Parlamentario di fraccion di AVP, Marlon Sneek ta mustra sumamente contento cu colega di parlamento pa fraccion di MEP, Dangui Oduber, a cuminsa sigui e vision di gobierno di AVP pa loke ta desaroyo di cierto areanan rond di e isla, dirigi pa crea un ambiente positivo y agradabel pa nos propio hendenan. Aki e lider di fraccion di AVP ta señala un plan di Dangui Oduber, kende awor cu e destaho publico pa basha ex Bushiri Beach Hotel abou, kier adopta e vision di gobierno pa transforma e luga aki den un parke di recreo pa comunidad.
“Nos a mira e cambio di Dangui aki cu masha cautela ya cu e politico di MEP aki ta shete aña atrasa cu un plan cu ya caba Gobierno di AVP hunto cu diferente instancia den comunidad, a formula den un documento cu a bira oficial na 2010. Loke a pasa for di e tempo ey tabata e hecho cu un grupo di comerciante kier a desaroya un hotel na e sitio aki y nan a ser brinda e tempo suficiente pa yega na un plan concreto pero nan no a logra den e proposito aki, y consecuentemente a perde nan derecho y oportunidad pa realisa e proyecto aki.
Destaho publico a bira conoci e siman aki caminda DOW lo acepta ofertanan pa basha e edificio abou y limpia e luga completamente caminda ya caba, manera a sosode na diferente sitio caba, e luga lo wordo destina den un sitio di recreo pa nos pueblo. Un plan cu for di 2010 ta riba mesa caba y formula den un documento oficial pero cu awor numa Dangui Oduber di MEP ta lanta for di soño y presenta algo den campaña politico, mientras cu e por a busca e documento cu tin riba ehecucion di e vision di AVP, pa desaroya e sitio aki mescos cu otro areanan cu a wordo ehecuta caba. E plan aki ta conoci como “Renobacion Urbano” cu no ta un idea di un Minister pero un documento cu a wordo compila despues di un reuni cu tur grupo interesa den un conferencia cu a tuma luga for di dia 19 di Juni te cu 26 di Juni di 2010. Pues tur e ideanan aki a Sali for di e conferencia ey,” Parlamentario Marlon Sneek ta mustra.
