Menos di dos luna despues cu nan romance na pia di trabou a termina. Ahmad Kazzelbach a cuminsa mishi cu cuentanan di e-mail y rednan social di e muhe di Baltimore ken a termina e relacion cune. El a cambia su nomber di usuario di Instagram pa inclui e palabra ‘prostituta’.
Esey tabata apenas e comienso di un campaña vicioso di acoso cibernetico cu lo escala durante e siguiente aña. Prome cu agentenan di FBI a aresta su ex-pareha, e muhe a wordo aresta incorectamente dos biaha y a pasa dos anochi cera basa riba un cantidad di reporte falso di polis cu e acosador a fabrica.
Kazzelbach, di 27 aña y di Pasadena, Maryland, a ricibi sentencia dialuna pa cuatro aña den prizon pa su acoso online di e muhe, identifica pa su inicialnan J.K. den documentonan di corte.
Hues di districto Mericano, James Bredar a bisa cu Kazzlebach repetidamente a gaña polis y oficialnan di corte pa esencialmente ‘bay den guera’ contra su ex-pareha.
“El a hiba e campaña asina leu cu el a usa su habilidad considerabel pa altera y manipula evidencia y a logra usa sistema di husticia criminal como un arma contra e persona”, Bredar a bisa. E hues a desvia di guia di sentencia cu a pidi pa un castigo mas leve di 30 pa 37 luna.
Ex-pareha di Kazzelback a bisa e hues cu e tabata spanta cu e homber a logra pa e wordo aresta y cera falsamente dos biaha. El a sinti sin speransa den cel.
Kazzlebach a declara culpabilidad na januari pa acoso cibernetico y daño intencional na un computer protegi. Fiscal Jeffrey Inzant a recomenda un sentencia di 30 luna. Bredar a bisa cu e tabata sorprendi cu fiscal federal no a pidi un termino mas largo.
Kazzlebach, kende su abogado a solicita un sentencia di un aña di prison, a pidi disculpa na su ex-pareha durante e audiencia. “Mi a haci bo daño, y mi ta profundamente sorry”, el a bisa. “Bo no lo tende ni mira mi nunca mas.”
Kazzlebach a conoce e muhe, kende awo tin 28 aña di edad, ora el a cuminsa traha como broker di seguro medico pa Bankers Life na Glen Burnie, Maryland, na juni 2015. Kazzlebach tabata su agente di training. Nan a cuminsa un relacion y na december 2015 a cuminsa comparti un apartamento.
E muhe a termina e relacion na mei 2016, despues di haya sa di su ‘supuest infidelidad’ segun documentonan di corte. Pero nan a sigui traha den e mesun compania. E acoso a cuminsa na juli 2016, ora Kazzlebach a crea un cuenta di email similar na esun real di e muhe y a us’e pa cambia su cuenta di Apple. Tambe el a cambia email di su studielening. Ora el a usa un fax mashine di trabou pa falsifica carta cancelando polisa di seguro di clientenan di su ex-pareha, sin nan conocemento, dunado di trabou a confront’e y el a renuncia.
Despues el a cuminsa yena peticion pa orden di proteccion door di falsamente acusa su ex-pareha di abuso fisico y menasa. El a mustra polis mensahenan y yamadanan falso. Na momento cu detectivenan di polis di Baltimore County a investiga acusacion di Kazzlebach, nan a descubri cu recordnan di telefon no tabata sostene su storia. Agentenan di FBI a arest’e na januari 2019.
