Parlamentario Independiente, Daphne Lejuez no a duna sosten na e carta cu Presidente di Parlamento Juan ‘Adi’ Thijsen a firma hunto cu Presidentenan di Parlamentonan di St. Maarten y Corsou, cu a bay pa Prome Minister di Hulanda, Mark Rutte.
E Parlamentario a bisa cu e no por haya su mes den e carta ni tampoco ta kere cu e momento di manda e carta ta oportuno, mirando cu e situacion di Aruba ta diferencia cu esun di Corsou y St. Maarten. Particularmente cu e relacionnan a desaroya diferente, teniendo 10-10-10 na consideracion. Como tal, no por generalisa e posicionnan di e tres paisnan.
Segun Lejuez, el a ricibi un yamada via e-mail pa un reunion di Commissie Huishoudelijke Aangelegenheden, CHA, cu mester a tuma luga dia 31 di augustus 2020 pa di mainta den kantoor di Presidente di Parlamento.
Pero tabata apenas pa 9:33am y 9:39am cu e invitacion a drenta, y tabatin como tema pa firma un carta di concepto dirigi na Prome Minister di Hulanda, Mark Rutte, cu ta bay ta sosteni pa Parlamentonan di e paisnan CAS, Corsou, Aruba y St. Maarten. Lejuez den su carta na mr. Thijsen a bisa di ta lamenta pa cuminsa, cu ta yama un reunion di un forma ad-hoc y na ultimo momento, mirando cu e agenda di dia tabata habri y ta stroba planificacion di trabou haci caba, cu ta haci dificil pa ta presente of pa por reacciona na ora.
Ainda ta negociando
Mas ainda, “segun cu ami sa, Prome Minister di Aruba ainda ta den negociacion y mi ta haya cu e acusacionnan den e carta no ta na su luga si berdad ta den e proceso di negociacion.” Segun Lejuez, e negociacionnan ta nifica cu por yega na un consenso.
Tambe Lejuez ta preocupa su mes riba e expresionnan riba eventual financiadonan alternativo, cu ta cay pafo di e proceduranan cu Statuut ta prescribi, mirando tur e condicionnan y consecuencianan cu esaki lo trece cune.
Alternativa pafo di Statuut
Textualmente, e carta firma pa Juan Ady Thijsen y sosteni pa fraccionnan di Parlamento di Aruba, ta bisa cu “nos Parlamentonan ta instrui nos gobiernonan pa busca solucion alternativo, cu ta diferente cu e ruta normal, cu ta esun cu mester pasa via e mesun Gobierno Hulandes” (red. manera ta conoci, Hulanda mester aproba cualkier prestamo internacional). E carta di e Parlamentonan di CAS ta sigui bisa cu Gobierno Hulandes mester respeta esaki si no ta dispuesto pa laga e idea pa mara e sosten di likides na aceptacion di e dos rijkswetten, cu ta inclui e entidad di Recuperacion y Reforma, ademas di otro condicionnan cu kier impone riba e habitantenan di e islanan. “Nos ta spera cu ta respeta e derecho aki considerando cu e ta bay sin mester bisa, cu nos mester confronta e crisis actual y cualkier otro cu por afecta e islanan.”
Lejuez ta puntra mr. Thijsen si e ponencia aki “lo no nifica cu un paso asina lo conduci cu ya no ta bay forma parti di Reino? Nos como isla ta cla pa un decision asina? Nos a puntra e pueblo pa medio di un referendum riba nan pensamento?”
Carta no ta oportuno
Pa Lejuez, e expresion aki ta bay hopi leu, mirando cu kier kibra cu e areglo cu tin den Statuut.
“Mientras cu mi por compronde e sentimentonan y e motibonan tras di e carta aki, y ta comparti nan den cierto sentido, mi ta haya cu e momento aki, un carta asina no ta oportuno.” Motibo ta cu Lejuez a corda Presidente di Parlamento cu entrante mita di september cu ta otro siman, Aruba no tin e fondonan financiero como pais pa cumpli cu su obligacionnan, y esaki ta segun e palabranan di propio Prome Minister y Director di Finanzas. “E no ta oportuno pa escala e situacion di e forma aki, te ora cu nos ricibi un contesta oficial di Gobierno riba e negociacionnan y mirando e hecho cu tempo ta preta, kico nan conseho ta, a corto termino.”
E Parlamentario independiente ta sigui bisa cu si mester firma e carta aki na nomber di Parlamento di Aruba, e kier distancia su mes explicitamente di e contenido, pa medio di su carta. “Mi no por haya mi mes den e carta y e no por conta cu mi sosten, y mi ta hay’e prome cu ora, sigur pa motibo cu no tin claridad oficial for di Gobierno kico a logra for di e negociacionnan.
RED
Bon Dia Aruba a tuma contacto cu fraccion di RED pa mira si ta sostene e carta y aki Ricardo Croes a confirma cu ta para tras di e mensahe pa Prome Minister Mark Rutte. Ora cu a puntr’e si esaki de facto ta nifica cu ta instrui Gobierno di Aruba pa bisa ‘no’ na e negociacionnan, el a contesta cu ta Gobierno ta esun cu ta negocia. “Parlamento no ta cera acuerdo di ningun sorto. Ta Gobierno so ta autorisa pa esey.”
No a ricibi reaccion di lider di fraccion di MEP, sr Rocco Tjon.
