Den un entrevista reciente cu Bon Dia Aruba a tene cu Darwin Winklaar, el a splica di e importancia di tin arte contemporaneo na Aruba. Actualmente e ta studiando arte/moda na Gerrit Rietveld Academy Amsterdam.

Winklaar ta bisa cu, pa ta presente na Aruba, pa prome biaha awo, desde cu e tin un mentalidad Europeo, ‘tabata sumamente diferente’. Segun Winklaar, e ta wak Aruba den un ’90 grado’.

E ta realisa cu tin ‘hopi cos di haci ainda’, agregando cu esaki no lo bin di un dia pa otro. “Cuminsando cu e mentalidad cu nos tin na Aruba, cu ta mucho cera. Mi ta wak cu nos hendenan kier wak un cambio, pero mi ta sinti cu nan no sa con, of unda pa cuminsa. Mi ta wak cu tin hopi hobennan cu kier expresa nan mes, pero nan no tin e curashi pa haci esaki.”

Sinembargo, Winklaar ta continua bisa cu pa loke ta nos cultura ‘ta tristo pa wak cu ainda nos no por tin un museo moderno cu por documenta fielmente nos Aruba’. Un di e cosnan cu e como artista ta haya importante, ta pa tende cultura na halto ‘unda cu nos bay y, pa asina, trece perspectivanan nobo’.

Segun Winklaar un museo contemporaneo ta nifica un acto di honra, un acto presente pa venera ‘nos artistanan cu a yuda forma nos Aruba cu idea nobo;’ un acto di dedicacion pa habri e mentalidad di Aruba na un nivel mas halto, unda cu ainda nan ta considera nan mes como un taboo. “Mi ta desea di wak trabounan di nos artistanan local cu a duna na nos Aruba pa decadanan, y cu ainda no a wordo honra.”

E ehempel cu Winklaar ta menciona ta Elvis Lopez, kende a trece Ateliers 89’ pa comunidad, y cu awo e ta cosechando studiante nan pa bay studia den exterior cu hopi exito, pero asina mes no tin un luga pa honra su trabounan den un museo. Un otro ehempel cu el a menciona ta Glenda Heyliger, cu tabata tin e galeria di arte SINFA na San Nicolas.

“Glenda tambe ta un parti grandi di San Nicolas unda ami a crece. Y pa e motibonan aki, un museo contemporaneo mester wordo realisa pa documenta nos dushi Aruba, y tambe nos artistanan local cu a yuda forma Aruba. Pa asina yuda desaroya nos creatividad y pensa mas diferente”, Winklaar a splica.

Bon Dia Aruba a puntra Winklaar si apoyo den comunidad ta uno positivo pa artistanan. El a contesta cu pa mesun motibo cu Aruba no ta cla, e ta bisa cu mester traha riba esaki. E ta kere cu mester cuminsa na scol secundario. “E vak CKV mester cuminsa algo mas serio, y tambe cuminsa implementa e estudio di arte como un opcion.”

Locual nan ta haya na Rietveld Academy ‘no ta para banda di locual tin na Aruba’. “E estudio na Aruba ta na un nivel hopi abou den e direccion di arte. Aruba mester por trece mas artistanan di Aruba cu a bay studia den exterior pa bin y mustra Aruba locual cu nos a studia p’e, y pa asina Aruba por siña di esaki. Pa Aruba compronde locual cu arte por haci. Aruba mester tambe cuminsa adapta na un nivel mas halto. Pa esaki pasa, nos mester di un museo contemporaneo.”

Pa Winklaar, arte ta un canal pa comunica cu emocionnan. Un canal pa refleha e tempo y situacion unda ‘nos ta bibando den dje’. “Arte pa mi ta mi mesun religion, unda cu ami ta ocupa ta creando mi mesun mundo den un forma mas abstracto, cu asina mi otro por relata y comparti na otro personanan na mi storia. Arte pa mi ta mi mesun buskeda pa wordo confronta cu mi mes, siña mas di mi mes y explora un parti di nos celebro unda nos por sinti mas relaha.”

Winklaar a continua splica cu arte ta un forma pa bisa algo cu e no por splica cu palabra. E ta mas un scapatorio pa e obstaculonan cu un persona ta biba diariamente. “Arte pa mi ta un canal pa comunica cu mundo henter. Arte ta yuda mi pa wordo inspira door di asina hopi cos. Pa wak cos nan diferente cu locual nan no ta.”

E ta remarca cu e ta haya inspiracion di tur caminda, pero ta aclaria cu esey ta keda na cada ken con pa trece den nan mesun vocabulario, of con pa trece e imagen den un otro storia. Algun cos cu e ta bisa cu e ta core den park of cu su bais rond di Amsterdam, sin cu e mester busca algo. “En realidad, esey ta yuda busca den mi mente y scucha mi mente, pa siña compronde kico mi curpa ta purba di bisa mi, y pa asina mi por cuminsa skirbi of pinta.”

Pa Winklaar, su inspiracion di mas grandi tabata y semper lo keda su mama. “Mas tanto, mi ta purba di encarna mi mama su alma pa sinti locual cu e ta sinti. Ora e sentimentonan di mi mama pasa door di mi curpa, automaticamente mi ta cuminsa sinti mas hopi. Mi bida semper tabata un baile entre nostalgia y melancolia. E dos canalnan ey ta yuda mi asina hopi pa sinti profundamente mas fuerte den mi trabou. Mi proceso pa cuminsa crea mi artenan semper ta hopi personal, y semper ta transforma den algo nobo cu locual mi no tabata tin den mi prome proceso.”

Locual ta emociona Winklaar den arte ta pa wak e proceso di comienso ta cu final. E ta considera su mes un persona religioso y spiritual. E ta kere cu el a wordo manda totalmente pa yuda esunnan cu ta sinti demasiado emocion. “Si mi por a inspira cualkier persona den cualkier manera, esey ta duna mi hopi alegria y mi ta sinti mi hopi bendiciona.”

El a finalisa ta splica cu su estudio a yud’e yega cerca e realidad di ken e ta y di unda su antepasadonan ta bin. Locual e ta bisa cu ta mas importante p’e, ta pa e kere den su mes y puntra e motibo crucial cu e ta ainda den e mundo di creacion. “Pa puntra mi mes, kico en realidad ta e fundamento cu mi kier sigui den e direccion aki? E contesta pa mi ta masha facil: dia mi rosea caba lo mi bay sosega den e unico brasa cu mi ta stima, e brasa di Violeta.”