Si berdad kier representacion di votador den Parlamento, candidatonan cu mas voto lo mester drenta Parlamento y esey lo eleva democracia na Aruba. Esey lo ta e obhetivo di cambio den Kiesverordening, e ley di Eleccion di Aruba.
Problema ta cu a presenta un concepto di ley riba secuencia di candidatonan riba lista pa drenta Parlamento, sin publica analisis of investigacion. Ademas, no a tene cuenta cu den tur eleccion te awor, un cantidad di voto di comunidad ta keda reparti netamente entre partidonan cu nan no a sostene, y cu ta bay den un of mas restzetel.
Tur esaki a lanta hopi pregunta no solamente cerca instancianan di conseho manera Raad van Advies y SER, pero tambe cerca parlamentario independiente Daphne Lejuez.
E iniciadornan di e cambio di ley tabata e tempo ey parlamentario Dangui Oduber, sosteni pa su lider di fraccion e tempo ey, mr. Evelyn Wever Croes. Pero, awor cu ambos ta den Gobierno y mester pasa e ley, parlamentario Hendrik Tevreden a tuma e encargo y a habri e proceso pa pregunta. Y e preguntanan di Lejuez ta hopi.
Segun e iniciadornan, e ley actual no ta permiti cu e candidato di un partido politico, cu a haya mas voto ta bin promer na remarca pa bira parlamentario. Aki ta papia di un candidato cu no a ‘saca su mes’ (voorkeurstemmen). Como tal e iniciadornan ta considera cu no ta trata di un sistema democratico. Nan punto ta, cu mester cambia articulo 94 di e Kiesverordening, unda ta scoge parlamentario basa riba e cantidad di voto cu el a haya den un eleccion ya cu esey lo ta mas representativo di deseo di pueblo, den nan vision. Ta e cantidad di voto lo mester determina e secuencia di lista.
E proposicion di cambio tin dos obhetivo, esta logra un mihor representacion di e deseo di pueblo den Parlamento determinando e representante di pueblo basa riba e cantidad di voto; y evita cu e candidato cu mas voto cu coleganan di partido, pa motibo di e sistema actual di secuencia riba lista, no por bira parlamentario.
Si mester acepta e cambionan, articulo 94 di e Kiesverordening lo bisa anto cu ta e cantidad di voto cu e candidatonan riba un lista politico ricibi individualmente ta determina e secuencia di e candidatonan. Y alavez mester cambia articulo 99, inciso 1 di e ley, encuanto e reglanan pa scoge miembro di Parlamento. E lo regla cu Conseho Electoral ta organiza e secuencia di e lista di partido segun e candidatonan cu ta logra saca nan mes, siguiendo pa esnan cu a haya mas voto. Ademas articulo 99, inciso 2 di e Kiesverordening, si acepta e ley, lo bira cu, finalmente candidatonan cu no a ‘saca nan mes,’ ta organiza segun secuencia di e cantidad di voto cu nan a ricibi, cuminzando cu e candidato cu a haya mas voto.
Restzetel tambe ta representa voto
Mirando e puntonan aki, e parlamentario independiente Lejuez kier mas splicacion di su colega parlamentario riba e concepto di ley di iniciativa. Particularmente e kier sa pakico unicamente a scoge pa e secuencia di candidato basa riba e cantidad di voto cu nan a ricibi, pa asina mehora e representacion di pueblo y por ehempel, no a scoge pa inclui e reparticion di e restzetels pa un refleho mas corecto den cuadro di e evaluacion ey. Pasobra si tene cuenta cu e restzetel ta tene cuenta cu e deseo di pueblo pa su representacion.
Lejuez ta puntra si sr. Tevreden ta comparti e opinion cu den cuadro di e restzetelnan, cu mester bin un reparticion husto, manera e ley di eleccion di Corsou ta determina. Lejuez ta splica cu na Corsou a tene cuenta cu e reparticion di restzetel si ningun partido a logra e kiesdeler. A determina pa ley cu ta parti di asientonan entre esnan cu a haya 75 porciento y den caso extremo, hasta si un partido a logra 50 porciento so ( den caso cu ningun a logra e kiesdeler). (Na Corsou tin mas di 20 partido pa participa den eleccion otro luna, loke no ta e caso na Aruba; red.).
Cu otro palabra, Lejuez ta puntra si no ta mas husto pa regla cu e cantidad di voto cu ta mas cerca di e kiesdeler, sea si e partido a logra un asiento of no, tambe por participa den e restzetelnan. Esey lo ta un mihor refleho di e deseo di comunidad, cu finalmente ta motibo pa e concepto di ley.
Por ehempel, den ultimo eleccion Raiz a hera logra un asiento, y su votonan a bay pa e restzetel cu a keda reparti. Y apesar cu Red y POR no tabatin un diferencia grandi den cantidad di voto, POR a haya e restzetel, cu no ta representativo.
Sea ta considera total di voto pa candidato of no
Ademas, e ley proponi ta wak unicamente e candidatonan cu mas voto den un partido y no tur candidato, sin importa e partido den cual el a participa. Cu otro palabra, un candidato den un partido cu no a logra haya asiento por tin mas voto cu cualkier otro candidato den un partido cu si a logra haya asiento). Aki Lejuez ta pidi su coleganan pa argumenta si candidato cu mas voto ta mas representativo y cu mester wak esaki riba henter e resultado di eleccion, y no segun e secuencia di un partido separa.
Candidato cu mas voto hopi biaha ta bira Minister
Pero ademas ta bin e realidad cu den mayoria di caso, parlamentarionan cu mas voto ta sali y ta bay eherce e funcion di minister. Lejuez ta puntra si e realidad aki no ta contra e obhetivo di e ley di iniciativa. Pasobra netamente esnan cu menos voto ta bay den Parlamento y esnan cu mas voto, ta bay Gobierno. Lejuez kier sa con esnan cu a bin cu e iniciativa ta splica cu e cambio di ley lo mehora e representacion democratico den Parlamento. Pasobra con cu bay bin, ta papia di un eleccion di Parlamento.
Den e mesun rosea, e ta puntra si tin un pensamento pa rekeri cu e persona, cu excepcion di Formador, cu participa den eleccion pa Parlamento, solamente por bira parlamentario. Pasobra esaki ta e unico forma pa sigura cu e representacion den Parlamento ta e refleho di deseo di pueblo.
E sistema actual, unda esnan cu mas voto ta bira Minister ta locual a conduci na e asina yama ‘stempelparlament.’ Mas ainda, con ta garantisa cu e traspaso di parlamentarionan cu mas voto pa funcionnan den Gobierno, no ta significa cu ta kita e posibilidad di control for di Parlamento. Lejuez lo kier sa con e ley di iniciativa ta garantisa cu e parlamentario nobo, cu a haya e puesto debi cu esun cu mas voto a bira Minister, berdad ta bay controla e Minister, cu danki na e, el a logra bira parlamentario.
Den e sentido aki, si e intencion ta pa tur parlamentario refleha e deseo di pueblo, con ta mira e funcion di un partido politico. “Con un partidlo lo por planifica e lugar riba lista di esnan cu tin e experticio pa cumpli cu vision di partido y ehecuta e plannan di e partido. Particularmente si un partido no por duna claridad na e potencial candidatonan aki cu nan lo duna e contribucion real aki, si mester logra asiento.”
Separacion di poder y dos eleccion pareu
E impresion den comunidad ta cu netamente esnan cu mas voto ta bin na remarke pa bira Minister. Daphne Lejuez kier sa kico esnan cu a propone e cambio den ley di eleccion ta pensa di e ponencnia aki. “Con por percura cu comunidad ta compronde cu e eleccion ta pa Parlamento, y cu pa controla mester tin separacion di poder? Esaki lo no ta motibo cu ta e formador ta scoge su gabinete y cu e no mester ta netamente for di e resultado di eleccion,” Lejuez ta puntra. Cu otro palabra, e escogencia no mester bay pa e parlamentarionan cu mas voto, ya cu segun e intencion di e ley, nan ta representa pueblo.
Como tal, Daphne Lejuez kier sa si su coleganan ta habri pa cambia e ley di eleccion completo, unda ta habri e posibilidad pa dos eleccion. Na mesun momento por scoge pa e 21 Parlamentarionan y separa, ta scoge e Ministernan, e cantidad di Minister y basa riba un descripcion di funcion y exigencia minimo di capacidad y conocemento. Lejuez ta puntra si e sistema aki, di un eleccion reparti den dos, no ta brinda un mihor control y tambe un mihor funcionamento di Parlamento, ya cu di e forma aki e poder ehecutivo y e poder legislativo ta separa di otro, y por logra realmente e Trias Politica. Den su concepto, un sistema asina aki ta duna un contribucion cualitativo y lo facilita e trabao di parlamentarionan pa haci e control sin e presion politico.
Canibalismo partidario
Pero los di tur e ideanan aki, Parlamentario Lejuez kier sa cual ta e valor agrega pa partidonan politico den cuadro di ehecucion di nan programa di partido, segun e proposicion riba cual mester bay dicidi. “A papia cu tur partido politico y cual ta nan contribucion na e proyecto di iniciativa?” Lejuez lo kier mira e contribucionnan aki por escrito.
Pa sigura cu tin un representacion husto di pueblo, con lo evita cu algun candidato tin mas oportunidad ya cu nan tin mas sponsor of financiador politico, cu ta permiti nan haya mas acceso compara cu otronan cu no tabatin e mesun sosten financiero aki. “E lo no crea un situacion di competencia inhusto y indesea dentro di e mesun partido? Aki lo por crea un situacion unda candidatonan, envez di traha hunto riba un vision y meta, ta enfoca riba nan posicion individual y ta competi cu otro candidatonan di e mesun partido.” Daphne Lejuez a cataloga esaki como canibalismo partidario, den su splicacion na Bon Dia Aruba. “Y mirando cu e meta di e cambio di ley ta dirigi na candidatonan individual, lo no ta mihor e ora pa habri eleccion, no pa partidonan politico, sino pa candidatonan individual e ora?”
Lejuez tambe a referi na observacionnan di tanto Raad van Advies como SER riba e proposicion di cambio di e Kiesverordening. Lo amplia riba esakinan den un siguiente edicion.
