Recientemente ariba rednan social por a tuma nota di diferente publicacion pa loke ta trata e dam di Rooi Afo. Algun dia pasa un usuario a publica ariba su pagina di Facebook cu el a mira algun pisca morto den dam di Rooi Afo, locual no ta un bon señal y a bati alarma pa Departamento di Agricultura, Cria y Pesca, Santa Rosa, ariba e situacion preocupante aki.

Santa Rosa Aruba a tuma nota di e situacion aki y ayera tardi a publica un aviso ariba nan pagina di Facebook alertando tur persona cu ta haci uso di e dam aki, cu e ta bay ta cera te cu proximo aviso.

“Atencion na tur usuario di e dam di Rooi Afo. Nos a ricibi melding cu desde siman pasa, tin varios pisca morto den e dam y di inmediato nos a meld na DVG pa nan controla e awa prome cu sigui hasi uso di e dam aki. Nos kier informa cu pa tur cautela, nos a cera e dam cu piedra y ta pidi tur usuario pa no haci uso di e awa, specialmente pa criansa di bestia, te ora cu nos ricibi resultado di e awa for di Departamento di Salubridad,” e departamento a publica a indica.

Ainda no tin ningun indicacion di kico e problema cu e awa di e dam lo por ta ni pakico e piscanan den e dam aki ta muriendo. Manera Santa Rosa a indica, DVG mester haci nan control necesario pa averigua si e awa ta contamina of no.

Den pasado caba e preocupacion di cu awa por ta contamina a bini pa dilanti, pero esaki, segun Minister di Turismo y Salud Publico, Dangui Oduber no tabata e caso. Na 2019 tabatin preocupacion tocante posibel contaminacion di awa na Aruba y e preocupacion aki a wordo treci pa dilanti den Parlamento di Aruba. Den Parlamento a señala e hecho cu e awanan rond di Aruba ta contamina y ta un peliger pa esnan cu ta haci uzo di dje.

E tempo ey Minister Oduber a enfatisa cu esaki no ta e caso y no ta e realidad. E mandatario a menciona cu como Minister di Salud Publico e ta garantisa e comunidad di Aruba cu e awa nan ta sigur pa landa aden. E mandatario a sigui bisa cu e unidad di DVG di Dienst Warenkeuringen Hygiëne (DWH) tur luna ta tuma muestra (sample) di e lama nan, dam nan y e RWZI nan rond di nos isla.

E muestra nan aki ta keda procesa pa e laboratorio di hospital cu ta certifica pa ISO y ta acredita na Hulanda. Segun e minister tur luna DWH ta controla si e awanan (bacteriologico, no Chemisch) ta wordo contamina y esaki ta sucede na diferente punto na e isla y na un forma regular y di tur e muestranan cu a keda colecta a conclui, e tempo ey, cu no tin contaminacion den ningun di e awanan.

Aworaki tin un preocupacion un biaha mas y miedo pa un posibel contaminacion. Tanto Santa Rosa Aruba como usuarionan di e dam di Rooi Afo ta en espera di e resultado di e testnan realisa pa DVG pa asina por confirma kico e situacion ta y si e awa ta contamina of no.

Apart di e situacion di awa, otro usuario a trece pa dilanti su preocupacion ariba Facebook pa loke ta trata e condicion di e muraya di e mesun dam aki. E publicacion aki a ricibi varios comentario di otro usuarionan, ya hasta residente di e area cu a menciona cu pa basta tempo caba e murayanan di e dam ta den e condicion deplorabel aki.

“Si. Masha tempo mi tabata remarca cu e lo bay abao. Hasta e asfalt a kraak tambe. Mester haci algo prome e basha abao y causa un mal accidente,” un persona a comenta, señalando cu for di hopi tempo caba su mes a remarca e situacion peligroso cu e condicion di e muraya di e dam ta trece pa automobilistanan.