero di DAS, a subraya cu e meta principal di evento ‘Topa mi na Mita’ ta pa no warda te na ultimo momento pa acudi pa ayudo.

“Si bo ta nota cosnan diferente, cosnan no usual den famia, cu bo yiunan, por fabor busca informacion, busca ayudo. E instancianan aki t’ey pa duna guia, pa duna conseho, pa duna sosten y esey ta importante. Asisti na e instancianan y ta habri pa ricibi e ayudo y sosten y conseho. Mi ta kere haciendo esey ya caba nos ta cumpliendo cu nos meta di e evento aki”, el a finalisa.