Manera a keda conoci pa henter comunidad, diasabra pasa un grupo di piscado a bay tira pisca den awanan di teritorio Venezolano y un di nan a perde. Na e momentonan ey su amigonan a bin bek na Aruba pa duna di conoce e noticia na su famia y amigonan.
Fuentenan cercano na e victima a confirma na Bon Dia Aruba a haya e tristo noticia cu Paulus Martijn a ser haya sin bida na costanan di Colombia. Ayera trempan mainta un grupo di amigonan y piscadonan di dje a sali via Colombia den e buskeda di Martijn, ora nan a yega costa di Colombia nan a haya e informacion di habitantenan cu tin un curpa cu a yega na tera. Te ciere di edicion, Colombia no a confirma cu ta trata di Martijn.
Na e momentonan cu nan bay mira si tabata trata di nan amigo, nan a haya e lamentabel noticia cu efectivamente tabata e curpa di ‘Pau’ manera e tabata conoci entre su amigonan.
Maske informacion oficial ta indica cu famia di Martijn a identifica e curpa, varios rumor tabata circula via rednan social ayera nochi. Un di nan ta cu autoridadnan Venezolano tambe a reporta hallazgo di un curpa sin bida cu un tanki buceo; pa cual nan a pidi Aruba confirma e tipo di tanki cu Martijn tabata usa. Ademas, riba pagina di Facebook di famia di Martijn tambe tabatin hende expresando duda cu e curpa cu a haya na Colombia ta di Martijn.
Autoridadnan na Aruba ainda no a duna un declaracion oficial riba e asunto.
