Mas trabao pa Gobierno sin cu ta haya fondo, metemento di politica y patronahe a produci un maneho empresarial devastador pa Serlimar. Asina curator mr. Geert Rep a pone den su relato pa huez, pa asina logra e asina yama ‘surseance van betaling’, esta e suspension di obligacion di pago. E relato tabatin como obhetivo splica e situacion actual, y e peticion pa e surseance, despues di un rapport ‘quick-scan’ efectua pa Grant Thornton na februari ultimo.

Servicio di Limpiesa, Serlimar a bira un entidad ‘sui generis’ es decir di un caracter propio, na 2005. E compania ta funda a base di un ley cu ta duna e reglanan con mester administra e compania. E direccion actual ta consisti di Director Anko Koopmans y su adhunto, Madeline Lacle. E Hunta di Supervision ta forma pa cuatro miembro, Roland Croes, Ricky Quant, Kenneth Geo y Stanley Heinze.

Motibo

Serlimar tabatin problema grandi pa paga gastonan operacional, corda pa paga creditornan. E direccion actual a drenta dia 19 di maart 2020 y a topa un situacion cu no por a yega na ningun otro conclusion cu para e realidad cu nan a topa e compania aden. E Conseho di Supervision (Raad van Toezicht) a bay di acuerdo.

Mirando e buraco den e gastonan operacional, mester a contesta mas pregunta cu locual tabata e caso den e promer peticion di surseance. Mester a determina e motibonan y tambe e solucionnan cu mester a acompaña e peticion.

E conclusion general ta cu tin diferente motibo pakico Serlimar no por a sigui brinda servicio, cu a cantidad di placa cu e tabatin na su desposicion; e cobranza di e suma cu clientenan mester a paga pa servicionan tabata insuficiente; for di e punto di bista di costo na Serlimar, tin hopi trahador caro compara cu e resultado; den pasado tabatin hopi metemento politico cu a conduci na consecuencianan cu ta inaceptabel pa un operacion prudente.

For di 19 di mei 2020 a palabra cu Pais Aruba cu mester bin cambionan drastico y necesario den Serlimar. Esaki a conduci cu mientras tanto Gobierno a sigui subsidia e operacion mensualmente. Normalmente, Pais Aruba ta paga un suma fiho na DVO, Dienst Verlenings Overeenkomst pa servicionan cu Serlimar ta brinda, manera colecta sushi, procesa sushi, mantencion di plaza y espacionan publico pero no ta sumanan suficiente pa cubri e gastonan. Resultado ta cu cada biaha e buraco financiero ta bira mas grandi. Durante e ultimo lunanan di e surceance, Pais Aruba a paga dos biaha un suma adicional na Serlimar, cu segun e compania ta igual na e gastonan operacional di e luna ey.

Pais Aruba a indica tambe cu ta e intencion pa yega na un fin positivo di e surceance. Serlimar a bisa, sin kier causa mas tension, cu Pais Aruba ta responsabel pa metemento di politica den maneho den pasado ( cu a conduci na e situacion actual).

Serlimar mester un cambio
 E situacion pa asisti financieramente pa evita cu ta kita di e responsabilisacion aki no por sigui asina. Pais Aruba mes lo no kier esaki, tampoco Serlimar por sigui den e forma aki, particularmente awor cu CAft y Hulanda ta pone mas presion, segun Geert Rep.

Den futuro mester pone hopi mas atencion riba e organisacion interno, pa haci esaki mas eficiente. Ya caba a duna Ecosense y Infoma e tarea pa a base di un ‘quickscan’ trece e organisacion riba mapa y a ricibi raportahenan interno caba. Consecuencia di esaki y e intencion tambe ta cu kier logra un maneho empresarial exitoso y positivo den un aña y mey.

Rep, como curator a constata cu e maneho di debitor pa un empresa saludabel no ta bon ehecuta. Tanto riba e tereno di automatisacion como e cumplimento di algun termino di pago mester di mehoracion.

Ecogas

Serlimar recientemente a cera un acuerdo nobo cu Ecogas. Cu esey no unicamente ta purba procesa sushi na un forma responsabel, pero e partidonan tambe a papia cu lo traha hunto na un solucion mas barata y duradero den forma di exportacion di sushi. E tempo palabra ta seis luna.

Un di e motibonan di e situacion financiero precario di Serlimar ta keda e influencia politico. Hopi biaha ta duna Serlimar tareanan for di Gobierno, sin cu tin fondonan a cambio. Mas ainda, tin suficiente indicacion cu Gobierno a mete activamente den cera contratonan, negociacion y otro decisionnan cu tabatin un influencia negativo riba e maneho di Serlimar, ademas cu e metemento aki no ta permiti. Por pensa riba e instruccion pa no cobra na 2018. Tambe oferta di personal cu Serlimar no a pidi, cu por keda describi como patronahe, tabatin influencia negativo riba e maneho empresarial di Serlimar. Situacionnan asina aki lo no por sucede mas den futuro y mester tuma medida contra.

Consecuencia pa creditornan

Mester determina cu Servicio di Impuesto tin un posicion preferencial riba otro creditornan, pa cobra 13 miyon di Serlimar. E otro creditornan tin un cuenta pa cobra di 8 miyon florin. Banda di esey tin otro creditornan cu tin un posicion special, manera esnan cu a cera un contrato di ‘huurkoop’ pa e trucknan of pa e huur di espacio unda ta warda e barinan di Serlimar. Si mester manda Serlimar den bancarota, anto e creditornan aki lo no ricibi nan placa. Pa tal motibo mes e surceance di pago ta asina importante. E forma con lo paga e creditornan aki, lo mester keda formalisa ainda. Pero, pa Geert Rep e ta importante si cu no tin e posibilidad pa paga e creditornan, e mes lo pidi huez pa declara Serlimar bancarota.

E pago na creditornan mester bira posibel pa un parti, for di e manera con Serlimar lo bira rendabel den e siguiente periodo. Pero esey lo no ta suficiente, Rep a bisa. Mester hiba palabracionnan serio cu Pais Aruba pa mira si e dos partidonan aki, esta Serlimar y Gobierno por yega na un acuerdo mutuo pa asina satisface e creditornan. Esaki lo evita cu ta pone Pais Aruba responsabel, ta actua den interes general di comunidad y e reputacion internacional, si internamente mes, por logra soluciona e problemanan di Serlimar. Esaki lo por traduci su mes den un suma cu por keda disponibel pa creditornan.

E curator mr. Geert Rep ta kere cu den e aña y mey cu Huez a duna pa e suspension di pago, lo mester concretisa e plannan aki.