Cu eleccion apenas algun siman leu, Departamento di Labor y Investigacion ta informa tocante e derecho cu trahadonan tin pa ricibi oranan liber pa eherce nan derecho di voto riba dia di eleccion, cual ta programa pa dia 6 di december proximo.

Articulo 39 Ordenansa Electoral:

E votamento ta cuminsa 8 or di mainta y ta dura te 7 or di anochi.

Articulo 40 Ordenansa Electoral:

Tur dunado di trabao ta obliga di percura pa su trahado, cu tin derecho di voto, tin riba dia di eleccion durante e tempo stipula den articulo 39 pa vota minimo 4 ora di trabao consecutivo liber, a menos cu e trahado durante e oranan cu e eleccion ta tuma lugar ya caba tin 4 ora consecutivo liber riba un otro base.

E dunado di trabao ta obliga di percura pa mas tarda un siman prome cu e dia di vota, e tempo cu e trahado ta haya e oportunidad pa vota, wordo poni na su conocemento.

Interpretacion:

Esencia di articulo 40 §1 di Ordenansa Electoral ta cu e dunado di trabao mester percura pa den su compania e trahadonan cu tin derecho di voto riba diabierna 06 di december proximo haya por lo menos 4 ora consecutivo liber den e periodo cu local di votamento (stemlokaal) ta habri, pues entre 8 or di mainta y 7 or di anochi. E pensamento tras di esaki ta cu tur trahado cu tin derecho di voto mester haya suficiente oportunidad pa haci uso di esaki.

Excepcion:

E trahado cu den e periodo cu local di votamento ta habri ya caba tin 4 ora consecutivo liber riba otro base (p.e. e trahado normalmente ta traha mita dia so of e trahado tin un shift hopi tempran of hopi laat), no por haci un apelacion serca su dunado di trabao pa e 4 oranan di trabao liber.

Ehempelnan:

E votado cu ta traha di 7:30 or te 12 or di merdia y di 1 or te
4:30 or di atardi lo mester haya liber di 7:30 or te 11:30 or di merdia of di 12:30 or te 4:30 or di atardi.

E votado cu ta traha ‘part-time’ di 8 or te 12 or di merdia no por haci apelacion riba e 4 oranan di trabao liber.

E votado cu ta traha shift di 7 or di mainta te 3 or di merdia tampoco por haci apelacion riba e 4 oranan di trabao liber. Esaki ta conta tambe pa e votado cu ta traha un shift di 12 or di merdia pa 8 or di anochi of un shift di 3 or di merdia pa 11 or di anochi.

Adicional na e obligacion di e dunado di trabao pa permiti su trahadonan cu tin derecho di voto e tempo liber pa nan eherce nan derecho di vota,
articulo 628 §4 y §5 Codigo Civil di Aruba ta stipula cu e trahado ta mantene su derecho riba salario pa e oranan liber cu e ta haya pa eherce e derecho aki.

Departamento di Labor y Investigacion ta pidi tur trahado y principalmente dunadonan di trabao pa tene bon cuenta cu e informacion aki.