En conexion cu Luna di Trahador Social, Bon Dia Aruba a combersa cu Daniel Alvarez, kende ta studiante di Trabao Social na Universidad di Aruba.

Con bo a yega na e decision di studia trabao social?
 Den mi caso, ami tabata un persona cu mi a bay studia otro caminda prome. Mi a studia, pero mi no a keda cla, mi no tabata sinti cla mental-, fisica- y economicamente, anto mi a haya manera un ‘breakdown’ y mi a bin traha back na Aruba. Pa un tempo mi tabata un tiki perdi, anto mi a pensa, mi kier haci algo cu mi bida, mi kier haci algo cu mi por empodera otro, sigura pa otro hende no mester pasa den loke ami a pasa. Mi a bay Open House di UA, y mi a haya Social Work… pero mi lo bisa Social Work a haya ami. El a papia na ami, anto ya, dos aña despues, mi t’akinan.

Mirando cu na Aruba tin escasez di trahador social y un necesidad grandi pa trabao social, con abo por cuminsa contribui door di sigui e estudio aki?
 Mi ta haya cu hopi hende no ta na altura di esaki. Mi ta contento di bisa cu nos facultad, mi carera, mi klas ta esun mas grandi cu a yega di tin den e programa. Nos ta 22, anto esey a wordo sobrepasa pa e klas nobo (eerste jaar), cu awo ta 25 of 26 mucha, pues e ta creciendo rapidamente.

Ami ta haya cu loke nos por haci como futuro trahador social ta siña tur e material, y usa nos experiencia, conocemento, creatividad y punto di bista, pasobra nos ta un generacion nobo, cu ta pensa un tiki diferente cu e generacionnan di trahador social anterior. Pues nos ta traha hunto pa nos por crea un miho Aruba, miho ambiente, miho sociedad pa tur hende na Aruba, no solamente pa esnan cu a nace akinan sino tambe pa esnan cu a bin biba na Aruba.

Ki sorto di preparacion boso ta haya pa forma como trahador social?
 Por ehempel, mi vak faborito ta sociologia, cu ta estudio cientifico di sociedad. Con sociedad ta bin, con cultura ta traha, diferente cultura, con bo norma y balornan ta wordo crea door di bo mayornan y door di nan mayornan. Con esey ta influencia con bo ta wak sociedad y con ta influencia con otro persona ta wak sociedad. Esey ta hopi importante, pasobra abo como trahador social, specialmente na Aruba, cu nos ta un ‘melting pot’ di diferente cultura – tin Latino, tin Asiatico, hende di Africa, di yen diferente pais di Caribe – bo mester por comprende cu tin diferencia cultural entre tur e habitantenan cu tin na Aruba.

Tambe por ehempel nos tin hopi background di investigacion, pasobra investigacion ta hopi importante den nos carera, pasobra bo mester sa con e situacion ta den bo sociedad. Nos ta investiga por ehempel cuanto hende di menos recurso tin, abuso di mucha, abuso domestico, violencia relacional, tur esaki bo ta investiga. [Nos ta siña] con bo ta haci investigacion, con bo ta haya informacion cu ta relevante, con bo ta haya informacion cu ta academico, cu ta sostene bo teoria, bo investigacion of bo punto di bista. Tin vaknan manera Derechonan Humano, Educacion, proyectonan cu fundacionnan. Por ehemplo, aworaki hunto cu mi coleganan ta haciendo un proyecto pa haci un actividad cu miembronan di Club Kibrahacha. Bo ta haci e sorto di cosnan aki pa basicamente yuda bo comunidad.

Lastimamente Aruba no tin hopi dato riba hopi indice cu nos lo mester tin. P’esey ta curasha pa e facultad pa nos haci e sorto di investigacion aki, pasobra nos mester di e datonan aki pa nos por tin un bon bista kico nos tin na man, kico nos por haci, y con nos por resolve un dado problema.

Kico ta bo enfoke den bo preparacion pa bira trahador social?
 Mi enfoke ta adolescente, pasobra nan ta na un edad unda un persona ta forma nan mes. Tambe ta un edad unda ta creciendo y cuminsa compronde nan mes. Mi ta haya cu door nan ta asina cerca di bira adulto, ta importante pa aborda cualkier problema cu e persona por tin, pa nan por crece miho y bira un miho profesional.

Hopi biaha tin mente briyante, hobennan cu hopi potencial, pero como cu nan tin tanto cos cu ta tene nan abao, nan no ta realisa nan potencial. Mi ta haya ta asina importante pa yuda nan, pasobra nos mester di profesional na Aruba.

Kico ta algo cu a cambia bo mente den bo estudio?
 Mi a cuminsa cambia mi opinion tocante hende cu tin problema cu droga. Antes mi no tabata sa di esaki, mi tabata tin actitud di ‘e ta djis un adicto’. Pero no, e persona ta djis un persona regular, of e tin problema mental of e tin problema na cas. Ta djis e no sa otro manera pa expresa, no a wordo yuda, of no por wordo yuda na e momento ey. Pues su unico escape ta bira e uso di droga.

Tambe mi a haya cu algo cu a cambia hopi ta con bo ta compronde otro persona. Pasobra tin hopi curso den e programa cu ta yuda compronde bo mes y otronan. Bo ta cuminsa compronde cu no tur hende ta ‘black and white’, tin rason pakico nan ta asina, pakico nan ta comporta asina. Mi comprension a expande. Por ta nan cultura ta diferente na mi cultura, pues mi no ta compara mas. Bo ta haya diferente wowo, manera un bril nobo pa mira sociedad.

Mirando e tema di Luna di Trahado Social ta Ubuntu. Con bo ta mira esaki na Aruba?
 Mi ta haya falta un tiki ainda, pero mi ta haya tin progreso. E ta progresando den sentido cu cada aña nos ta mira mas studiante ta sali di universidad, y hende di EPI tambe. Nan tin un idea diferente y nan kier haci un cambio. Nan no ta djis drenta den trabao social como cu ta djis un trabao. No, nan kier mehora nan isla, na comunidad y nan pais, pasobra nan stim’e. Nan ta stima nan prohimo y kier mehora e pais den cual nan ta biba. Esey ta un cambio cu nos ta mirando.

Pero falta un tiki ainda den salud mental, cu no ta wordo tuma na serio. Mi lo kier mira den futuro miho colaboracion entre otro organisacionnan. Nos tur ta’kinan pa yuda otro. Nos carera ta yuda comunidad y mehora comunidad.

Mi ta kere ta un cambio generacional, pero mi no por duna credito solamente na mi generacion. E ta bin tambe cu e cambio di mentalidad di nos tempo. Tambe e trahadonan social na Aruba ta cambiando nan manera di pensa riba cierto asunto. E pensamento a bira mas relativo cerca tur hende, ta bira mas inclusivo. Ta cuminsa mira e cambio di generacion door di e mentalidad, cu no ta discrimina pa salud mental, rasa, of cualkier otro caracteristica.

Pa conclui, Alvarez ta invita otro persona cu ta buscando nan caminda den bida, y cu ta interesa den trabao social, pa bishita website di Universidad di Aruba y siña mas tocante nan carera. “Mi ta spera di wak boso otro aña!”