Cyndi Kelly Mathilda, Director di Asociacion Trabou di Hubentud Aruba: ‘ATHA ta para pa duna servicio pa mucha cu limitacion’

Diamars pasa, durante un conferencia di prensa cu Asociacion Trabou di Hubentud Aruba (ATHA) a ofrece, nan a duna di conoce tocante nan proximo proyecto di e aña aki, ATHA Bike Tour 2019.

Tres mucha cu ta forma parti di e comision di ATHA Bike Tour 2019 a informa cu esaki lo tuma luga diasabra awor, dia 16 di november, cu un parada di bicicleta pa tur mucha y pa esunnan cu tin algun limitacion, muchanan desde 4 aña, hobennan, mayornan y amante di deporte por participa.

E parada aki lo sali desde 9or di mainta for di ATHA, patras di Pius X School cu dos ruta, ruta un ta di ‘kids’ di 4 pa 8 aña y di dos ruta ta ‘kids youth’ di 9 aña bay ariba.

Nataniel Rylie, miembro di e comision aki, a duna di conoce cu despues di Bike Tour lo tin diferente actividad pa muchanan na ATHA.

Di mesun manera, a informa cu ATHA tin como base principal pa salvaguardia derecho di tur ciudadano y participante, manera muchanan. Meta di e proyecto aki ta pa cubri di un forma recreativo tres articulonan cu ta forma parti di e tratado di derecho di mucha, por ehempel, tur mucha tin derecho di participa activamente, sin importa si tin algun limitacion.

Cyndi Kelly Mathilda, Director di ATHA, a manifesta cu esaki ta un actividad pa celebra Dia Nacional di Mucha y Dia Internacional di Derecho di Mucha. Recientemente ATHA hunto cu organisacionnan cu no ta pertenece pa gobierno a skirbi un reporte riba e Derecho di Mucha na Aruba.

El a splica cu ATHA ta para pa duna servicio pa organisacion cu ta traha cu mucha cu limitacion. Por ehempel nan tin como miembro Stichting Sonrisa, Trampolin pa Trabou, SVGA, como tambe FAVI. El a bisa cu pa ATHA no tin distincion na momento cu ta papia di mucha cu, of sin limitacion.

Tambe, el a señala cu nan ta para riba e tratado di derecho di mucha y eynan ta bisa cu na momento cu bo ta papia di un mucha of un hoben, no tin cu menciona si tin of no un limitacion. Pa es motibo, ora nan ta haci actividad, ta agrega esey pa hende por sa cu nan tambe por participa den e actividad.

“Hopi biaha e mayornan ta pensa si nan yiu por asisti na un actividad cu un limitacion, y den esey nos ta habri”, Kelly Mathilda a expresa.

El a comenta cu nan a reporta na Geneva, Suisa, caminda cu a haci un encuesta bou organisacionnan cu ta traha cu mucha y hoben y con nan ta experiencia cu e muchanan e derechonan, con esey ta wordo respeta y con e muchanan ta haya oportunidad pa tin derecho.

Di mesun manera, el a duna di conoce cu aworaki tin un proyecto cu ta yama ‘Poder di Hubentud’, cu ta un proyecto cu ta guia e hobennan pa ta un futuro lider. El a comenta cu un hoben den rolstoel ta participa y el a integra cu e grupo di un manera fantastico.

Ademas Kelly Mathilda a sigura cu nan a traha un reporte di e hobennan mes, caminda e hobennan por vocifera kico nan ta haya di nan derecho, derecho cu nan tin den e pais, den scol, den deporte. Pero tambe den esaki nan a haci e pregunta na e hobennan kico nan ta pensa di un programa despues di scol. E resultado tabata cu 60% di hobennan mes tin hopi interes den un programa despues di scol.

Na augustus 2020, el a splica cu lo cuminsa cu un programa pa hoben despues di scol. Esaki ta e prome biaha cu ATHA, den conexion cu Cede Aruba y diferente organisacionnan, lo cuminsa pa por yega na e programa.

Di e manera aki, a base di e sondeo cu nan a haci nan tambe ta saca afo kico ta e proyectonan y concentrando primeramente riba e derecho di mucha, e actividad di Bike Tour 2019 a sali di e mesun idea di e hobennan pa motibo cu ATHA ta considera importante kico e hobennan ta desea y cu recreacion ta hopi importante pa nan.

Pa finalisa, Kelly Mathilda a informa cu pa hopi añanan caba nan tin un proyecto pa stimula e hobennan y muchanan pa cuminsa trabou boluntario den un edad hopi hoben, por medio di benta di carchinan di Pasco of e carchinan di Aruba nan ta haci esey den diferente famia, bisiña y asina por duna un sosten y aporte pa ATHA, cu esey nan lo haya fondonan cu nan lo uza bek pa aporta pa diferente proyectonan di comunidad.

E aña aki nan tin e carchinan di Pasco y di Aruba cu ta na benta na diferente alumno di diferente scol.