Parlamentario Daphne Lejuez, di fraccion di partido MEP, a entrega ayera un serie di pregunta na ministro encarga cu Desaroyo Teritorial, Infrastructura y Medio Ambiente, encuanto e base legal cu e donacionnan cu gobierno ta exigi como condicion pa haya tereno erfpacht pa proyecto grandi, y tambe pa cambio di destinacion di erfpacht. Seguidamente e texto completo di e peticion di e Parlamentario.
Pregunta haci por escrito pa Parlamentario Daphne R.Y Lejuez na Ministro encarga cu Desaroyo Teritorial, Infrastructura y Medio Ambiente, señor Otmar oduber, a base di articulo lll.17 di Constitucion y articulo 59 di Reglamento di Orden di Parlamento di Aruba.
For di prensa local (Bon Dia Aruba di diasabra 05 di october 2019) a haya di conoce cu e areglo encuanto e asina yama “aportacion social” cu ta pidi ora di adkiri tereno den erfpacht, destina na proyectonan economico mayor, na e momento aki lo ta carece di un base legal. Explicitamente ta referi aki na e Ordenanza Emision di Propiedad (Landsverordening Uitgifte Eigendommen) unda ta trece dilanti cu e ordenanza menciona, banda di e facultad pa cobra e pagonan regular pa emision di e terenonan di gobierno como erfpacht, no conoce facultad pa stipula regla adicional pa compensacion, cu e adkiriente di erfpacht mester paga na tercer persona, como donacion, como condicion pa adkiri tal erfpacht. Tambe a haya sa cu ta existi un maneho similar actualmente pa e terenonan unda ta trata di cambio di destinacion, por ehemplo di vivienda pa uzo comercial.
Tumando como punto di salida cu actuacion gubernamental, y sigur unda ta trata di exigi pago na tercer persona, hasta ora esaki finalmente ta concerni un bon meta, esta e subsidio di entidadnan caritativo, mester ta someti na legislacion adecua unda e facultadnan pa tal actuacion ta suficientemente stipula, suscrito ta desea di somete e siguiente preguntanan na bo consideracion.
- Si e ministro por confirma cu, contrario na e noticia menciona, en berdad ta existi un base legal pa e areglo aki, e ministro por indica anto riba cual base legal esaki ta sustenta specificamente?
- En caso cu e ministro no por indica riba cual base legal e areglo menciona ta sustenta, e ministro por indica cual lo ta e pasonan cu e ministro ta desea di tuma pa duna e maneho aki, en caso cu ta e intencion di continua e maneho aki manera e ta institui actualmente, un base legal suficiente?
- Si e conclusion mester ta cu e base legal referi no ta existi, e ministro lo dicidi di para e areglo actual te ora cu e base legal referi lo ta regla di manera satisfactorio?
- E ministro por, si ta intencion pa continua e maneho encuanto donacion, indica cual cambio di ley, o legislacion nobo ta ser considera pa crea tal base legal suficientemente?
- Den luz di e transparencia rekeri den e tipo di maneho aki, unda e transaccionnan aparentemente no ta administra formalmente ya cu no ta trata di entrada di gobierno, pero si ta administra pa controla si ta cumpli cu e obligacion di pago, ministro por pone un resumen na disposicion di Staten unda ta inclui e transaccionnan di e fondonan poni disponibel durante e ultimo cinco añanan, cu mencion di e donante, beneficiario y e sumanan envolvi?
- Ministro por indica con e fluho di subsidio aki, sea formalisa o no, ta coresponde cu e maneho general di subsidio di gobierno, tanto pa loke ta condicion como otorgamento real di subsidio, un que otro tambe pa evita duplicacion den otorgamento di subsidio?
- En caso resulta cu e areglo menciona ta ‘contra legem’ y cu tampoco ta posibel pa duna e areglo menciona un base legal, e ministro lo considera pa para e areglo menciona, y si no, ministro por indica e motibonan pa continua e maneho aki, hasta sin base legal?
Suscrito ta desea respuesta por escrito di e Ministro riba tur su preguntanan dentro di e termino stipula den conformidad cu Reglamento di Orden.
Tabata firma,
Daphne R.Y. Lejuez
Miembro di Staten di Aruba
Fraccion M.E.P.
