Dan Schneider ta demanda pa difamacion den ‘Quiet On Set’

(TMZ) – Dan Schneider ta demandando productornan di ‘Quiet On Set’, bisando cu nan a difam’e door di pint’e falsamente como un abusador sexual di mucha na Nickelodeon y dañando su reputacion.

E famoso productor di television a entrega un demanda pa difamacion criticando e serie documental y su creadornan – incluyendo Warner Bros. Discovery, Maxine Productions, Sony Pictures Television y otronan – pa implica falsamente cu el a abusa sexualmente di e actornan infantil cu a traha den su shownan den pasado.

Abogadonan di Schneider ta tacha “Quiet On Set: The Dark Side of Kids TV” como un “hit job.”

Manera conoci, Schneider a crea “The Amanda Show,” “Drake & Josh,” “Zoey 101,” “iCarly” y “Victorious” durante su tempo na Nickelodeon, y den e documental, e tabata e enfoke principal. Demanda di Schneider ta alega cu e serie a usa tecnica manipulador di edicion pa crea un impresion falso di Schneider. E demanda ta alega cu e acusadonan a purba di pone Schneider den e mesun macutu cu dos otro abusador sexual di mucha condena kendenan a traha riba e shownan di Nickelodeon. E ta bisa cu e acusadonan a hacie pa “clickbait, rating y views, of poni simplemente, placa.”

Su abogado a bisa cu “Schneider no tabatin conocemento di e abuso, no tabata complice den e abuso, a condena e abuso unabes cu a descubri esaki, y criticamente, e mes no tabata un abusador di mucha.”

Schneider ta alega cu e serie a usa declaracionnan y tecnicanan deceptivo di edicion den e trailer y varios episodio pa crea e impresion falso cu e tabata un pedofiel.

E demanda ta bisa cu productornan intencionalmente a ignora hende cu lo bay contra nan narativa.

Schneider sinembargo ta concede den e demanda cu e tabata ciego pa algun di su mal comportamento pa cu coleganan, subordinadonan y miembronan di elenco, pero ta insisti cu comportamento asina no ta conecta di ningun manera cu abuso sexual di mucha.

Schneider ta demandando pa difamacion y buscando daño no specifica, incluyendo castigo, bisando cu el a sufri mental- y financieramente como resultado di e serie documental.