Ultimo simannan nos por a tuma nota con tin interes a aumenta un biaha mas pa deporte claro mirando cu ta aña de eleccion. Pa ultimo añanan nos por a mira un ausencia completo di nos gobierno den deporte. Citando nos mesun minister di deporte, e no tabatin tempo pa deporte e prome 3 añanan, ya cu pa su persona e cartera di salubridad ta mas importante. Faltando 3 luna prome cu eleccion diripiente tin tur atencion pa deporte y a core pone un conferencia pa delinea awo un programa pa 10 aña y bin cu tur sorto di comision pa asina duna deporte su atencion debido.
‘A little to Little, a little to late’,aunke esaki no ta sorprende mi, hopi politiconan a core campaña primintiendo cielo y tera pa cu nos deportistanan y deporte engeneral y ora e momento yega nos no ta mira nada di e promesanan. Politiconan cu berdad no sa kico ta come of bebe den deporte y ta priminti tur sorto di solucion te ora nan sinta y mira cu realidad ta otro. Mi por bisa esaki pasobra ami a sinta 34 aña bou di tur gobierno y por a experencia esaki personalmente. Un maneho deficiente of miho dicho un ausencia di maneho den e ultimo gobernacion a hiba deporte na un estado critico. E estado di e facilidadnan ta deplorabel y sin uzo. Minister ta bisa cu tin hopi placa, anto mi ta puntra pakico no a mantene sikiera e facilidadnan sino tabatin tempo pa deporte e ultimo 3 aña y mey. Tuma por ehempel cancha di basketball na Village, 4 aña pasa e la wordo renoba pa colega di partido y ex minister di Turismo Otmar Oduber.
Awe e ta un berguensa pa mira con nada a wordo haci mas y e luga a wordo laga na su cuenta. Pero danki na eleccion porta awor atrobe e lo por haya atencion y gobierno por core renob’e pasobra mester voto. E mesun storia cu Esso Ville, un bunita luga, pero bandona pa falta di vision y maneho. Como politico den un partido forsa nobo bo no kier ta negativo y ni punta dede pero mester conscientisa e pueblo riba e falta di maneho cu a hiba e deporte unda e ta awo. Tur minister ta mete riba e tereno di deporte sin cu tin un plan di maneho. Joe Laveist Ballpark a wordo renoba door di Minister de Meza, di otro banda Minster President tambe ta regala material sin pensa con nan lo wordo mantene y no ta involucra e federacion di e deporte mes.
Linear Park a wordo traha door di ex Minister di Turismo Otmar Oduber, anto mi pregunta ta unda e maneho di deporte a keda, pakico mester a warda asina hopi pa bin cu un plan di maneho? E proximo gobernacion mester pone full atencion pa cu nos deporte. E mester bira un prioridad!No por y no mag di neglisha esaki mas. Mester hiba e deporte bek na nos pueblo, na nos hobennan, na nos barionan y scolnan. Maneho di deporte no por ta mas show and tell, mira ki facilidad mi a traha sino e mester ta mira cuanto hende ta practica deporte y percura pa nan salud. Mi maneho cu sosten di boso e deportista, e hoben y e famia ta pa percura cu e placa wordo uza pa asina tur cu kier por tin e oportunidad pa practica deporte. Nos barionan mester tin e facilidad pa brinda un luga sano y sigur unda nan por move.
Nos scolnan mester debido atencion pa asina desde hobennan por crece cu e bon habito di deporte. Nos no por ignora e importancia di e cartera aki y mester un persona cu lo por trece a cambio aki. Experencia y know how lo por cambia e rumbo di e decadencia den deporte.
