Tin dunadonan di trabao cu ta haciendo mal uzo di e ayudo otorga pa medio di SVb di subsidio di trabao. Te hasta algun di nan ta haci uzo di e ayudo financiero aki pa aregla pakete di retiro pa e trahadonan. Mientras cu e subsidio di trabao su meta ta pa conserva mas cupo di trabao posibel.
Bon Dia Aruba a expone e situacion di abuso cu ta wordo presenta contra trahadonan cu a wordo kita sin hustificacion y cu sindicatonan a yega di denuncia publicamente. Tin dunadonan di trabou cu ta probecha e circunstancia actual pa comete abuso contra nan trahadonan, specialmente esunnan cu tin mas aña di servicio cerca nan. Mientras mas denuncia ta drenta na departamento di Labor (DAO) pa wordo atendi, y casonan ta wordo entama na corte pa e mesun motibo aki.
Segun minister di Asunto Social y Labor, Glenbert Croes tur denuncia cu ta drenta na DAO ta hayando su debido atencion. El a cuestiona e hecho cu companianan cu bo no ta kere, kier uza e placa di subsidio di salario cu gobierno ta presta for di Hulanda, pa kita hende. “Pa paga e pakete pa kita hende,” el a bisa. Mientras cu esencia di subsidio di salario ta di preserva trabao.
E mandatario a duna instruccion na DAO, y e ta conta cu tur sosten di tur hende envolvi pa tin husticia. Tur empresa cu ta comete e tipo di abuso aki ta wordo yama aden y tambe nan ta papia cu e trahadonan afecta. El a bisa cu no tin un lista preto di empresanan cu ta comete e tipo di abuso aki. Pero si e ta lamenta cu hopi compania ta probechando di e situacion aki. Te hasta companianan cu bo ta kere cu ta empresanan di gran ehempel, pero cu nan ta cometiendo fayonan den nan conducta den e momento dificil aki.
Riba ki dia comunidad lo por haya sa e resultado di investigacion aki, no ta conoci. Pero e seccion di investigacion di DAO riba e tipo di iregularidad aki, na final lo traha un rapport riba dje. Pero loke DAO ta enfoca riba dje -segun e mandatario- ta esun di atende e trahadonan cu ta pasando den e situacion aki. Unabes cu e trahado yega DAO, nan ta wordo asigna un funcionario cu ta tuma contacto cu e compania, ya cu ley laboral ta vigente.
E ta haya cu e crisis aki ta trece e reflexion cu tanto empresario como trahado ta un ser humano. Como gobierno nan kier pa e dunado di trabao progresa, pero no a costo di e trahado. Tambe nan kier pa e trahado progresa cu e progreso di empresario. E balansa entre ambos mester ta un husticia di solidaridad cu no ta permiti abuso, principalmente probechando di e crisis aki pa kita hende for di trabao.
E mandatario a trece dilanti pa tur hende ta consciente cu e desafio actualmente ta di proporcion monumental. Aña 1985 ora cu refineria LAGO a cera, ainda nos tabatin turismo. Pero aworaki refineria ta cera y nos turismo ta morto. Mientras cu gobierno su entradanan ta cayendo mas cu 50% caba.
