Parlamentario Shailiny Tromp-Lee:
Diamars ultimo, dia 16 di januari, minister Otmar Oduber tabata den parlamento pa trata e PPP proyect Green Corridor. Minister Oduber a bin splica parlamento di e situacion precario di crisis cu el a bin haya e proyecto Green Corridor aden na fin di 2017. Alabes, no obstante e echo cu e falta hopi informacion, el a purba di duna parlamento un bista di e posibel consecuencianan financiero, tecnico, huridico cu e proyecto por ta aden actualmente.
Un di e consecuencianan ta e informacion cu e financiadonan a pone un fecha di ultimatum pa e proyecto Green Corridor, esta 18 di januari, caminda nan ta urgi gobierno pa yega na un solucion p’asina evita posibel consecuencia financiero pa pais Aruba.
Sigur e situacion di crisis aki no a bin cay for di cielo. For di un memo cu a keda traha pa PWC, pa minister Oduber, fecha 15 di januari, nos por a tuma nota cu desde januari 2017 e proyecto tabata den ‘verhoogd risico’ y poco poco di e fase aki a bay pa un situacion di ‘at risk’ y a termina den un situacion di crisis. E situacion aki a conduci cu e minister actual no tin nada otro pa haci cu purba di scapa loke e por scapa pa pais Aruba. P’esey durante su presentacion el a bisa: “Damn if we do, damn if we don’t”.
Pa referi na algun conclusion di PWC:
- Desde october 2016 a keda indica cu e proyecto no ta keda maneha conforme principionan di un DBFM (Design, build, finance, manage) contract, ni door di CIC, ni door di DOW;
- Falta di conocemento riba e tereno di SCB (systeemgerichte contractbeheersing);
- Falta di conocemento na DOW encuanto SCB;
- Tin un risico grandi cu e calidad di trabou realisa pa CIC no ta cumpli completamente cu e exigencianan prescribi den e DBFM contract;
- CIC no tin e Deviations process y e validatie- en verificatieproces na ordo conforme e DBFM;
Tur e puntonan aki a conduci cu ya for di januari 2017 PWC ta indica cu CIC no ta ‘in control’ mas di e proyecto y cu e proyecto ta den un situacion riesgo.
Loke Aruba completo mester puntra ta: Dicon minister Sevinger no a actua na e momentonan crucial aki? Dicon minister Sevinger a laga e baca hoga? Oposicion na e momentonan aki kier desvia e atencion for di e problema cu Aruba ta aden door di bisa cu e brug a hisa calidad di bida, cu famianan ta resta mas tempo, etc. Pero esey no ta e discusion.
Situacion ta cu a keda demostra cu minister Sevinger no a tuma accionnan necesario na tempo p’asina percura cu ta cumpli cu e proceso describi den e DBFM contract. Esaki cu tur posibel consecuencianan (financiero, tecnico etc) desastroso.
Un situacion cu sigur por a keda preveni si minister Sevinger a haci su trabou responsabel y na un manera transparente y serio.
Lastimamente durante di reunion na luga di duna splicacion di e situacion cu el a laga atras, y duna su aporte na busca un solucion, a dicidi di duna splicacion di e prome fasenan di e proyecto, esta te na e caminda cu e contract a keda cera. Purba tapa solo cu un dede lastimamente no ta saca Aruba for di e problema grandi cu el a hinca nos aden. Otro sucede durante e reunion publico cu a indigna mi y cu sigur ta un berguensa ta e echo con sr. Sevinger den bos halto y na un manera masha arogante ta durf di bisa: ‘I don’t give a damn!’. Indicando na mesun momento e pakico nos ta den e situacion cu nos ta actualmente.
Mirando e situacion presenta na parlamento, fraccionnan di MEP, POR y RED a duna minister Oduber mediante un mocion e apoderacion pa inicia cu negociacion nan necesario cu Caribbean Infrastructure Company (CIC). Asina parlamento ta crea e espacio pa minister por bay inicia e fase di ‘damage control’ y bin bek parlamento prome cu e tuma cualkier decision. Sigur ta di aplaudi e iniciativa tuma pa minister Oduber pa bin informa parlamento y pueblo di e situacion hereda.
Alabes minister ta crea e espacio pa parlamento por haci su trabou debidamente. Trahando na un manera serio y transparente sigur nos ta cumpli cu reglanan di bon gobernacion.
