“E resultado di eleccion ta parce cu pueblo no a vota pa un cambio real.” Asina Christina Lampe, lider di e partido ta comenta na Bon Dia Aruba. Sinembargo e partido lo sigui traha pa proximo eleccion, e ta sigura.
E partido lo enfoca den futuro riba desaroyo cu lo tuma luga, mirando cu nan ta pensa cu amienda #7 lo pasa y bira ley. “Pa mi esaki tabata un comienso”, sra. Lampe ta expresa. E partido a logra haya 468 voto en total, cu un mayoria di 158 voto bayendo pa e lider Lampe. Durante campaña e partido a enfoca hopi riba nan punto mas importante, pues pa bari e amienda #7 for di mesa. E amienda aki tin como meta pa brinda mas derecho na parehanan di mesun sexo.
Si e campaña aki a yuda e partido of wanta nan atras, sra. Lampe ta expresa cu ‘mi ta haya cu pa esaki nan a tuma nos na serio’. “Mientras cu otro partido no tabata vocifera e berdad cu e pueblo kier a tende, anos a para cla pa kico nos ta pensa den dje. Tin cierto partidonan cu no a bay ni pro ni contra e amienda aki, pero a keda draai rond sin duna un declaracion serio.” Segun sra. Lampe, e tin siguridad cu e amienda lo bira ley, mirando resultado di eleccion. “E ora ey den futuro mi no kier mira ningun grupo cu ta bay den protesta contra esaki, pasobra pueblo a scoge claramente cu nan kier esaki. Nos lo mester wak kico ta e consecuencianan.”
E ta referi aki na un protesta en contra e amienda cu a tuma luga aña pasa na altura di e bar Chaos. “Ami a wordo yama pa spierta pueblo, y mi a papia mi berdad. Mañan e ta bay pasa y e lo bira ley, y mi no tin problema cu esaki. Pero no por bin protesta pasobra e pueblo a haya su chens.”
Futuro di Curpa
Si e partido ta sigur cu e amienda lo pasa, e ora mester cuestiona cual lo bira e punto di enfoke pa futuro di e partido. Sra. Lampe ta splica cu lo mester wak e desaroyonan. Sra. Lampe ta duna ehempel di e acuerdo cu minister demisionario di Enseñansa Michelle Hooyboer-Winklaar a cera cu Hulanda pa haci cambio den sistema educacional. “Esaki lo wordo implementa, y nan a cuminsa caba te hasta, pasobra nan ta bisando e muchanan cu nan no ta mucha muhe ni mucha homber te cu nan dicidi esaki ora bira mas grandi.”
Ki consecuencia esaki lo tin den futuro pa nos cultura, mester wak ainda, segun e lider di Curpa. Na mes momento e ta expresa cu e partido lo sinta den seno pa palabra kico ta bira prioridad den futuro.
Pa ultimo sra. Lampe ta clarifica cu ‘nos no tin nada contra e hendenan aki, nan ta hende mescos cu nos traha pa e mesun Dios, pero, ya, nos ta adverti riba cosnan cu no lo ta bon pa futuro’.
