Den fondo di lama na Shut, servicio di rescate y un takelwagen a pasa oranan sacando un pickup di lama dialuna ultimo. Un sambuyado a descubri e pickup, cual tabata mustra basta bon compara cu e otro restonan di fondo di lama.
Ta trata di un pickup Ford. E sambuyado a tuma nota di e number cu ta pega riba e vehiculo y mesora a suministra esaki na autoridadnan cu a cuminsa cu nan investigacion. Por a saca afo cu e vehiculo y tambe e doño di e vehiculo Michael Venema tabata perdi for di aña pasa den e ultimo kwartaal di aña.
Ta trata di un homber cu hasta polisnan a saca un comunicado buskeda debi cu famianan a denuncia cu e ta perdi. Debi cu e vehiculo ya su glasnan tabata tapa cu lima no por a wak den esaki cu si tin hende den e vehiculo.
Mesora e autoridadnan competente a pidi yudansa di un grua y tambe dos sambuyado basta experencia cu sa haci e trabounan di baha na awa durante investigacion policial. A uza kabelnan pa asina trata di saca e vehiculo for di den lama, pero debi cu esaki tabata basta leu for di costa y e lama tabata basta bruto e trabou no a cristalisa. Den un intento hasta un biaha e kabel a kibra.
A opta pa wanta cu e trabounan pa saca e vehiculo for di den lama un rato y awor ta bay uza saconan yena cu aire pa trata di manda e vehiculo superficie pa despues hala esaki cu kabel cu yudansa di un grua manda canto pa por finalisa e investigacion.
