Den un carta fecha 14 di februari 2020 parlamentario independiente Daphne Lejuez a haci pregunta na ministro encarga cu Finanzas, Asunto Economico y Cultura, relaciona cu e cobranza cu Banco Central di Aruba ta impone riba e banco y/o clientenan den uso di e sistema di pago inmediato nobo, yama ‘i-Pago’ introduci entrante 1 di januari 2020, cu ta percura pa e pagonan entre diferente banco lo bay tuma lugar inmediatamente.
Pa por combati e costonan di e inversion aki, Banco Central ta cobra pa cada transaccion entre dos banco, di Afl. 250,- o mas, un suma di Afl. 0,70. Transaccion bao di Afl. 250,- no ta paga nada. A calcula e suma aki, segun Banco Central, a base di e volumen di transaccion cu ta anticipa.
E preguntanan dirigi na e mandatario concerni ta:
- Ministro ta na altura di e servicio nobo aki y tambe di e tarifa nobo aki? Den caso afirmativo, kico ta opinion di Ministro tocante e introduccion di e costo adicional pa Banco Central di Aruba pa ‘doing business’? Si acaso no, pakico no?
- Ministro por indica ken lo debe e tarifa aki? E banco cu ta transferi e placa, e banco receptor, o ambos? Por fabor tambe un splicacion pakico.
- En vista cu por supone cu costonan adicional ta ser cobra di e clientenan, por considera e tarifa nobo aki tambe como un adicion na costo, ya cu tanto casi tur empresa como ciudadano ta haci transaccion interbancario diariamente. Por pensa riba pago na proveedor, paga salario, haci compra na supermercado y tienda, pago di cuenta di energia, etc. Tabatin un investigacion previo encuanto e posible efectonan di e tarifa aki pa servicio empresarial y pa ciudadano? Den caso afirmativo, ta posible comparti esaki cu Staten? Si acaso no, pakico no?
- Banconan lo mantene e tarifa aki o lo e cobranza di e tarifa aki na e cliente implica cu e banconan por aumenta e tarifa aki gradualmente pa e cliente?
- E tarifa ta mara na un periodo fiho? Si acaso afirmativo, pa cuanto tempo y si no, pakico no?
- Segun e splicacion riba website di Banco Central di Aruba no ta cobra gasto di transaccion pa transaccion bao di 250 florin. Pakico a scoge pa un limite di 250 florin y no mas halto? Tin un diferencia entre di procedimento pa procesa un transaccion di 250 florin o uno di por ehemplo 350 florin o mas? Bo lo por duna un splicacion pa e escogencia aki?
- Si un hende tin un hipoteca cera cerca un banco, e cliente mester laga su salario core via e banco ey. Ministro por informa Staten kico ta e posible consecuencianan di e introduccion di e tarifa pa e banconan comercial como tambe pa e clientenan si nan ta atende asunto na diferente banco y kier evita e tarifa aki?
- Minister por informa Staten si e tarifa aki ta bay ta complementario na e tarifa existente pa transaccion interbancario, o lo reemplaza esaki completamente pa e tarifa nobo aki?
Nota di redaccion:
E sistema nobo di transaccion inmediato ta un mehoracion grandi tanto pa e ciudadano como pa e empresario, riba cual mester a warda demasiado tempo. E lo contribui na menos uso di cash y mas transparencia den e sistema bancario. Sin embargo, ta di spera cu e tarifa aki ta en berdad pa combati gasto di inversion so, y no ta añadi na ganashi di Banco Central, y consecuentemente na mas dividendo pa caha di gobierno.
