Den un entrevista cu presidente di AF&BA (Aruba Food & Beverage Association), Daniele Ferrara, ta papia di e situacion actual den e sector di horeca y e dificultadnan cu tin pa yena vacaturanan habri.
Sr. Ferrara ta splica cu actualmente e situacion economico ta recuperando y turismo ta yegando back na e cifranan di aña 2019, pero na mesun momento tin dificultad pa haya hendenan motiva pa traha den e sector.
“Nos ta kere cu un gran parti di e problema ta bin door di fase, ya cu hendenan ta riba fase ainda, nan no ta interesa pa haya un trabao vast”, Sr. Ferrara ta splica. “Nan ta hayando fase, nan ta hayando pakete di cuminda, nan ta haya un otro beneficio porta, y e ta haci cu e ta demotiva e mercado laboral pa bay traha back den horeca. Nos ta compronde cu na e momento di e crisis e tabata un salba bida pa hopi hende, pero actualmente nos ta di opinion cu fase ta birando un obstaculo aworaki pa haya hendenan pa traha den e sector”.
Ferrara ta bisa cu e sector horeca ta habri na un capacidad di 100% y mayoria di nan miembronan tin hopi vacatura; “tin hasta miembronan cu tin 30 vacatura den un negoshi anto nan no ta wordo yena, atrobe mi ta bisa, nos ta kere cu fase ta un obstaculo grandi pa nos actualmente”.
E ta indica cu actualmente tin hopi dificultad pa locual ta trata permiso pa trahadonan stranhero den e sector horeca y segun e esaki ta cu tur rason. “Tin 4000 hende local na Aruba cu no tin trabao, cu ta riba fase, cu normalmente tabatin un trabao prome cu Covid y enfoke mester bay pa duna e hendenan aki trabao prome cu cualkier otro persona”, Sr. Ferrara a bisa.
E menasa di un tercer ola di infeccion di COVID-19 ta batiendo na nos porta y esaki ta nifica cu medidanan di restriccion por wordo implementa atrobe. Ferrara ta bisa cu e unico plan cu tin pa adapta na e medidanan y e medidanan di restriccion ta nifica cu e sector horeca lo bay dal un paso atras atrobe.
“Nos a pasa door di e pandemia caba na cuminsamento, dus mi ta kere tur hende ta miho prepara. Pero na e mesun momento ainda nos ta den un situacion di desconocemento, e ta un situacion ainda hopi insigur, nos tin hopi avionnan yegando, turista yegando pero nos ta hayando casonan ta subiendo tambe, dus nos lo keda pendiente di gobierno pa wak ki medidanan nan lo trece dilanti”, Sr. Ferrara a bisa.
“Restriccion ta nifica cu bo benta ta baha atrobe, economia ta bay atras y mas medida casi 100% kiermen cu atrobe nos mester bay back riba subsidio. E ta bira un situacion mas complica y dificil financiero pa cada doño di nan negoshi, mayoria negoshi mester a saca prestamo, mester a usa nan cuentanan di spaar etc. durante e pandemia, esunnan cu a stop, y hopi negoshi a cera tambe, of lo mester cera”, el a agrega.
