Parlamentario independiente Daphne Lejuez a entrega pregunta na presidente di parlamento, dirigi na ministro encarga cu Turismo, Salubridad y Deporte, sr. Dangui Oduber, encuanto e proyecto cu lo desaroya riba tereno di waf di Playa, yama Port City.

Recientemente Aruba Ports Authority NV a emiti un anuncio den publicidad tocante Port City invitando inversionista pa participa den un encuentro di “market consultation” pa e prome fase di e proyecto aki. Esaki lo encera hotel, vivienda y un centro comercial. Tambe a anuncia cu lo cuminsa otorga tereno pa desaroya e proyecto aki na 2020 caba.

Den un prome pregunta ta pidi e ministro encarga pa splica, pa loke ta e area di hotel, vivienda y centro comercial, con lo selecciona e desaroyadornan pa e diferente fase y terenonan. Si tin condicion y rekisito fiha caba, o, si no ta asina, con e proceso aki lo ta.

Pa loke ta e viviendanan, ta puntra si ta pone condicion, cu si ta pa hende local o pa stranhero esakinan ta. Aki tambe ta puntra si tin condicion y rekisito fiha caba y si ta asina, si por comparti esaki cu parlamento.

Pa loke ta e area di shopping, ta puntra con e competencia cu e centro di Playa lo ta, mirando e cercania di centro di ciudad, y si a tuma e posibilidad aki na cuenta. Den caso cu lo tin competencia, kico ta e plan pa mitiga e posible efecto di esaki. Si no ta asina, si ta tuma paso anto pa haci esaki ainda, y si no, pakico no.

Tambe e parlamentario a lanza pregunta tocante e fluho di trafico cu e proyecto lo bay genera, y e hecho cu esaki ta banda di lama y ta un solo salida tin, esta via L.G. Smith Boulevard, unda segun e parlamentario ya tin basta trafico y stagnacion. Ta puntra anto si tin un plan di trafico elabora hunto cu stakeholders manera polis y servicionan di emergencia pa posible rutanan alternativo. Den caso cu ta asina, si tin un plan pa mitiga e posible efectonan y si por comparti esaki cu parlamento. Si no ta asina, si tin pensa pa haci esaki ainda y si no, pakico no.

Nota di redaccion.
Decada pasa tabatin plan pa un proyecto bastante similar, cu un hotel nobo na lugar unda tabatin e antiguo hotel y scol di Bushiri, cu tabatin como posible desaroyador e cadena Sol Meliá. Esaki a lanta bastante discusion encuanto e proximidad di centro di Playa y e posible efectonan di competencia cu e proyecto aki lo implica. Esaki itambe en vista di e desaroyo fuerte dilanti e hotelnan na Palm Beach, cu a resulta un fuerte competencia pa dentro di Playa. Despues cu e plan aki no a continua, a bin e proyecto di hotel na Bushiri, sin cu tabata contempla un desaroyo completo di e area di waf manera anteriormente. E plan pa un Hardrock Hotel no a produci nada y e actual plan pa desaroyo di e area ta diferente den sentido cu no ta contempla un hotel mas na e sitio di e antiguo Bushiri, pero si tres boutique hotel den e area di waf mes.

Un pregunta cu redaccion mes tin ta si a haci estudio di e necesidad di tanto espacio comercial mas, igualmente pa loke ta acomodacion turistico. Esaki tambe en vista di reciente publicacionnan, entre otro di Banco Central, cu ta pone enfasis riba posible exageracion den desaroyo di mas acomodacion turistico y e subsiguiente crecemento comercial. Si e estudionan ta existi, si por comparti nan cu comunidad.