Actual parlamentario di MEP y potencial minister di turismo den e gobierno proximo di coalicion (MEP-POR-RED), Dangui Oduber, a referi na e maneho nobo di turismo cu nan kier hiba den e gobernacion nobo y e prome paso ta pa reuni cu Oficina di Turismo Aruba (ATA) pa obtene mas informacion di nan.

Encuanto si ATA ta gosa di su confiansa como potencial minister di turismo, sr. Oduber a declara cu ‘mi no kier crea duda riba e maneho di ATA’. P’esey e ta considera importante cu prome cu nan ta pone den duda e maneho di ATA, si tabata bon of malo, ta relevante pa ricibi informacion detaya prome. Sr. Oduber a argumenta cu e tabata critico riba e maneho di turismo pasobra ‘den mi parecer nos por haci miho. Den sentido cu nos por atrae e turista cu ta gasta placa’.

Den linea grandi el a referi cu nan maneho lo enfoca entre otro pa bin cu turistanan di calidad cu ta gasta mas, reactiva nos caya grandi, trece mas siguridad pa nos turistanan, y mehora e condicion y infrastructura di nos waf pa ricibi mas mega crucero cu capacidad di 5 mil turista.

Sr. Oduber a laga sa cu logicamente ora cu e formacion di gobierno ta bira un realidad den e proximo dianan, nan ta bay mas den detaye di e programa mes di gobernacion pa asina tur hende sa kico nan ta para pe, unda nan ta bay y con nan lo ehecuta e maneho aki. “Ainda e ta un tiki prematuro, pasobra ainda e proceso di formacion no a formalisa completamente.”

ATA
Sr. Oduber a señala cu ora un mandatario ta tuma e maneho di un ministerio, den e caso aki turismo, logicamente nan kier haya sa mas detaye den e caso aki for di Oficina di Turismo Aruba (ATA). E lo desea di sa con ATA mes a funciona durante e ultimo 8 añanan aki. Unabes cu bo ta ricibi tur informacion, bo por tin un vision riba unda bo kier bay y kico bo kier haci diferente riba bo maneho.

El a prefera di no delanta mucho riba kico lo ta specifico riba maneho. “Mi kier sa prome kico tabata e maneho di ATA den e ultimo 8 aña.” E lo bay sinta cu e director di ATA pa haya tur informacion pa asina defini e maneho proximo. Esaki apesar cu durante e ultimo añanan cu el a fungi como parlamentario a yega di asisti na diferente reunion di informacion cu ATA den seno di parlamento.

Segun sr. Oduber, ATA tabata reuni anualmente cu e comision di turismo pa brinda informacion, pero esaki tabata mas tanto dirigi riba situacion di turismo pa loke ta trata e cantidad di nos bishitantenan cu a drenta Aruba nos terminalnan aereo y maritimo.

Tambe ATA tabata duna pronosticonan , pero nan kier sa mas informacion den detaye. “E maneho financiero con esaki a wordo hiba. Con cada florin pa ehempel di mercadeo tabata wordo gasta. Con cual companianan ATA tabata traha durante e ultimo 8 añanan aki.” Den sintesis e kier wak ‘un open book.’

Como eventual minister di Turismo e ta interesa di sa si analisis profundo a wordo haci riba cada florin cu ta wordo inverti den mercadeo. Si esaki ta resulta den un entrada adicional pa pais Aruba. E informacion aki mester ta uno mas detaya di loke nan tabata custumbra di haya ora cu nan tabata un fraccion di oposicion den Parlamento. “Un minister logicamente tin mas informacion cu un parlamentario,” el a bisa.

E informacion aki e ta considera valioso pa evalua si mester bin cu cambio den structura di ATA y tambe den caso di mercadeo si nan lo kier haci diferente. Pero e no kier anticipa mucho riba e tereno aki ya cu prome e ta prefera di haya informacion cu nan no ta dispone di dje na e momento aki, uunke e ta reitera cu nan sa unda nan kier bay y con nan lo kier hacie.

Pues e ta haya cu ta cuestion di un par di dia mas pa nan como parti di e gobierno di coalicion por cuminsa ehecuta nan vision riba turismo. E vision aki no solamente MEP a pone riba nan programa, pero tambe e vision cu nan ta bin defendiendo durante e ultimo 4 aña, el a bisa.

Maneho di turismo y team
Encuanto si e tin un team cu lo yude pa ehecuta su maneho den turismo, sr. Oduber a declara cu na momento cu bo ta hiba bo campaña ya bo ta prepara bo team, premirando un resultado faborabel.

Den e caso aki pueblo a vota pa un gobierno di coalicion. Aunke e ta preparando su team na e momento aki nada ta concreto ainda, considerando cu formado di gobierno ainda ta bezig cu su tarea. “Na momento cu esaki ta bira un realidad e ora ey bo ta formalisa bo ekipo”, el a bisa.

Segun sr. Oduber, e discusion cu el a hiba como parlamentario di oposicion tabata ta cu apesar di e volumen di turista cu nos ta hayando -segun rapportnan nan ta gasta placa y contribui na economia- sinembargo e ta haya cu nan no ta gasta suficiente. P’esey e ta kere cu e maneho nobo di turismo mester ta otro pa percura di trece e turistanan di calidad cu ta dispuesto pa gasta mas riba nos isla.

El a bisa cu cifranan cu den varios ocasion a wordo trece dilanti ta indica e turistanan cu ta biniendo nos pais ta gasta un averahe di 100 dollar menos pa dia durante nan estadia, compara cu antes. Nan ta lagando entre 800 pa 1000 dollar menos durante nan estadia di un siman riba nos isla.

P’esey nan a pone den nan programa di gobernacion cu nan kier mira ‘e turista bek cu ta laga placa atras den nos economia’. Ya cu nan no a mira esaki den e resultado di e ultimo 8 añanan.

“E cantidad t’ey pero e calidad simplemente no t’ey”, el a bisa. Pa tal motibo nan a pone esaki como prioridad den nan programa di gobernacion.