(AP) — Un veterano di marina Mericano kende a choca un homber ambulante fatalmente abordo di un subway na New York City luna pasa a declara inocencia ayera pa cargonan revisa.
Daniel Penny, 24, a declara inocencia na homicidio den segundo grado y homicidio criminalmente negligente den e morto dia 1 di mei di Jordan Neely, un ex-imitador di Michael Jackson kende tabata grita y haci menasa na e trein, segun testigonan.
Penny a want’e riba vloer cu ayudo di otro dos pasahero ya ten’e wanta den un “chokehold” pa mas cu tres minuut. Neely, 30, a bay fo’i tino durante e lucha.
E morto pa chokehold, cu a keda graba pa video di un testigo, a genera un debate fuerte, cu algun elogiando Penny como Bon Samaritano y otro acusando e di vigilantismo racista. Penny ta blanco y Neely tabata color scur.
Durante un sesion breve diaranson, Penny, kende ta den libertad bao fiansa, a bisa solamente e palabranan “no culpable” prome cu a bandona e sala di corte cu su abogadonan.
Inicialmente a aresta Penny pa cargonan di homicidio na mei, pero un gran hurado e luna aki a agrega e cargo di homicidio negligente, potencialmente dunando e hurado e opcion pa hay’e culpable di e caso menor.
