Por medio di un carta cu Bon Dia Aruba a haya for di un fuente anonimo a bira conoci cu e candidato Daphne Lejuez a entrega na directiva di partido Accion 21 su retiro y ademas, tambe a bira conoci cu otro candidato riba lista, Leonardo Figaroa, tambe a tuma e mesun decision.
Den e carta, Lejuez ta señala cu “Adicionalmente mirando e falta di organisacion profesional di e partido, unda cu a opera sin cu directiva a atene su mes na e Statuut, ta causa cu mi a perde confiansa den e partido y particularmente Sr. Mansur. Awe mi ta tuma e decision di retira for di e partido mirando (1) e “onwerkbare situatie” cu a keda ocasiona pa Sr Mansur, particularmente mirando cu di su banda no tin espacio ni pa deliberacion, dialogo of reconciliacion y (2) tambe e hecho cu directiva no a adheri na Statuut, cu tur consecuencia ya menciona.
Ademas, den e carta di retiro el a menciona cu “mi ta lamenta profundamente cu mester a yega na esaki, sigur si mira cu mi semper a duna di mi banda desde e momento cu mi a afilia mi mes na e partido. Mas aun mi ta lamenta e hecho cu Sr. Mansur no a atende su inkietudnan cu mi persona prome cu eleccion, pero a opta pa haci esaki despues di eleccion, y di e forma aki kier si haci uso di e sosten cu mi persona a ricibi mediante e partido pa tambe por a contribui na e asiento cu a keda alcansa hunto cu e otro candidatonan riba e lista,” Lejuez a finalisa.
